Bestaansminimum ta aumenta mientras inflacion na Aruba a yega 2.7%

Costo di bida na Aruba a registra un aumento nobo durante luna di augustus 2026. E Consumer Price Index (CPI) a subi cu 0.5% compara cu luna di juli, mientras cu inflacion midi durante e ultimo 12 luna a yega 2.7%. E aumento mensual a ser impulsa principalmente door di transporte, mientras cu prijsnan di cuminda tambe a sigui subi. Alabes, cifranan nobo di Central Bureau of Statistics (CBS) ta mustra cu bestaansminimum pa un famia consistiendo di dos adulto y dos mucha a yega Afl. 5.663 pa luna, mientras cu pa un adulto so e nivel minimo calcula ta Afl. 2.697.

Segun e publicacion di CBS pa luna di augustus 2026, CPI a subi di 111,53 na juli pa 112,12 na augustus, un aumento di 0.5%. Compara cu augustus 2025, nivel general di prijsnan tabata 2.7% mas halto. Inflacion promedio, calcula comparando e ultimo periodo di 12 luna cu e 12 lunanan anterior, tabata 1.0%.

Di e 12 sectornan cu CBS ta sigui, ocho a registra aumento di prijs durante luna di augustus. Transporte tabata e sector cu e impacto mas grandi, cu un aumento di 3.4%. E sector di otro producto y servicio a subi 1.0%, mientras cu vivienda a registra un aumento di 0.3%. Comunicacion, na otro banda, a baha 1.8% y asina a compensa parti di e aumentonan den otro sector.

E aumento den transporte ta relaciona principalmente cu costo di operacion di transporte personal. E categoria aki a subi 5.7% den un luna. Un factor importante tabata prijs di combustible. Gasolin a subi cu 25,1 cen pa liter, of 9.4%, mientras cu diesel a bira 29,7 cen mas caro, un aumento di 11.6%. Na mesun momento, prijs promedio di crudo internacional a subi di USD 79,32 pa USD 83,74 pa bari entre juli y augustus. E tarifa calcula pa coriente y awa, sinembargo, a keda mescos.

Ora cu compara e cifranan cu esunnan di aña pasa, aumento den sector di transporte ta uno cu ta sobresali. Entre augustus 2025 y augustus 2026, prijsnan den e sector a subi 10.7%. Otro sector cu a registra aumento ta restaurant y hotel cu 5.6%, otro producto y servicio cu 4.0%, cuminda y bebida sin alcohol cu 3.8% y comunicacion cu 2.1%. Operacion di cas, cu ta inclui diferente producto y ekipo pa hogar, a registra un bahada di 2.6%.

Den e canasta total di 408 producto y servicio cu ta forma e base pa CPI, mitar a bira mas caro entre juli y augustus, mientras cu 32.1% a baha di prijs y 17.9% no a cambia. Producto fisico, manera grupo, a bira 1.6% mas caro durante luna di augustus, mientras cu prijs di servicio a baha 0.9%.

Un di e puntonan cu ta hala atencion den e cifranan nobo ta e aumento den bestaansminimum, esta e nivel minimo di entrada cu, segun definicion di CBS, ta ser considera necesario pa un persona of famia por funciona den sociedad na un manera adecuado y socialmente aceptabel. E calculacion no ta representa solamente loke un persona mester pa evita privacion basico, pero ta trata di establece un nivel social minimo di existencia.

Pa un famia di dos adulto y dos mucha entre 0 y 14 aña, e bestaansminimum a subi di Afl. 5.634 na juli pa Afl. 5.663 na augustus, un diferencia di Afl. 29 den solamente un luna. Pa un adulto cu ta biba so, e suma a aumenta di Afl. 2.683 pa Afl. 2.697, esta Afl. 14 mas.

E diferencia ta bira mas cla ora compara esaki cu un aña pasa. Na augustus 2025, bestaansminimum pa un famia di dos adulto y dos mucha tabata Afl. 5.519. Un aña despues esaki ta Afl. 5.663, un aumento di Afl. 144 pa luna. Cuminda y bebida sin alcohol ta responsabel pa e parti mas grandi di e aumento, cu Afl. 86 adicional. Transporte a agrega Afl. 35, mientras cu otro producto y servicio a aumenta cu Afl. 14 y vivienda cu Afl. 10. Paña y sapato, di otro banda, a baha cu Afl. 5.

E calculacion di bestaansminimum ta basa riba e estudio di Bestaansminimum 2010 di CBS y ta ser actualisa tur luna di acuerdo cu movemento di CPI. Pa compara diferente tipo di famia, CBS ta aplica un escala: e prome adulto tin peso 1.0, cada adulto adicional di 15 aña of mas ta 0.5 y cada mucha di 0 te cu 14 aña ta 0.3. P’esey, un hogar di dos adulto y dos mucha tin un peso total di 2.1.

E cifranan ta varia considerablemente segun composicion di hogar. Na augustus, bestaansminimum tabata Afl. 2.697 pa un adulto, Afl. 3.505 pa un adulto cu un mucha, Afl. 4.045 pa dos adulto, Afl. 4.854 pa dos adulto cu un mucha y Afl. 5.663 pa dos adulto cu dos mucha. E sumanan ta representa e nivel mensual calcula pa cubri necesidadnan cu CBS ta inclui den e nivel social minimo.

Pa un adulto cu ta depende di salario minimo, CBS ta mustra un diferencia entre entrada y bestaansminimum. Na augustus 2026, bestaansminimum pa un adulto tabata Afl. 2.697, mientras cu salario minimo usa den e calculacion ta Afl. 2.007. Esaki ta resulta den un deficit di Afl. 690 prome cu tuma e reparatietoeslag na cuenta. Cu e suplemento di entrada di Afl. 175, e diferencia ta reduci na Afl. 515. Un aña prome, e deficit prome cu suplemento tabata Afl. 642. Segun CBS, e deficit di Afl. 690 ta e di dos mas halto registra pa luna di augustus den e ultimo seis aña.

Cuminda ta otro aspecto importante den desaroyo di costo di bida. Den augustus, indice combina di cuminda y servicio di catering a subi 0.3%. Cuminda cu ta ser cumpra pa consumo na cas a bira 0.5% mas caro. Di e 11 grupo di cuminda, siete a registra aumento. Riba base anual, cuminda pa cas a subi 3.8%. Pisca y otro producto di lama tabata e unico grupo principal di cuminda cu a registra un bahada durante e periodo di 12 luna, cu 3.6%.

CBS tambe ta calcula core inflation, un medida di inflacion cu no ta inclui cuminda y energia, mirando cu prijsnan den e dos categorianan aki por varia considerablemente. Na augustus 2026, e medida aki tabata 1.0% riba base di promedio di periodo. Durante e mesun comparacion, e indice di energia a aumenta 0.5% y indice di cuminda 2.0%.

Den total, e cifranan di augustus ta mustra un aumento mensual relativamente limita di 0.5%, pero cu diferencia grandi entre categoria. Aumento den combustible y transporte tin un peso importante den resultado mensual y anual, mientras cu cuminda ta sigui representa un parti importante di e aumento den bestaansminimum. Entre augustus 2025 y augustus 2026, CPI

general a subi 2.7%, mientras cu e suma calcula como minimo pa un famia di cuatro persona a aumenta cu Afl. 144 pa luna, y esun pa un adulto so a subi di Afl. 2.628 pa Afl. 2.697.