Aruba One Happy Island Lions Club (OHIL) ta invita hobennan cu ta stima arte y creatividad pa participa den e Peace Poster Contest 2026–2027 di Lions International, bao di e tema “Harmony in Humanity” — “Harmonia den Humanidad.”
E sesion di pintura lo tuma luga diasabra, 17 di october 2026, na MFA – Santa Cruz, di 9:00 AM pa 4:00 PM, cu guia di e artista local Elvis Tromp. Participacion ta gratis y lunch ta inclui. Cupo ta limita, p’esey ta recomenda pa inscribi na tempo. E competencia ta habri pa hobennan cu tin 11 pa 13 aña di edad na 15 di november 2026. OHIL ta invita mayornan, scolnan y docentenan pa anima hobennan cu talento y interes den arte pa aprovecha e oportunidad aki.
Un mensahe di paz, respet y union
E tema “Harmony in Humanity” ta invita hobennan pa imagina un mundo unda hende di diferente cultura, origen y comunidad ta biba hunto den paz. Pa medio di un poster original pinta of dibuha na man, participantenan por mustra con respet, bondad y comprension ta yuda crea un sociedad mas uni.
Cada obra por expresa un vision propio di un mundo unda nos ta celebra nos diferencianan, descubri loke nos tin en comun y trata otro cu amor y respet. E actividad ta ofrece hobennan un oportunidad pa desaroya nan creatividad y comparti un mensahe positivo cu comunidad.
E ganador local lo ricibi un premio y lo avansa pa e siguiente etapa di e competencia, cu oportunidad pa sigui te na nivel internacional.
Inscribi y laga bo creatividad papia!
E ultimo dia pa inscribi ta 14 di october 2026. Pa inscripcion of mas informacion, por manda un email na ohilclubaruba@gmail.com of contact via WhatsApp: 568-0829. Aruba One Happy Island Lions Club ta invita tur hoben artista pa participa y mustra con arte por inspira paz y harmonia den humanidad.
