Investigacion ta revela riesgo di problema cu wega di placa entre diferente grupo na Aruba

Un investigacion tocante wega di placa na Aruba ta revela cu un parti di e hungadonan ta mustra señalnan di comportacion riesgoso, particularmente entre hende homber, adulto hoben, personanan di 65 aña of mas y residentenan cu entrada financiero abao.

E estudio tambe ta identifica posibel consecuencianan financiero, social y di salud, incluyendo uzo di placa gespaar, atraso den pagamento di cuenta y stress relaciona cu wega di placa.

E resultadonan ta forma parti di un investigacion di RE-Quest Research & Consultancy, realisa riba encargo di Ministerio Hulandes di Asuntonan Interno y Relacionnan den Reino (BZK), den colaboracion cu Kansspelautoriteit Aruba, cu ta den proceso di formacion.

E estudio a inclui un encuesta entre 720 residente adulto di Aruba, complementa cu entrevista y observacionnan. E investigacion ta brinda un bista di e comportacion di hungadonan, factornan relaciona cu riesgo y consecuencianan cu wega di placa por tin pa nan mes y personanan cerca di nan.

Pa evalua e nivel di riesgo, e investigadornan a uza un version cortico di Problem Gambling Severity Index (PGSI), un herment cu ta identifica señalnan di comportacion riesgoso relaciona cu wega di placa.

E herment ta clasifica hungadonan den cuater categoria: sin problema, riesgo abao, riesgo modera y riesgo halto. Sinembargo, e investigadornan ta enfatisa cu e resultado di e evaluacion no ta representa un diagnostico medico di adiccion na wega di placa.

Entre e encuestadonan cu a participa den wega di placa durante e ultimo 12 lunanan y cu tabatin un resultado valido di PGSI, 59% a ser clasifica como hungado sin problema, mientras cu 16% a cay den e categoria di riesgo abao.

Otro 20% a ser clasifica den e categoria di riesgo modera y 5% den esun di riesgo halto. Esaki ta nifica cu, hunto, 25% di e hungadonan evalua a mustra señalnan di riesgo modera of halto.

Ora e resultadonan a ser calcula di manera indicativo pa henter poblacion adulto di Aruba, incluyendo personanan cu no a hunga durante e ultimo aña, e proporcionnan ta coresponde cu aproximadamente 10% den categoria di riesgo abao, 13% di riesgo modera y 3% di riesgo halto.

E investigadornan ta enfatisa cu e cifranan ta solamente indicativo, pasobra e participantenan no a ser scogi completamente aleatoriamente. P’esey, nan no ta representa e cantidad exacto di residente cu tin problema relaciona cu wega di placa.

E investigacion ta revela cu e nivel di riesgo no ta distribui igualmente entre diferente grupo di poblacion. Hende homber ta aparece relativamente mas frecuente den e categorianan di riesgo modera y halto compara cu hende muhe.

Tambe tin diferencia segun edad. E proporcion di hungadonan cu riesgo modera of halto ta relativamente halto entre personanan di 18 te 39 aña y entre esnan di 65 aña of mas.

E resultado aki ta mustra cu comportacion riesgoso no ta limita solamente na un grupo specifico di edad. Tanto adulto hoben como algun adulto mayor ta presenta caracteristicanan cu, segun e herment uza, por indica un nivel di riesgo mas halto.

Den caso di nivel di educacion, e investigadornan no a identifica diferencia estadisticamente significante entre e diferente gruponan.

Un di e resultadonan mas notable ta e relacion entre entrada financiero y riesgo di wega di placa. Entre e hungadonan cu un entrada neto mensual di te cu 1.000 florin, 43% a cay den e categoria di riesgo modera of halto.

Entre personanan cu un entrada neto mensual di 1.001 te 3.000 florin, e proporcion tabata 36%, mientras cu entre esnan cu ta gana 3.001 florin of mas, e cifra a baha te 18%.

E diferencia entre e gruponan di entrada a resulta estadisticamente significante. Sinembargo, e investigadornan ta señala cu no tur participante a brinda informacion valido tocante nan entrada financiero.

E analisis aki ta basa riba 317 hungado cu tabatin tanto un resultado valido di PGSI como informacion di entrada, mientras cu 133 hungado no a reporta un entrada valido. P’esey, e resultado mester ser interpreta cu cierto cuidao.

E estudio no ta determina cu entrada abao ta causa comportacion riesgoso, ni cu wega di placa necesariamente ta causa problema financiero. E resultadonan ta mustra un relacion entre e factornan, pero no ta establece cua di nan ta e causa di e otro.

Otro aspecto analisa ta e uzo di tips y entrada adicional den cash pa participa den wega di placa. Entre e hungadonan cu riesgo modera of halto, 7% a indica cu nan ta uza e placa aki frecuentemente y 20% de bes en cuando.

Entre hungadonan sin problema of cu riesgo abao, e proporcionnan tabata 2% y 13% respectivamente. E diferencia ta indica cu personanan den e categorianan di riesgo mas halto ta uza tips of entrada adicional relativamente mas frecuente pa hunga.

E investigacion tambe ta identifica diferencia entre e tiponan di wega. Casino, wega online y actividadnan di wega relaciona cu sportsbar ta aparece relativamente mas frecuente entre hungadonan cu riesgo modera of halto.

Loteria, di otro banda, ta aparece relativamente mas frecuente entre hungadonan sin problema of cu riesgo abao. Sinembargo, debi na e cantidad grandi di residente cu ta participa den loteria, e investigadornan ta considera cu e forma di wega aki tambe ta relevante den discusionnan tocante prevencion.

Segun e rapport, ta importante pa distingui entre e nivel di riesgo asocia cu un tipo di wega y e cantidad di persona cu ta participa den dje. Un actividad cu tin un nivel di riesgo relativamente mas abao por toch alcansa un grupo grandi di poblacion.

E investigacion a analisa ademas e influencia di circulo social. E resultadonan ta mustra cu tin un relacion entre participacion di personanan cercano y e posibilidad cu un residente tambe ta participa den wega di placa.

Sinembargo, entre e hungadonan cu a participa durante e ultimo aña, no a ser confirma un relacion estadisticamente significante entre e cantidad di persona cu ta hunga den nan circulo social y e nivel di riesgo PGSI.

Tocante consecuencianan, mayoria di e hungadonan no ta reporta problema relaciona cu nan propio participacion. Ora nan a ser puntra directamente, 93% a indica cu wega di placa no ta causa problema den nan bida.

No obstante, e situacion ta diferente entre hungadonan clasifica den e categorianan di riesgo modera y halto. Den e grupo aki, 14% a reporta problema financiero, mientras cu 8% a menciona problema mental of fisico y 2% problema social.

Ora e investigadornan a haci preguntanan mas specifico tocante consecuencianan, otro dificultadnan a bin dilanti. Entre e hungadonan cu riesgo moderado of halto, 17% a indica cu nan a uza placa cu nan spaar pa hunga.

Ademas, 13% a reporta cu nan ta paga cuenta laat. Otro consecuencianan menciona ta inclui lamenta despues di hunga, menos ora di soño, stress y dificultadnan den relacionnan personal of funcionamento diario.

E resultadonan ta indica cu e consecuencianan no necesariamente ta limita na e hungado mes. Problemanan financiero y otro dificultadnan por afecta partner, familiar y amigo, particularmente ora e comportacion di wega ta influencia e situacion economico di un hogar.

Segun e entrevistanan realisa, participacion den wega di placa generalmente no ta ser considera automaticamente manera un problema. E preocupacion ta aumenta principalmente ora un persona ta perde control riba su comportacion of ora e actividad ta cuminsa afecta su finanzas, relacionnan, salud of responsabilidadnan diario.

E diferencia aki por contribui na cu algun consecuencia no ta ser reconoci inmediatamente manera un problema relaciona cu wega di placa.

E estudio tambe a analisa con residentenan ta mira e actividad na nivel general. Un 62% di e respondentenan ta di acuerdo cu, riba termino largo, hende ta perde mas placa cu nan ta gana cu wega di placa .

Un 53% ta considera wega di placa un mal custumber, mientras cu 38% ta mir’e manera un forma di diberticion. Otro 21% ta considera e actividad como un manera pa trata di mehora nan situacion financiero.

A pesar di e diferente opinionnan, 62% di e encuestadonan ta considera wega di placa un problema serio pa Aruba. E preocupacion aki tambe ta presente entre un parti di e personanan cu nan mes ta participa den e actividad.

E investigacion ta mustra cu, aunke mayoria di e hungadonan no ta reporta problema, tin gruponan cu ta presenta señalnan di riesgo y consecuencianan concreto. E resultadonan ta brinda informacion importante pa compronde e diferencia entre participacion recreativo y comportacion cu por afecta stabilidad financiero, salud y relacionnan personal.

E rapport ta sirbi manera un base pa evalua e riesgonan relaciona cu wega di placa na Aruba y pa considera con medidanan di prevencion y proteccion por ser adapta na e necesidadnan di diferente grupo di poblacion.