Ministerio Publico (OM) ta exigi un castigo di 15 aña di prison contra Adrian Faña, acusa di a kita bida di su tanta, Luz Divina Faña, dia 2 di november 2025. Durante tratamento di e caso den Corte di Prome Instancia, e acusado a admiti cu el a mata su tanta, pero a declara cu durante hopi aña el a sufri abuso sexual y maltrato den e hogar.

E audiencia a revela detayenan tocante e morto, e comportacion di e acusado despues di e hecho y e conclusionnan di evaluacionnan psicologico y psikiatrico. Segun OM, tin suficiente prueba pa homicidio, pero no pa asesinato cu premeditacion.

Durante e audiencia, Corte a examina resultado di investigacion policial, declaracionnan di testigo y rapportnan di diferente experto. Miembronan di famia di e victima tabata presente den sala, mientras cu otro tabata sigui e audiencia via video call.

Segun informacion presenta den Corte, e acusado tabata biba cu su tanta desde edad di aproximadamente 12 aña. Luz Divina Faña, kende tabata traha pa aproximadamente 30 aña na Chalet Suisse, tabatin un papel importante den sosten financiero y emocional di su famia.

E ultimo dia di trabao di e victima tabata 1 di november 2025. Dia siguiente, su hefe a ricibi un mensahe di texto supuestamente manda door di dje, informando cu su mama a sufri un accidente na Republica Dominicana y cu e mester a biaha urgentemente.

E acusado a pidi tambe un adelanto di salario di Afl. 4.000 y un prestamo adicional di Afl. 2.500 na nomber di su tanta.

E mensahe a lanta sospecha cerca e hefe, particularmente pasobra e victima normalmente tabata comunica mediante mensahe di voz. Despues di contacto cu polis, autoridadnan a bay na e propiedad, caminda nan a descubri e curpa di e victima den un freezer. Investigacion forensico a determina cu el a ricibi 33 hincamento cu cuchiu den pecho, lomba, cabes y mannan.

Durante su declaracion, e acusado a splica cu e mainta di 2 di november un discusion a surgi entre e y su tanta. Segun su version, prome cu e discusion su tanta a oblig’e pa tene relacion sexual cune. Despues di esaki el a bay cushina, a coy un cuchiu pa pela un apelsina y despues a bay sinta den sala pa wak television.

E acusado a sigui conta cu un discusion a cuminsa tocante un headphone cu el a perde. Segun e, nan tabata discuti frecuentemente. Durante e confrontacion el a lanta y a acerca su tanta, pero a declara cu desde e momento ey tur cos a bira scur y e no por corda exactamente kico a sucede.

El a splica cu ora el a bin bij, el a ripara cu su tanta tabata morto. E no tabata corda cuanto biaha el a hink’e. Ora hues a puntr’e pakico el a actua di e manera ey, el a indica cu posiblemente e supuesto maltrato y abuso di hopi aña a acumula te cu e no por a soporta e situacion mas.

Despues di e hecho, e acusado a cuminsa busca video riba internet pa haya informacion tocante con pa conserva un curpa sin cu esaki ta descompone. Segun su declaracion, mediante e videonan el a haya e idea pa pone e curpa den un freezer. El a kita e paña di e victima y a pone e curpa aden. Tambe el a considera corta e curpa den pida y a busca un zaagmachine, pero na final e no a haci esaki.

Durante e mesun periodo, e acusado a busca manera pa haya placa y bandona Aruba. Investigacion a revela cu el a purba huur e cas y a considera bende e auto di e victima, aunke e auto no a ser bendi.

Un testigo cu tabata huur un apartamento riba e propiedad a declara cu dia 1 di november el a tende discusionnan fuerte entre e acusado y e victima, incluyendo un momento caminda e acusado supuestamente a exigi su placa. E acusado a confirma cu su salario tabata drenta riba cuenta di banco di su tanta, pero a rechasa cu un conflicto financiero tabata motibo di e matamento.

Dia 4 di november, e acusado a cumpra un pasashi pa Republica Dominicana y dia 7 di november el a bandona Aruba via Panama. Durante su estadia na Republica Dominicana, el a cuminsa experimenta problema pa drumi y concentra despues cu noticia di e morto a bira publico. Finalmente, despues di mira un entrevista den cual su famia tabata pidi’e pa entrega su mes, el a busca asistencia di un abogado y a entrega su mes na autoridadnan.

Un parti importante di e audiencia a concentra riba e alegacionnan di abuso sexual. Segun e acusado, e situacion a cuminsa ora e tabatin aproximadamente 14 aña. Segun el a splica, prome el a cuminsa di manera verbal ora su tanta tabata splik’e con pa tene relacion sexual. Despues, segun e, e abuso a bira fisico y su tanta tabata exigi’e pa drumi cune.

El a declara cu e contacto sexual no tabata boluntario di su banda y cu e tabata sinti obliga pa obedece, considerando su dependencia financiero y e posibilidad di perde su vivienda. Segun su declaracion, e supuesto abuso tabata sucede aproximadamente un biaha pa siman of cada dos siman.

Investigacion forensico a confirma cu tabatin contacto sexual entre e acusado y e victima, pero no por a determina si e contacto tabata boluntario of forsa. Inicialmente e no tabata dispuesto pa papia tocante e supuesto abuso debi na miedo y berguensa. Te durante su di cuater interogacion cu recherche el a conta e alegacionnan aki.

Tocante su situacion personal, e acusado a declara cu e tabata depende fuertemente di su tanta y no tabatin suficiente recurso financiero pa muda. Su intencion tabata spaar placa pa eventualmente bandona Aruba. El a indica tambe cu su tanta tabata limita su libertad pa mantene relacion sentimental.

Corte a examina diferente rapport psicologico, psikiatrico y di reclassering. E evaluacionnan ta describi un infancia traumatico, problema familiar, dificultad pa maneha stress y trastorno di personalidad. Tambe a identifica caracteristicanan relaciona cu spectrum di autismo.

Segun e conclusionnan presenta, e acusado tin responsabilidad penal reduci como consecuencia di su condicion psicologico. E expertonan ta considera tratamento importante pa su eventual reintegracion den comunidad. Hues tambe a expresa preocupacion tocante falta di sosten familiar despues di cumpli su castigo.

Durante e audiencia, un subrina di e victima a presenta un declaracion emocional na nomber di e famia. El a describi e victima manera un persona responsabel, trahado y importante pa su sernan stima. Segun e, e victima tabata sostene su mama financieramente y contribui na educacion di su sobrina.

E sobrina a rechasa e alegacionnan di e acusado tocante e victima y a expresa cu e matamento a causa un trauma profundo den e famia. E famia a presenta un demanda di compensacion pa daño material y inmaterial di Afl. 69.000.

E famia tambe a pidi Corte pa e acusado no por hereda e pertenencianan di e victima. Segun informacion presenta den Corte, e acusado ta yiu biologico di un ruman di e victima, pero Luz Divina a adopt’e y registr’e legalmente como su propio yiu.

OM a cualifica e caso como sumamente serio y a indica cu e hecho a afecta comunidad di Aruba profundamente. Segun fiscal, tin suficiente prueba pa establece cu e acusado a kita bida di su tanta, pero no pa conclui cu el a planea e matamento di antemano.

Fiscal a señala cu, aunke e acusado a realisa diferente accion pa sconde e morto y despues a bandona Aruba, esaki no ta suficiente pa comproba premeditacion. A pesar di e conclusionnan psicologico tocante responsabilidad reduci, OM ta considera cu e acusado tabatin capacidad pa actua deliberadamente despues di e hecho.

Considerando e gravedad di e delito y e circunstancianan presenta, Ministerio Publico a exigi 15 aña di prison. Fiscal a bay di acuerdo cu un parti di e demanda di compensacion di e famia, pero no pa tur e gastonan reclama, incluyendo cierto gasto relaciona cu construccion di un cas na Republica Dominicana.

Defensa di e acusado a pidi Corte pa considera e pasado traumatico di e acusado, su dependencia familiar, condicion psicologico y e alegacionnan di abuso sexual. E abogado a enfatisa cu e rapportnan profesional ta identifica dificultadnan importante cu mester ser considera durante determinacion di castigo.

Defensa a pidi Corte tambe pa considera posibilidad di aplica derecho penal hubenil en bes di castiga e acusado segun e sistema penal pa adulto. Ademas, defensa a cuestiona diferente parti di e demanda di compensacion presenta door di e famia.

E acusado a declara cu e no ta nenga su responsabilidad pa e morto di su tanta. El a indica cu el a entrega su mes na autoridadnan pasobra e ta consciente di loke el a haci y ta dispuesto pa acepta su castigo.

Corte lo evalua e pruebanan, declaracionnan y conclusionnan di e expertonan pa determina e responsabilidad penal y e castigo apropia. E sentencia ta programa pa 4 di december 2026.