Analisis

Cu hopi fanfaria gobierno di Nicaragua a anuncia mas di dos aña pasa un acuerdo cu un compania Chines pa construccion di un canal cu lo conecta Atlantico cu Pacifico. Esaki naturalmente pa probecha e congestion den e ruta mas importante di transporte maritimo na mundo, e canal di Panama. China, un di e clientenan grandi den e transporte di mercancia pa costa oriental di Merca y Europa, lo tabata mira perspectiva den gasta por lo menos 50.000 miyon dollar riba e proyecto cu lo entrega un canal di mas di dos biaha mas largo cu esun di Panama, cu su consecuencianan tambe pa poblacion, medio ambiente, etc. Pero di cual tabata spera beneficio grandi tambe den e comercio alrededor di e maneho di fluho di carga na un volumen impresionante. Actualmente, ainda no a sucede nada, salvo cu e disputanan di tereno di e poblacion cu mester hala un banda pa e proyecto aki, ta cuminsa bira mas grave.

Den e analisis aki, primeramente parti di un articulo cu a sali publica den e corant Spaño El Pais, tocante e lucha interno na Nicaragua di e contrincantenan di e proyecto, cu talbes no ta ni bay tuma luga mes. Despues un analisis cortico di Bon Dia tocante e posibel consecuencianan pa region di Caribe, si e mega proyecto aki no bira realidad.

Cu of sin canal, e cunukero ta keda sin tera?
December pasa a cumpli dos aña cu a inaugura e inicio di e construccion di e canal grandi inter-oceanico di Nicaragua. Pero na luga di mashin y cantidad di obrero, un par di baca ta cana riba e caminda di seis kilometro cu tabata e prome y unico avance di e gran obra, converti den un trottoir yen di lodo.

Pero e movemento cunukero cu a surgi como protesta contra e construccion di e mega obra aki, ta continua manifestando nan mes contra e proyecto. Dia 30 di november2017 e marcha contra e canal organisa pa e Conseho Nacional di Defensa di Tera, e Lago y Soberania a keda reprimi, cu bala di berdad y di rubber, pa polis Nicaragueño. E saldo: shete herido y 20 persona desapareci. E stancamento di e construccion di e canal no ta amortigua e furia di e cunukeronan, sino todo lo contrario. Pa nan e situacion ta prueba di loke nan tabata denuncia: “E canal ta un cortina di huma, loke nan kier ta nos terenonan.”

E ley tras di e canal
Na 2013 gobierno di Nicaragua a entrega e concesion pa construccion di un canal inter-oceanico na e empresa priva Chines HKND, dirigi pa e empresario Wang Jing, mediante aprobacion di e ley 840, tambe conoci como ley Canalera: un concesion otorga sin realisa un licitacion internacional, exonera di tur tipo di tributacion, exclusivo pa 50 aña y prolongabel pa otro 50 pa e desaroyo di e canal, y shete otro sub proyecto manera puerto, zona di comercio, un oleoducto y un aeropuerto, entre otro. Ademas e posibilidad di construi cualkier otro infrastructura cu e inversionista considera necesario. Pa esey, cualkier propiedad sea priva, comunal, indigena o publico, na cualkier parti di e pais, cu ta rekeri pa e construccion di henter e proyecto o parti di esaki, lo ser expropia, afectando mas di 100.000 famia.

Pero e obra, cu gobierno y empresa ta califica como “esun mas grandi construi te awor na mundo”, no a tarda pa keda na duda, ora a revela su inviabilidad economico. A pesar di esey,e ley di e canal tabata aproba caba. Un ley cu ta kita e cunukero Nicaragueño su soño.

E abogado Monica Lopez, director di e fundacion pa promocion y desaroyo municipal popolna, cu ta asesora legalmente e movemento, ta splica cu “esaki ta un monton di excuus pa haya propiedad di e teritorio.” Segun e ley 840, si e empresa no materialisa e canal, e concesion no ta vence, ya cu e inversionista ta permiti pa realisa di igual manera e sub proyectonan. Den otro palabra, ‘e concesionario por desaroya sub proyecto di manera ilimita, loke ta permiti expropia tereno di manera indiscrimina pagando e tera na prijs catastral’, Carlos Fernando Chamorro, director di e revista Confidencial, di gran influencia na Centro America, ta sigura.

‘Ortega vende patria’, e pancartanan di e marchanan organisa pa e Movemento di cunukero ta bisa, y ta exigi e derogacion di e ley, cual nan ta acusa di pone soberania di Nicaragua na peligro.

Y e concesion ta stipula cu gobierno ta renuncia cualkier derecho di inmunidad soberano comprometiendo su mes pa efectua un reforma di Constitucion pa garantisa tal renuncia. Y cu den cualkier ‘evento desestabilisador’ cu por impedi e desaroyo normal di e proyecto o di cualkier di e sub proyectonan, gobierno lo mester indemnisa e inversionista. Pa garantisa esaki ‘e presupuesto anual di e aña, cu na e momento ey ta den curso, lo mester inclui tal gastonan a traves di enmienda o cualkier otro forma’. Di e manera aki, segun Monica Lopez, e concesion ‘ta constitui un tipo di cheque blanco den cual gobierno a laga como garantia e reservanan di tesoro di Nicaragua’.

“Esey ta e percepcion di un grupo aki cu tin cierto afinidad politico,” e presidente di e Hunta Gubernamental di e Gran Canal, Manuel Coronel Kautz ta opina. “Pasobra bo ta lesa e concesion y compar’e cu cualkier otro areglo manera esun di Canal di Panama, por ehemplo, y esaki ta di tal manera cu aki 50 aña nos ta bay ta doño di 51% di e total di e obra. Asina e Canal di Panama no ta, unda pa yega na esey a tuma nan 100 aña.”

Di otro banda, pa loke ta concerni e inversionista, esaki lo no ta suheto na accion penal pa incumplimento di e obligacionnan adkiri, ya cu no por aplica ley nacional riba den su caso. Di tur manera, e responsabilidad legal di e inversionista ta perde den un bruhacion di 15 sociedad cu ta tras di HKND, y cu ta administra e proyecto di canal. E informacion tocante ken ta e accionistanan di e empresanan ey ta keda den nubia, cu consecuencia cu e pregunta ta na ken e derechonan ey a ser duna ta keda ainda sin respuesta.

Por ultimo, e ley ta establece cu no lo por aplica e controlnan di e super intendencia di banco na e administracion financiero di e proyecto, y e inversionista por propone na e presidente ley nobo o modificacion di esunnan existente pa garantisa su exito.

Tur esey a haci cu cu a surgi e indignacion di e movemento cunukero cu, canal o sin canal, ta continua persistente. Indignacion cu den palabra di Manuel Coronel Kautz, ‘tabata un constante y lo sigui asina…. pasobra ta logico cu si e personanan ey scucha cu ta bay afecta nan modo di biba, nan ta reacciona’. “E tereno ta keda Nicaragueño. Tur eynan ta bao di leynan Nicaragueño y tur loke ta e ambito di soberania ta totalmente cla y defini,” e ta añadi.

Desde reeleccion di Daniel Ortega na 2006, diferente movemento contestatario a surgi den e teritorio nacional y e Nicaragueñonan ta di acuerdo cu e movemento cunukero di lucha contra e canal, ta esun mas representativo di tur e batayanan ey.

E discurso di apoyo na e pobernan riba cual Ortega ta mantene su popularidad “pa prome biaha ta enfrenta, di forma directo, pa militante di e mesun Frente Sandinista di Liberacion Nacional (FSLN) entre nan e cunukeronan aki,” e sociologo Manuel Ortega, ex-asesor presidencial di Frente Sandinista den decada di ochenta, ta relata.

Pa e protagonistanan di movemento anti gobierno aki, e proyecto di e canal ta un atake personal, riba nan bienes, nan modo di biba y tambe nan ideologia. “Nos ta sinti nos traiciona,” Medardo Mairena, cunukero y vice coordinador di e Conseho Nacional di Defensa di Tera, e Lago y Soberania, ta bisa. “Hende ta sinti nan mes sandinista, pero e Frente no ta responde pa e promesanan cu nan a haci y mas bien ta kitando di nan loke a costa nan pa haya.”

A pesar di esey, e Frente Sandinista ta continua gosando di gran popularidad principalmente den e ciudadnan. E demandanan di e cunukeronan, menasa di perde tur cos, no ta resona den e zonanan urbano.

Sin embargo, e aumento di e autoritarismo di estado, e debilidad di oposicion politico y e presion di e movementonan social tin hopi hende preocupa. Nan tin miedo cu e falta di alternativa pa e caminda civico por habri porta pa situacionnan di violencia, un etapa nobo di instabilidad, ingobernabel, polarisacion y conflicto.

Caribe sin dos canal entre Atlantico y pacifico: Lamento o oportunidad?
E proyecto di e canal di mas di 200 kilometro a traves di Nicaragua ya a cuminsa parce un soño remoto, pa otronan un pasadia. E probabilidad di cu no ta continua cu e proyecto, pa su retonan tecnico y financiero caba, mas e resistencia di e poblacion, ta birando cada biaha mas grandi. Y cu consecuencia grandi pa e region di Caribe.

Importante ta e consideracion di China pa busca un ruta nobo pa crusa e continente Mericano. Nan ta pensa, y no ta e uniconan, cu si e canal di Panama keda e unico ruta cortico pa conecta Asia cu costa oriental Mericano y Europa, e congestion na Panama, no solamente di pasa den e canal, sino tambe di haya espacio pa transshipment di container, den e decadanan cu ta bin ta bira un desbentaha grandi. Si e movemento planea pa tuma luga den e proximo decadanan na Nicaragua, mester bay otro luga, unda anto? Actualmente caba China a opta pa busca alternativa pa maneha nan carga pa diferente ruta despues di pasa Panama. Un di nan ta e acuerdo cu Jamaica, unda e container port na Kingston ta birando un di e competidonan grandi di e region. Pero tambe otro pais den nos region a dicidi di drenta den e competencia aki: Freeport (Bahamas), Republica Dominicana, Cuba y Curaçao. Tambe tin naturalmente e puertonan riba continente manera Cartagena, Colombia.

Y Aruba? Kico ta nos opcionnan? Dificil pa bisa, pa e banda comercial sigur, pasobra esey ta exigi un estudio serio, segun e logica di e negoshi di transporte di container mes. Nos no ta na altura di estudionan haci den e direccion aki. Pa loke ta e otro aspecto, e presencia di facilidad apto pa ricibi container carrier grandi, cu bista pa futuro di e mega carriernan cu ta exigi puerto di cierto profundidad grandi y facilidad pa maniobra, Aruba tin den e region aki probablemente un di e miho opcionnan, y esey ta San Nicolas.

Concretamente nos no ta papiando aki di e haf actual di San Nicolas, pero di e casi 2 km di costa entre e facilidad di terminal di crudo, y e haf di San Nicolas mes. Na canto mes e awa ta por lo menos 42 pia hundo y atraca ta facil pasobra e ta na entrada di e bahia di San Nicolas. En principio por crea facilidad pa tres o cuatro carrier grandi mara na mes momento. Den un presentacion di Camara di Comercio na 2013 den e seminario ‘Aruba without the refinery’ tabatin un analisis extenso di esaki. Ademas, e parti di e tereno aki no ta den uzo pa e refineria, y posiblemente, cu re-ubicacion di tuberia, por ser recupera sin mester warda e refineria finalmente disparce.

Atrobe, nos no ta bisa cu esaki ta algo cu ta ya caba factibel, mira di diferente angulo, pero ya cu nos ta den buskeda di alternativa, pakico no explora esaki?