Algun siman pasa a publica tocante e tairanan benta cu por ocasiona criadero di sangura. E biaha aki a papia cu Bureau City Inspector pa e duna detaye tocante e asunto aki y con ta trata cune.
Robby Rosel, relacionista publico di Bureau City Inspector a splica cu problema di auto bandona ta serio pa motibo cu ta por trece mas sushi y azeta rond di Aruba y sin lubida e criaderonan di sangura, cu por conduci na malesa manera Dengue, Zika y Chicungunya.
Manera a menciona di departamento di GKMB, e problema di taira cu ta keda benta pafo, ademas di contribui na sushedad tambe por conduci na malesa. Pa motibo cu si un taira no ta deshaci na un forma corecto, awa ta yena den e taira y aki ta forma criadero. Pues ideal ta pa e tairanan no keda den un cas of den tereno di nan mesun negoshi.
GKMB ta bisa cu pa basta tempo ta trahando pa tin personal cu por duna boet. Sinembargo tin algun cos cu mester traha riba dje pa nan por tene e situacion miho. Nan por traha den conexion cu otro departamento, por ehempel polis den bario, of Bureau City Inspector pa bay na cas bandona of tereno cu tin sushi y haci esakinan limpi.
Rosel ta duna di conoce cu dia 21 di november 2019 a sali cu accion grandi conhuntamente cu KPA, DIP y Salubridad publico y nan departamento, caminda nan a bay controla tur garage ilegal cu tin na Aruba y tambe esnan cu ta parkeer auto bieu na e garage aki; cu ta usa tereno di gobierno cu ta huurgrond.
E ta bisa cu no por haci negoshi riba e terenonan, agregando cu esey ta cay pa DIP, pero por bisa cu DIP a haci su parti di trabou y Bureau City Inpesctor a cuminsa manda carta pa garashi ilegal cu tabata situa na Paradera, Babijn y Seroe Patrishi, tambe na Prikichi banda di caminda pa Natural Bridge.
Tambe el a bisa banda di Simon Antonio, e lorada pariba di aeropuerto. Eynan nan a haci entrega di carta. Nan a duna un siman pa haci e cambio. Pa dia 28 di november, nan a presenta na cada un di nan y a ripara cu situacion a keda mescos, pues ‘no a tuma nos na serio y nos a manda pa ultimo aviso’.
Nan a duna algun dia mas pa asina si ripara cu no a tuma accion, nan departamento conhuntamente cu takelwagen , DIP y KPA yega y kita tur auto cu ta para ilegalmente y asina elimina tur esaki, ‘mirando cu no ta un luga pa pone auto bieu para’.
Pa añanan largo nan a suplica pa no tin garage ilegal. Pa cuminsa nan ta duna algun dia pa kita esey si no, automaticamente lo tuma tur auto den nan poder pa elimina locual tin riba e tereno.
Bureau City Inpsector ta bisa cu nan a habri aña cuminsando cu kita diferente auto bieu riba caminda publico. Ya caba algun siman atras a kita 4 auto cu takelwagen y lo sigui cu e trabou. “No lubida cu tin auto gewoon para riba bloki of auto cu no ta sirbi; nos ta elimina esaki.”
E ta aclaria cu mester tene na cuenta si tin auto canto caminda, anto nan tin plachi number pa aña largo of luna, nan por ripara cu e auto ta core, no ta keda na nan Bureau pa kita esey. Esey ta e trabou di KPA.
Rosel ta splica cu si persona yama pa laga sa di e autonan aki, nan di Bureau lo dirigi cu KPA, ‘nos lo bisa cu esey ta trabou di polis’. E auto cu no ta core y ta bandona ta cay bou di BCI: esnan cu no ta den servicio, no tin plachi number, cu no ta core y auto sin taira y bieu.
E departamento ta duna di conoce cu cuerpo policial por duna informacion robes. “Nan ta bisa nan pa manda nos pa autonan cu ta mal staciona, pero esey no ta cay bou di nos sino bureau KPA.”
Nan lo tin mas accion y sigui manda carta pa asina hende haci lo corecto y mantene Aruba limpi ‘mas tanto cu ta posibel’. Nan ta consciente cu tin bario of caya cu tin auto bandona, lo tin mas accion y tambe lo ta mas severo riba caminda pa controla e parti di limpiesa. Pa locual ta trata e auto bieu staciona y sigur tur locual ta trata e parti di nan limpiesa, ‘pa sigui yuda pueblo di Aruba’.
“Nos ta mantene e bario limpi pa asina por tin un ambiente saludabel y bunita pa nos tur disfruta di un atmosfera mas limpi. Pa cualkier persona cu kier comunica cu tin keho, of bisa cu tin auto cu no ta core mas, por comunica cu nos”, Rosel ta splica.
Si nan tin auto cu no ta den servicio, Bureau City Inspector por retira esey gratis, por comunica via Facebook, sin gasto nan por yama na 582-9777 y automaticamente nan tin takelwagen cu ta busca auto bieu y deposita na otro luga cu por usa e hero bieu.
