(AP) — E shinishi di Winter e delfin a bolbe lama ayera, alrededor di dos luna despues cu e mamifero marino famoso di pelicula a fayece na un aquarium na Florida.
Miembronan di personal di Clearwater Marine Aquarium a lansa un urna di salo di lama Himalayo conteniendo e shinishi di Winter den Golfo di Mexico for di parti patras di un barco di wardacosta Mericano.
“Por libera Winter den su cas natural tabata e miho sentimento na mundo”, Kelly Martin, vicepresidente di cuido animal na e aquarium, a bisa den un declaracion. “Nos meta na Clearwater Marine Aquarium semper ta pa rehabilita bida marino rescata pa asina nan por bolbe ta salvahe. Den caso di Winter manera ta e caso di tur animal cu no por libera, desafortunadamente e no por a completa su regreso na naturalesa durante su bida. Pero awe, nos por a dun’e e stap final ey – un regreso na cas.”
Winter a fayece dia 11 di november cu 16 aña di edad, di un problema intestinal inoperable. E delfin a keda rescata na december 2005 na Costa Oriental di Florida despues cu su rabo a keda pega den un trampa pa cangreu y mester a keda amputa.
E storia inspirador di recuperacion di Winter usando un rabo prostetico sin precedente tabata suheto di e dos pelicula Dolphin Tale na 2011 y 2014, haciendo e criatura un heroe di hende cu discapacidad y malesanan terminal rond mundo.
Un vuelo di C-13 di wardacosta Mericano a cuminsa e ceremonia riba lama, sigui pa lesamento di un poema, trahadornan di e aquarium a bisa. Martin y veterinario Dr. Shelly Marquardt a basha e shinishi. A lansa flornan, rosa y orkidea den e Golfo, y e team a lansa burbuha, honrando un di e actividadnan dibertido faborito di winter.
Clearwater Marine Aquarium ta bay continua honrando legado di Winter cu un monumento na e sitio, experiencianan di realidad virtual, y un donacion pa salvaguardia sosten indefinido pa e aquarium.
