Ayera e Bureau City Inspector conhuntamente cu Luna Foundation a bay atende un caso di negligencia di un cacho. E cacho cu a wordo batisa cu e nomber ‘Amazon’ pa esnan cu a bay rescate, no tabata tin otro alternativa pe cu pone ‘drumi’. E cacho tabata tin doño.
Manera cu por wak den e potretnan, e cacho tabata full cubri den sarna, carpata y bichi. Segun esnan presente, no por a mishi cu ne niun caminda sin cu e cacho tabata yora di dolor. Kenny Montero di City Inspector a splica cu despues di a transporta Amazon pa e veterinario di Animal Care Clinic, a constata cu e cacho entre otro tabata sufri di deshydratacion severo. “Na nos yegada e pober animal a bebe tres bowl di awa, cria via syringe”, sr. Montero a splica via Facebook.
Segun sr. Montero a expresa, nan no ta tolera abuso di bestia y pues a bay over na duna un boet na e doño di e cacho. Cuanto e boet aki ta, no ta conoci pa nos redaccion. Algun di e palabranan cu sr. Montero a expresa tabata: “Unico consuelo, ta cu e ultimo ora di su bida, e tabata rondona di personanan cu ta care p’e y el a haya un tiki caricia y cariño, e no a bay di e mundo aki su so. R.I.P. Amazon.”
Nota di redaccion: Como redaccion no ta nos custumber pa expresa nos opinion den un articulo, como cu esaki ta contra di nos maneho. Na mes momento como un medio di comunicacion nos kier a haci un yamada na pueblo en general pa sea consciente cu animalnan tambe tin sentimento y no merece e tipo di maltrato aki. Si bo no por cuida un animal, no busca un. Si bo situacion a cambia y no por sigui cuida e bestia, pone pa adoptacion of busca un instancia cu por bay cu ne y dun’e otro hogar.
