Te ainda polis no a ricibi e tip di oro cu por yuda detene e sospechoso ‘Yellow’ den e caso di tiramento di 2 bouncer di Olde Molen, di locual uno a fayece. “Esaki a conduci cu Ministerio di Husticia, Ministerio Publico y Cuerpo Policial Aruba a opta pa redobla e recompensa di 5 mil florin y haci’e awor un suma mas atractivo, esta di 10 mil florin”, segun un comunicado di polis:
“Husticia ta investigando e caso di asesinato y tiramento cu a sosode dialuna marduga dia 7 di december ultimo, pa cual polis ta buscando e sospechoso principal den e caso aki, esta e homber Milanchelo Nelson Antonio Trenidad, alias “Yellow”. E ta naci na Boneiro dia 7 di mei 1985 y ta biba na Cayenastraat # 20 na Aruba. Ta acusa e sospechoso aki di e viola articulo 2:262 c.q. 2:259 di e “Wetboek van Strafrecht van Aruba” y articulo 3 di e “Vuurwapenverordening”.
Ministerio Publico ta pidi comunidad, cualkier persona cu por sa algo di su paradero, pa informa Polis mesora yamando e tipline na 11141. Ta bon pa splica cu pa por bini na remarca pa ricibi e recompensa, mester yama na e tipline 11141 y laga bo nomber, fam y number di telefon cu por yama bo bek. Polis ta garantisa cu e nomber di e informante ta keda anonimo y si Polis gara e sospechoso, ta paga. Si e tip ta bon pero no logra gara e sospechoso, lo no duna recompensa tampoco. Esunnan cu no ta interesa pa cobra e recompensa, no mester laga nomber atras e ora.”
