Un muhe cu a ricibi un vacuna experimental pa coronavirus a desaroya sintomanan neurologico severo cu a obliga pa pausa e estudio, un vocero pa e fabricante di remedi AstraZeneca a bisa diahuebs.
E participante den e estudio di etapa avansa a reporta sintomanan consistente cu ‘transverse myelitis’, un inflamacion inusual di columna vertebral, segun vocero di e compania, Matthew Kent. “Nos no sa si e ta (transverse myelitis)”, Kent a bisa. “Ta realisando mas test actualmente como parti di e siguimento.”
Diamars, AstraZeneca a bisa cu su ‘proceso di revision standard a ocasiona un pausa di vacunacion pa permiti un revision di datonan di seguridad’. No a duna ningun detaye otro cu bisa cu un participante a experimenta un ‘malesa inexplicabel’. Universidad di Oxford a desaroya e vacuna inicialmente despues cu e pandemia a cuminsa e aña aki.
Kent a bisa cu un comite independiente tabata revisando e datonan di seguridad di e estudio prome cu dicidi si e investigacion mester continua, y na ki momento.
Anteriormente a stop e estudio na juli pa varios dia, despues cu un participante cu a ricibi e vacuna a desaroya sintoma neurologico; a resulta cu tabata un caso no diagnostica di sclerosis multiple cu no tabata relaciona cu e vacuna.
Luna pasa, AstraZeneca a cuminsa recluta 30mil persona na Merca pa su estudio mas grandi di e vacuna. Tambe ta test e vacuna den miles di persona na Reino Uni, den estudionan mas chikito na Brazil y Sur Africa. Varios otro candidato pa vacuna di Covid-19 ta den desaroyo.
Dr. Soumya Swaminathan, hefe cientifico di Organisacion Mundial di Salud (WHO) a bisa cu e agencia di Salud di Nacionnan Uni no tabata demasiado preocupa pa e pausa den e estudio di e vacuna di Oxford y AstraZeneca, describiendo esaki como un ‘wake-up call’ na comunidad global tocante e ‘ups-and-downs’ inevitabel di investigacion medico.
Pausanan temporal den estudionan medico grandi no ta inusual, y investigacion di cualkier reaccion serio of inespera ta un parti obligatorio di test di seguridad. AstraZeneca a destaca cu ta posibel cu e problema ta un coincidencia; malesa di tur sorto por desaroya durante estudionan di miles di persona.
