Manera tabata di spera, nos Prome Ministro ta na Hulanda pa den e dianan aki atende e asuntonan di Aruba pa loke ta e situacion financiero gubernamental y loke por remedia ainda den e relacion cu Hulanda. Den esaki tur atencion ta bay na e posibilidad cu Aruba ta haya un ‘instruccion’ pa inclui e gastonan di e Plan di Crisis Social den presupuesto 2019.

Nos por a scucha di banda di e mandatario den rueda di prensa cu gobierno di Aruba ta dispuesto pa hinca e gastonan pa 2020 den presupuesto. Pero no ta sigur cu Hulanda lo bay di acuerdo cu esey. Pasobra esey lo implica cu pa 2019 Aruba no ta cumpli y ta haci extra gasto pafo di presupuesto pa cual tambe lo mester busca cobertura, o cu por aumenta debe. No mester keda straña si Hulanda insisti cu ta cumpli, no pa e diferencia financiero so, sino mas bien pa mustra gobierno di Aruba cu ta necesario pa tuma conseho na serio y no keda henter aña ta busca modo di evadi e tema.

Sin embargo, con cu e asunto di e aanwijzing keda, tin otro asunto cu tambe lo subi mesa na Den Haag, di cual gobierno no ta bisando nada. Y ta trata di un tema cu ta hopi mas grandi y general di alcance cu e aanwijzing incidental aki. Esey ta e tema di con continua cu e supervision financiero, cu tanto Hulanda y gobierno di Aruba ta haya importante. Ta p’esey a firma e protocol, awor un aña pasa, unda a acorda tambe cu ta duna e acuerdo ey un base legal solido. Y ta aki ta unda di banda di Aruba e fayonan mas grandi a tuma luga. A cuminsa un campaña contra Hulanda entre e parlamentarionan di e partido mas grandi di e coalicion, cu a tuma como tarea pa ‘eclipse’ Reino Hulandes for di e ley di Aruba cu ta goberna e supervision financiero. Un campaña cu no tabata cuadra den nada cu e bon ambiente cu tabata reina despues di firma e protocol, cu tabata mustra manera un bon inicio pa e gobierno aki en berdad cuminsa pone orden den e asuntonan financiero di e pais aki.

Manera nos a yega di trece dilanti na varios ocasion, e intentonan pa reforma e ley completamente pa elimina e supervision Hulandes y crea un supervision di Aruba mes, cu conservacion di e organo di supervision y asesoria CAft, lo no a logra nan meta. Y esaki pasobra e supervision no ta di Aruba, sino di Reino. Ta e gobierno local di e momento ey, na 2014 – 2015, a causa cu Hulanda a yega na e conclusion cu ta basta y cu ta impone supervision riba gobierno di Aruba, pa evita cu e pais ta sigui bay rumbo pa abismo. Den e consideracion ey no ta asina importante si Aruba ‘ta bay costa Hulanda placa’ si of no. Hasta si nos no ta costa Hulanda placa den e aventura aki, Reino ta responsabel pa buena marcha gubernamental na Aruba y mester interveni, y na tempo, ora ta considera esaki necesario. Ta p’esey nos ta den Reino, pa ora nos dirigentenan local no ta cumpli cu nan tarea, nos tin un ‘safety net’ cu yama Reino. Claro cu politiconan di ningun color gusta esaki, pero como ciudadano nos tin di mira e cos aki diferente; esey ta nos proteccion contra politico local.

En todo caso, den e lunanan nos tras a resulta cu e intento pa cambia e ley di supervision financiero a fracasa y gobierno a haya su mes obliga di bisa parlamento cu e cambio di ley no ta bira vigente. Y como cu gobierno ta sigui cumpli cu e protocol y ta reconoce trabao y responsabilidad di CAft, e protagonistanan den parlamento di e aventura legalista ey a keda man bashi, y na berguensa. Sin embargo, den tur esey ainda no tin un base bon y completo pa e supervision financiero. Lo tabatin un intento di gobierno di Aruba ainda pa purba acomoda e asunto ainda den un ley di Aruba, pero esey lo bira den parlamento un ‘herhaling van zetten’. Y asina, manera nos a trece dilanti na varios momento den e ultimo lunanan, e unico ruta pa cana ta esun di un ley di Reino, poniendo nos den mesun posicion cu e otro islanan cu tin supervision financiero di e forma aki. Cu esey, e ley di supervision lo ta bolbe na su cas, pasobra e ley di Aruba no ta nada mas cu e ley di Reino hinca temporalmente den un bachi Arubano pa please e gobernantenan di e momento ey (2015).

Nos no ta bisa cu den e reunion di Conseho di Ministro di Reino di diabierna venidero lo trata e tema aki, ni breve ni extensamente, nos no sa y tabata particularmente dificil pa haya comentario al caso di e circulonan envolvi den esaki. Nos sa tambe cu cierto momento gobierno a declara cu di tur manera nan ta cumpli cu e protocol y cu esey lo ta suficiente. Nos no ta kere esey; ora cu cos bay malo mester regla solido pa orienta tur hende, p’esey tin ley…Na algun momento lo mester regla e asunto importante aki.

 

LEAVE A REPLY

Please enter your comment!
Please enter your name here