Aruba Art Fair conhunto cu Aruba Art Fashion lo tene dia 20, 22, 23 y 24 di november nan evento di arte. E tema di e aña aki ta ‘Breaking the silence’ caminda lo mustra via arte y fashion e mensahe di concientisacion.

Tito Bolivar, organisador di evento splica cu nan meta ta pa trece e mensahe di kibra silencio y crea un diferencia den sociedad. Cada diseñador a escohe nan propio tema y lo transmiti esaki via nan arte y moda pa pueblo general por mira.

“Cada un di nan lo conta un storia pa esnan presente. Di e forma aki comunidad por sinti cu nan no ta nan so y por sinti empodera cu e diferente diseñonan cu lo wordo mustra,” Bolivar a splica. Lo conta cu diferente artista local y internacional.

E aña aki lo tin di Colombia, Valentina Terra cu lo tin su presentacion di ‘Culture Awareness’, conscietisacion di cultura. E lo expresa e shock di cultura rond mundo, tambe e falta di aceptacion na momento cu un persona no ta ser considera local.

Artista local Javan Croes lo presenta ‘love yourself’, stima bo mes. Un mensahe na hoben y adulto pa expresa nan mes sin miedo den nan interior. Artista local Gionina Engelhardt, cu lo duna mensahe acerca di abuso di mucha. “Di un forma sensacional e artista ta combina e grito di e mucha den un obra di arte.”

For di Praga e artista internacional Pauser lo presenta un obra cu ta papia riba digitalisacion y e miedo di e poder cu esaki por tin riba hobennan. Un show di luz y arte. For di Curaçao, e artista Clayten ta treciendo un coleccion di ‘black power’y ta papia di e sobrevivencia di esnan di color den e mundo revolucionario.

Diseñador local y conoci internacionalmente, Giogiola Gomez, lo presenta e ‘freedom of speech’. Tambe lo tin varios otro artista cu lo presenta nan obra. Lo tin make up agency cu lo mustra nan trabou den make up y kico tur ta pasa ‘backstage y riba pasarela’.

Pa prome biaha na Aruba, Victoria Secrets lo desfila cu e afamado ‘Victoria Angels’, unda artista Geraldine Muller lo comparti e storia di cancer di pecho den creacionnan di ‘wings’.

Cada hala lo tin un storia su tras.

Lo tin ros, silver y blanco. Tur tres lo tin un storia di kico cancer di pecho ta y e impacto cu e tin riba hende muhe. “Cada color lo representa e diferente fase di cancer. E prome pieza, color ros, lo conta e storia di un pecho infecta cu cancer.”

E mensahe ta pa cada persona haci nan control na tempo. E di dos pieza lo representa futuro. Ta spera cu ciencia y tecnologia lo sigui avansa, pa sigui den investigacion y combati tumor y caba cu cancer. E color silver ta pasa pa cumpli cu tratamento y cu tin speransa. Pa finalisa e color blanco ta pa duna luz na cada hende muhe ‘cu tin bida despues di cancer y cu bida tampoco no ta caba ora bo wordo diagnostica’.

Breaking the silence lo tuma luga na Plaza Lolita, dunando reconocimento na e obra di arte di artista internacional Gilbert Senchi.

 

LEAVE A REPLY

Please enter your comment!
Please enter your name here