Johnny Depp no tabata violento cu su ex-esposa Amber Heard, sino ta Heard ta esun cu a abusa di Depp. Esey tabata e concepto central cu abogado di e actor a trece dilanti un tribunal na London, unda e huicio pa difamacion di e strea di Hollywood contra The Sun ta yegando su final.

Den su declaracion di clausura, e letrado David Sherborne a sigura cu na fabor di su cliente ta e hecho cu, mientras e tabata abierto tocante su consumo di droga y alcohol, Heard a bagatelisa e importancia di su propio atakenan di rabia y jaloezie.

“[Heard] tabata e abusador, no sr. Depp. E no ta un golpiador di esposa”, Sherborne a bisa corte. Ademas, el a agrega cu e ‘falta di credibilidad’ di Heard a keda proba den e evidencia cu a presenta.

Sherborne a bisa cu Heard tabata ‘un testigo completamente poco confiabel y, francamente, un mentiroso compulsivo’ kende a inventa su storia pa e ta similar na e evidencia produci den su contra.

Ademas el a presenta dilanti di e tribunal un grabacion di Heard y Depp, den cual e actor ta bis’e cu Heard ta gaña na momento cu e ta sigura cu no a dal e un mokete. Esaki, segun Sherborne, ta demostra e ‘propension na violencia’ di Heard. Sherborne a bisa cu e reconocemento di cu Heard a dal Depp lo a causa ‘consternacion’ si e rolnan tabata opuesto.

E causa a cuminsa despues cu Depp a demanda News Group Newspapers, editor di The Sun, y Dan Wootton, un ehecutivo, pa un articulo cu a cualifik’e como un ‘golpiador di esposa’.

Dilanti Corte Supremo di London, Sherborne a carga cu firmesa e articulo di april 2018, den cual a tuma como hecho cu e actor di 57 aña di edad a eherce violencia fisico contra Heard, di 34 aña di edad. E articulo no ta duna espacio pa ‘duda’ ni ‘eror’, y Depp lo ta culpabel di violencia, segun e abogado. Ta pa desarma e ‘acusacion falso’ aki cu e actor a lansa den e ‘doloroso’ proceso publico aki, el a agrega.

Despues di scucha e ultimo acusacion di e defensa di Johnny Depp, e hues Andrew Nicol lo duna di conoce su decision den un fecha posterior. No ta spera cu lo anuncia su fayo inmediatamente.

LEAVE A REPLY

Please enter your comment!
Please enter your name here