E problemanan alrededor di ministro encarga cu Desaroyo Teritorial, Infrastructura y Medio Ambiente ta continua, pero ta parce di lo haya un final por lo pronto diabierna venidero. E partidonan di coalicion ta parce di ta di acuerdo y a pidi un reunion pa e fecha ey cu un solo punto di agenda: mocion di desconfianza. Mientras loke ta bay sucede den parlamento ta inevitable, e forma con esaki lo por bay tuma lugar, por tira un mancha scur riba e reputacion di e parlamento cu di mes no ta nada di gaba.

A yega na nos oido cu e idea ta pa diabierna proximo trata e mocion solamente, sin debate, sin discusion di e maneho di ministro, cu aparentemente a causa asina hopi disgusto cu su propio partido kier bah’e, y ta parce cu awor tin un acuerdo cu e partidonan den coalicion cu ta sacrifica e mandatario pa e gabinete por sigui. Pero esey no ta bay asina simple.

Si ta bay trata e mocion di desconfianza como punto di agenda riba su mes, esey probablemente no ta segun e reglanan di ‘due process’ unda e punto di agenda lo mester ta discusion di e maneho di e mandatario, unda e mocion ta e parti final, e conclusion di e debate riba e maneho. Yega mainta tempran y pasa e mocion como ‘hamerstuk’ no ta parce nos e caminda pa cana. Ademas un proceso asina ta core e riesgo cu finalmente Gobernador por considera di no firma, pasobra no a respeta ‘due process’ den parlamento y cu di e manera aki e lo ta contribui na deterioro di norma di comportamento den parlamento.

Sin embargo, si en berdad tin un mayoria, pasobra e partidonan den coalicion a dicidi cu nan no kier e mandatario mas, esey ta implica cu Prome Ministro y tambe a bay di acuerdo? Na e momento a bira importante pa sa si tin un acuerdo caba entre e partidonan, si tambe den conseho di ministro tin un acuerdo caba. Aki tambe nos ta bin topa cu e mesun tema di ‘due process’. No por ta asina cu un colega ministro di e mesun partido ta cana kibra y ta bisa cu si e otro ministro ey no baha, anto e no ta presenta mas den conseho di ministro… Cu otro palabra, e no ta haci su trabao mas pa cual nos ta pag’e; anto e mester baha! E punto ta keda cu e contrincantenan di e ministro di Infrastructura, principalmente e coleganan di Husticia y esun di Transporte y Comunicacion, te awe no por ni kier clarifica pa Aruba completo kico ta nan problema cu e ministro aki. Y tanten esey no sucede, y e ultimo oportunidad pa haci esey ta diabierna awor, nan ta faltando respet na henter e pueblo aki, pasobra ta parce cu nan kier kita un ministro for di caminda cu ta stroba nan haci nan cosnan. Y e cosnan ey ta bon conoci: e ministro di Husticia, cu nos por caracterisa como un ‘politico di issues’ (tinted glass, pisca cu harpun, RHD) ta parce di no ta interesa den interes general, pero ta mira solamente e interesnan di e gruponan pa cual el a presenta su mes como ‘campeon’. Ta pesey tambe cu e no por a percura pa su propio partido progresa pasobra e ta keda colga riba e ‘issuenan’ aki. Y den cumplimento cu su ‘achterban’ reduci aki, ta parce cu ni tratado internacional no ta import’e.

Pero, pa bolbe na loke nos a bisa anteriormente, e asunto aki, si e yega na un final convincente, hiba ‘by the book’ pa e partidonan den parlamento, no a termina ey. Pasobra ta obvio cu e idea ta cu ta bay nombra un ministro cu si ta bay cumpli cu loke e otronan ta desea. Sin embargo, no ta trata asunto aki cu ta regarda nos mes como pais solamente. Cumplimento cu tratado ta un asunto di Reino y awor aki ya gobierno Hulandes ta pendiente kico ta bay sucede den e caso aki. Ademas, riba otro tereno cu tambe ta hunga un papel den e conflicto aki, eventual negoshi cu otorgamento di tereno, tin dos ministro bao investigacion penal caba! No ta parce nos ningun problema pa e Hulandesnan amplia nan investigacion na un ministro mas…

Kico esaki ta implica? Cu e metanan cu e dos ministronan kier logra, cu na Aruba ta bira posible, como e unico o un di e poco lugarnan na mundo por tin tour turistico riba cual ta permiti spearfishing, ta imposible pa logra bao di e vigilancia mas estricto cu tin awor caba di banda di Hulanda. Di un banda nos por comprende masha bon kico nan kier logra, pero loke nan kier no ta cuadra cu interes general di Aruba, y ta esey nos mester tene na vista. Ademas, ban ta franco: den e tempo di crisis aki nos mester dedica atencion na e escapadanan di e hendenan aki, mientras cu e pais ta exigi atencion maximo di tur ministro? Esey riba su mes ta bisa suficiente di e calidad di gobernacion cu nos tin actualmente. Anto nan kier rabia ora e Hulandesnan ta bisa cu nos no por maneha nos autonomia? Nan ta duna Knops razon…

LEAVE A REPLY

Please enter your comment!
Please enter your name here