Abogado Gomez : “Campeon sin corona”, Zissu a gana caso pero no por cuminsa opera

Diamars hues a duna sentencia den caso di Zissu Properties NV contra Preserva Malmok. E sentencia aki a resulta na fabor di Zissu, pero nan no por cuminsa opera. Preserva Malmok ta satisfecho cu e sentencia mirando cu tin adelanto den e caso, Lincoln Gomez abogado di Preserva Malmok a splica.

Abogado di Preserva Malmok a splica Bon Dia Aruba cu e sentencia cu a wordo duna diamars pa hues den caso di Zissu, mester wordo mira den su contexto, pa e cuadra. Na januari tabatin e sentencia unda cu gobierno a wordo prohibi pa duna permiso y Ocean Z a wordo prohibi di haci cierto cosnan. Gobierno no a apela e sentencia ey, Ocean Z so. Pues e sentencia duna diamars ta solamente pa Ocean Z y Preserva Malmok.

“E sentencia cu gobierno a haya biaha pasa cu nan no mag di cambia destinacion, y tambe cu Minister a bisa cu e no ta bay duna permiso pasobra e no kier actua contra e sentencia ey, e sentencia ta keda existi pasobra gobierno no a apela esaki. Awo si wak e sentencia di diamars, nan no a haya un permiso. Y corte no a bisanan cu nan mag di opera. Locual cu corte a bisa ta cu nan mag tin13 camber cu un pool pero no mag di tin evento, nan no mag di tin sala di conferencia, no mag di tin actividad publico etc. A base di esey corte a bisa cu tin un cos pa tin un bisiña cu haci un evento pa 150 hende, y un otro cos ta pa tin un bisiña cu tin 13 huesped na un luga cual kiermen 13 auto so (1 pa cada camber) cu algun empleado. E tipo di molester ey, corte a bisa cu no ta excesivo of ‘onrechtmatig’.”

El a sigui splica cu ora cu Preserva Malmok a inicia na November, tabata contra actividad grandi, of publico. Awo esaki no tey mas, pues di parti di Preserva Malmok e ta un adelanto pasobra bo no tincu preocuupa pa 100 auto, sino hopi menos. Zissu no por opera como hotel, pasobra si ta bay hospeda mas cu 9 camber, mester di hotel vergunning pa esey, cual no tin.

Locual cu Zissu por haci awo cu e sentencia cu hues a dune ta nada Sr. Gomez a bisa. Pa nan e situacion no a cambia banda di cu nan no por haci actividad grandi eynan mas, cual nan mes a bisa tambe di no ta bay haci mas. Sr. Gomez a bisa cu e no ta kere cu minister Schwengle lo duna un permiso den e caso aki tampoco como e ta bay contra di e sentencia di hues cu ta conta pa gobierno ainda. Den caso cu nan haya e permiso e ora Preserva Malmok tin csminda di LAR cu por cana a cuminsa un caso. Terminando Sr. Gomez a bisa: “Si nan ta bay sigui purba pa haya permiso, nos lo considera si nos ta tuma accion”.