Awe 2 di maart 2016 huez a tuma decision den e caso di Aruba Airlines y a dicidi di apunta Esteban Valles como director-interino di Aruba Airlines y suspende Onno de Swart di tur funcion cu e por tin den Aruba Airlines. Cu e decision di hues Seastar tin tur control bek como accionista mayoritaria di Aruba Airlines y e Valles a bira director. Esaki lo trese tranquilidad pa Aruba Airlines y nan empleadonan. Mira e veredicto aki.
Segun Sra. Kock ta splica, e caso a cuminsa ora Sr. De Swart a dicidi di hacii un “hostile takeover” door di yama un reunion di accionista y hunto cu Sr. De Hoogd a dicidi di duna Black Brothers 1.001 accion. Esaki lo trese cu ne cu Seastar Holding NV cu tin 90% di accionnan lo keda cu 9% di accion y e ora no tin nada mas di bisa. E decision aki ta invalido pasobra e ta contra e ley di e statuto di e compania. Durante e tratamento di e caso Sr. De Swart y Sr. De Hoogd ya a admiti cu e decision ta invalido. Huez a ratifica esaki cu ta trece cu ne cu Seastar a keda accionista mayoritario cu 90%.
“Tur e maniobra di De Swart a pone cu el a bay mucho leu y cu ta logico cu Seastar no tin confiansa mas den De Swart y huez a suspende De Swart den tur funccion cu e lo tin den Aruba Airlines. Tambe hues a dicidi cu De Swart no mag di ta activo den Aruba Airlines y cu e mester duna tur su cooperacion na Valles y pasa tur informacion pa e director nobo. Si De Swart no cumpli cu e decision di hues e lo haya un boet di Afl. 25.000,= pa dia cu un maximo di Afl. 25.000.000,=.
Hues a dicidi tambe di apunta Valles como director-interino. Huez ta di opinion cu e accionista mayoritaria tin confiansa den Valles y segun e statutonan di Aruba Airlines e accionistanan ta nombra e director. Kiermen, cu desde 2 di maart Valles ta director-interino di Aruba Airlines y hues a autorise pa haci e cambio necesario na Camara di Comercio.
