Actualmente tin un trahado social pa 19 scol

Parlamentario Hendrik Tevreden, MEP

Parlamentario Hendrik Tevreden a expresa su preocupacion y su solidaridad cu henter comunidad cu e caso di morto di un mucha di 5 aña victima di maltrato y su ruman chikito.

Como fraccion di MEP den parlamento nan kier atende e problema aki debidamente. Nan kier duna conseho na gobierno pa centralisa e cuido y drecha, pa medio di leynan, e sistema pa e profesionalnan riba e rama aki por funciona miho y yuda e victimanan mas lihe posibel. El a trece como ehempel cu actualmente nos tin un trahado social pa 19 scol. Parlamentario Tevreden ta mira cu esaki ta un señal hopi drastico y alarmante, ya cu dificilmente un trahado social no por cubri 19 scol.

Reunion cu gobierno
Ainda nan no a tene un reunion oficial cu gobierno nobo pa haya mas informacion di e incidente aki. Sinembargo via prensa nan ta ripara cu gobierno a tuma cierto pasonan pa atende cu e situacion aki. Esaki no ta descarta cu di nan banda, fraccion di MEP lo bay pidi un reunion cu gobierno pa asina ‘nos por ta riba den e mesun liña. Pero tambe verifica kico mas ta falta a pone of ahusta mas riba e direccion cu nan ta bayendo’.

Un prome punto ta esun di mehora y stabilisa nos condicionnan social Pa evita cu gobernacion hiba un politica ‘basa riba fachada so’, nan ta dispuesto pa facilita y aloca e fondo disponibel pa bin cu prevencion pa atende cu problema social.

Algo cu mester drecha ta e cadena social cu e parlamentario aki ta haya cu no tin contacto suficiente cu otro. “E cadena ta kibra”, el a bisa. Den esaki mester mehora e forma di traha di tur departamento riba e tereno social pa atende inmediatamente y paso pa paso, cualkier problema cu por drenta te yega na e punto final, unda e persona realmente ta wordo yuda.

Problema social ta real
Sr. Tevreden a declara cu e problema social riba nos isla ‘no ta un percepcion sino cu nan ta problemanan real’ y no algo nobo.

“Aruba nos tin mas problema di loke nos mes ta pensa”. Mirando e caso di e dos menor di edad aki e ta refleha cu nos ta yegando na un situacion social bastante serio, e ta reconoce cu como parlamentario nan tin un trabou grandi pa bay haci riba e problema aki.

Igualmente el a bisa cu mester haci algo urgente pa evita cu casonan manera esun di e dos menor ta bolbe ripiti den futuro. Tambe pa esunnan cu ta pasando pa e dolor aki actualmente, ya cu nan kier mira un cambio mas urgente posibel.

Aunke e por scucha pa bin cu castigo mas pisa pa castiga e persona cu ta comete e tipo di delito aki, pero e no ta e solucion di e problema di reis. “Prome cu nos yega na e punto aki, nos kier pidi e pueblo comprension. Pa nos compronde cu nos tin cu atende e problemanan aki na reis”.

Tambe hunto cu tur departamento, autoridad y instancia lo determina specificamente kico ta e leynan cu mester wordo cambia y cual di nan ta esunnan cu mester atende mas urgente.

El a referi na e rapport cu ex minister Dowers a manda haci na maart ultimo – pero e resultado a bin cla na augustus ultimo – unda ta wordo duna un indicacion di e profundidad y seriedad di e problemanan di aspecto social.

Parlamentario Tevreden a manda palabra di forsa pa e famianan di e criatura cu a fayece y pidi ‘nos Señor creador’ cu nos por haya su ruman pronto.

 

 

 

You May Also Like

‘Mester tene cuenta cu cambio di Constitucion pa ley defensor pueblo’

E siman aki lo tin diferente reunion interno den parlamento prome cu e miembronan ...

Barco Sampson ta un berdadero Sanson riba lama

E barco Sampson mara riba nos waf ta haci honor na e personahe Sanson ...

zika.jpg

Protocol nobo pa combati Zika

ORANJESTAD – Minister di Salud Publico Alex Schwengle a anuncia awe mainta cu lo ...

‘LGBT Culture Day’ di Marriott Hotel cu enfoke riba igualdad pa tur hende

Ayera tardi, Marriott Hotel a tene su ‘LGBT Culture Day’. Esaki a tuma luga ...

Cuenta anual tin ultimo palabra riba deficit presupuestario 2018

ORANJESTAD – Parlamentario Richard Arends ta haya ainda prematuro pa gobierno a anuncia cu ...