Siman pasa un delegacion di parlamento di Aruba a biaha pa atende un reunion di Parlatino (Parlamento Latino Americano ) na Panama. Lider di fraccion di MEP, Rocco Tjon a bisa cu e delegacion aki a atende diferente reunion y un tema cu nan a atende tin di haber cu prizon sostenibel.
Parlamentario Tjon kende ta ex director di nos prizon KIA a bisa cu e comision di derecho humano, husticia y politica di prizon a debati riba topico aki caminda decision y compromisonan a wordo tuma den seno di Parlatino. Nan ta bay percura pa e acuerdonan aki lo wordo hancra tambe den e diferente comision fiho cu tin na parlamento di Aruba.
Un di nan tin di haber pa yega na un manera pa bin cu prizon sostenibel. E parlamentario ta haya cu esaki ta un punto interesante pa nos pais ya cu un prizon manera KIA si inversion no ta wordo haci manera debe ser ‘bo ta trapa ariba derechonan humano’.
P’esey e ta considera importante pa nos por yega na prizon sostenibel pa asina nos por reduci e gastonan cu ta wordo destina pa mantene un prizon den e standard optimal cu mester. Tambe e hecho cu actualmente nos ta depende di inspeccion di Hulanda pa bin wak si nos prizon ta optimal. E ta kere cu pa medio di e comision di derecho humano, husticia y politica di prizon di Parlatino ta ideal pa tin instancia den nos mesun bisindario pa regularmente bin monitor nos prizon pa haya e atencion cu e merece.
-300x169.jpg)
Parlamentario Tjon a indica cu ora ta wordo papia di inversion den prizon no mester tene cuenta unicamente cu aspecto di infrastructura, pero muy particularmente tambe inversion den e personal. Entre nan cu e personal por tin e material adecua pa nan por eherce e trabou manera debe ser.
