Den un comunicado di prensa Asociacion di ‘Food & Beverage’ (AFBA), a expresa e preocupacion cu nan a keda cune ainda despues di e reunion cu tabatin siman pasa diarazon 15 di juli entre gobierno y diferente stakeholder, den cual nan a splica tambe e situacion den nan sector.

Segun presidente di AFBA, Jan van Nes, cu ken Bon Dia Aruba tabatin un entrevista adicional cortico tambe, e sector danki na loonsubsidie ta operacional, pero kita e loonsubsidie y hopi restaurant lo ta den e proceso di cera nan negoshi den e proximo lunanan.

Den e luz aki a compara e situacion aki cu e sector lo ta ‘riba respirator halando rosea’. Segun AFBA tin como 600 restaurant/ bar/ lounge, etc. ta halando rosea na un respirator. Den un encuesta cu AFBA a tene bao di su miembronan, solamente 7% di restaurant a expresa cu nan lo por sobrevivi sin loonsubsidie. Loke kiermen cu e momento cu elimina loonsubsidie, na modo di papia ta saca e stekker di e respirator y 93% di e negoshinan lo keda sin rosea. Den e periodo despues, y a consecuencia di e falta di ayudo aki, tambe otro negoshi ‘riba respirator’ lo cera, loke lo ocasiona un collapse economico na nos isla. E sector di Food & Beverage ta representa alrededor di 5.2% di GDP y ta duna empleo na mas o menos 6.000 empleado, di cual hopi lo perde nan trabao, loke lo tin un impacto devastador, segun AF&BA.

Den luz di esaki AFBA ta boga pa negocia y yega na e mihor acuerdo posible cu Hulanda. Taskforcenan instala durante e crisis, reforza cu rapportnan di antes, a completa reformanan pa nos economia, y reforma pa controla burocracia. Segun AFBA ta cuestion di adapta na un mindset nobo pa implementa esakinan. Un mindset cu no lo bini di nochi pa mainta tampoco, pero un mindset unda segun AFBA gobierno di Aruba lo mester cambia pa pidi pueblo ‘kico mi por haci pa bo’ na lugar di ‘pone nos sinti cu ta fabor ta haci nos’.

AFBA ta expresa di ta contento cu e loonsubsidie, cu tin e intencion pa tene mas tanto empleado na trabao. Loke operador di restaurant ta confronta si ta otro gastonan manera awa y luz, gasto di accounting, gasto di inventario di food & beverage, pest control y e ‘werkgeversbijdrage’ relaciona cu loonsubsidie. Cu un benta di mas o menos 20%, a pesar di e yegada di turista, e mayoria di e sector ta confronta scenarionan bao di break even, pues perdida. Esaki ta implica cu cada luna, a pesar di algo di benta, tin mas gasto y eliminacion di loonsubsidie lo ta e final di hopi restaurant o otro negoshi, segun e gremio.

Cu e incertidumbre cada luna si lo tin loonsubsidie o no, y CAft insinuando un reduccion di esaki pronto, tambe e scenario pa hopi restaurant lo ta un ciere promer cu fin di aña. Den e luz aki 43% di restaurant a expresa den un encuesta di ta mas pesimista cu e luna anterior.

P’esey, manera bisa anteriormente, AFBA ta boga pa negocia e mihor acuerdo posible bao di circunstancia actual cu por tin cu Hulanda, ya cu un collapse economico cu lo tin sin un acuerdo lo inicia den nan sector y lo tin un ‘ripple effect’ cu lo afecta tur otro sector. AFBA ta pone enfasis cu den sector horeca empleadonan a perde entre 50 y 60% di nan entrada caba. Segun e asociacion, “e tono di hopi hende den comunidad cu no a perde asina hopi por bien ta papia di autonomia ya cu nan a wordo poco afecta”.

Actualmente tin mas o menos 120 restaurants habri atrobe y AFBA ta spera cu a base di mas turista mas lo habri nan porta, pero tambe cu “e speranza pa keda habri poniendo asina tambe cuminda ariba mesa”. AFBA ta consciente cu tin hopi instancia brindando paketenan di cuminda na masha hopi hende, loke ta un muestra di loke na Hulandes yama ‘het water staat ons aan de lippen”.

Situacion na Merca
 Den nos entrevista cu Jan van Nes a bin dilanti e ultimo desaroyonan na Merca, unda e crisis di Covid-19 ta bayendo totalmente for di man, brindando un perspectiva bastante scur pa e proyeccionnan cu tin te awor pa recuperacion economico di Aruba di awor pa fin di aña. Sr. Van Nes a confirma cu esey ta loke e tambe ta mira su dilanti, y cu esey lo ta un motibo mas pa mantene e loonsubsidie y no bay ‘scale down’ esaki, manera CAft ta sugeri, na un momento cu ta parce cu lo mester di e ayudo pa mas tempo cu loke a premira anteriormente. Un motibo mas pa urgi gobierno anda cu cautela den e asunto aki.