Recientemente dr. Van Gaalen, director medico di Respaldo, y drs. Els van Homelen, directora di SVGA, a firma un acuerdo formal di cooperacion hopi importante. Esaki a sosode despues di a wordo reconoci como instituto oficial di formacion practico pa estudio di GZ-psycholoog.

Ta trata di un acuerdo di cooperacion entre Fundacion pa Salud Mental Aruba Respaldo (FSMA Respaldo) y Stichting voor Verstandelijk Gehandicapten Aruba (SVGA) cual ta haci posibel cu specialistanan di SVGA lo por completa nan formacion practico na policlinicanan di Respaldo. Esaki en conexion cu e estudio pa psicologonan basico por bira GZ-psicologo. E estudio di GZ-psicologo ta un specialisacion di dos aña cu por wordo sigui despues di a termina un estudio universitario di psicologia. Cu e estudio aki e psicologonan lo ta specialisa pa por diagnostica y trata pashentnan cu problemanan mental.

E estudio pa specialisacion pa psicologonan na Aruba lo wordo duna door di Rino Zuid di Hulanda y tin un duracion di dos aña y mey. Pa cu esaki Respaldo lo traha conhuntamente cu Mental Health Caribbean cu ta e instituto cu ta coordina e estudio aki pa e region.

Fundacion Respaldo ta sumamente contento di por yuda haci posibel pa nos psicologonan na Aruba lo por sigui e specialisacion aki na Aruba mes. Di e manera aki pronto Aruba por conta cu mas GZ-psicologonan cu lo haci cu e nivel di e cuido lo subi substancialmente. Gradualmente lo por bay responde miho na e gran necesidad di atencion pa salud mental y adiccion na Aruba.

Respaldo a atende na 2017 alrededor di 2.000 cliente y na 2018 alrededor di 3.500 cliente a wordo atendi. Esey ta un aumento di alrededor un 75% mas cliente atendi den transcurso di un aña. Respaldo ta riba e caminda corecto, pero no por nenga cu ainda tin hopi trabou pa eherce. Tur aña, alrededor di 10.000 adulto y mucha/hoben na Aruba mester di atencion medico pa tratamento di problemanan mental. Tin cooperacion concreto di tur stakeholders ta indispensabel den e proceso aki.

 

LEAVE A REPLY

Please enter your comment!
Please enter your name here