Minister Otmar Oduber: Ta lamenta cu compania ECOGAS ta mal informa comunidad

Recientemente gobierno a tuma nota cu den articulo publica 14 di juli den medionan di comunicacion, e compania en cuestion ta informa di posibel intencionnan pa por exporta sushi di Aruba.

Gobierno di Aruba, cu tin como unico punto di salida bienestar di Aruba, ta lamenta profundamente mal informacion duna door di compania Ecogas. Mester indica cu realmente ni mita di e sushi total produci na Aruba ta wordo recoge pa Ecogas.

Acuerdo temporal
Como parti di un plan corto-medio plaso, Serlimar a cera un acuerdo temporal cu Ecogas pa paketa e sushi cu Serlimar y otro compania ta recoge di cas y comercial, den e asina yama ‘envirobales’. Importante ta pa comunidad compronde cu ta trata di un acuerdo temporal pa asina por duna espacio pa yega na e plan definitivo, den forma di un ‘waste to energy facility’ pa pais Aruba. Na unda cu bienestar di tur ciudadano ta bin na vigor.

Na ningun momento e ta asina cu e compania en cuestion por dicidi cu e sushi cu ta paketa por exporta di tal forma. Pa es motibo, Gobierno ta lamenta cu e informacion a wordo publica como tal.

Cualkier compania cu tin un bon pensamento, bon plan y bon vision, ta un compania cu ta forma parti di e solucion. Sinembargo, esaki semper teniendo bienestar general na cuenta y tambe practicanan etico di haci negoshi. Ora cu ta trata subimento of bahamento di prijs, ta cuestiona e hecho cu na momento cu e compania en cuestion a yega na acuerdo cu pais Aruba, a tuma e decision pa triplifica prijsnan den sector comercial pa locual ta servicio cu nan ta duna companianan, cual ta algo pa pensa riba dje.

Gobierno di Aruba kier enfatisa cu e tin pleno confiansa den e proceso transparente, integro y solido, pa locual ta e solucion definitivo pa Aruba su problema di desperdicio den forma di un ‘waste to energy facility’. Asina ta indica cu Gobierno di Aruba tin bienestar di pueblo como su punto di salida.