Home Local Alumno di piano ehemplar lo toca como solista diadomingo

Alumno di piano ehemplar lo toca como solista diadomingo

742

Diadomingo venidero 10 di juni pa 4or di atardi lo tin un concierto di alumnonan di Scol di Musica Rufo Wever. Pa e rason aki Bon Dia a combersa cu un di e alumnonan riba su desaroyo tocando piano pa e ultimo 11 añanan y con e ta mira acogida pa e interes aki na Aruba.

Ivan Ponson ta un hoben cu 18 aña di edad actualmente den su aña di examen na Colegio Arubano na nivel di VWO. Den un entrevista cu e hoben na Scol di Musica Rufo Wever e hoben a toca par di pieza cu e lo bay presenta na e concierto diadomingo venidero na Cas di Cultura. Un di e piezanan aki lo ta e Minute Waltz, componi pa Frédéric Chopin.

E hoben ta conta nos cu di jong su mayor a curash’e pa cuminsa tuma les pa toca un instrumento. Mirando cu di un banda e tabatin famia cu ta toca guitara y di otro banda e tabatin famia cu ta toca piano, e tabata un escogencia dificil. Pero eventualmente el a dicidi di cuminsa cu piano y desde e momento ey ora e tabatin rond di 7 aña, el a keda bay cu e instrumento aki.

Durante su clasenan sr. Ponson a conta cu ‘mi ta hopi interesa den muziek clasico, pasobra den e bukinan cu bo ta practica cun’e esaki ta normalmente e muziek cu ta poco mas avansa, y mi ta haya esaki ta e tipo di muziek mas dificil pa toca generalmente’.

Famia amante di muziek
Pero sr. Ponson su famia tambe ta un parti grandi di su stimacion pa musica, e ta conta nos. “Mi mama ta toca piano, y mi welo ta compositor y violinista. Pero mi por relaciona cu cualkier persona cu ta of a yega di toca un instrumento. Specialmente si nan a pasa den un periodo cu nan a sinti poco menos inspira of motiva pa sigui.”

E kier siña toca mas wals mirando cu su welo a yega di compone canticanan di wals, pero esaki no ta bin facil pe, mirando cu e ta enfoca mas riba muziek clasico. Aunke muziek clasico ta considera generalmente un estilo di muziek dificil pa toca, sr. Ponson ta haya cu ‘wals ta dificil pasobra e ta mas riba e ritmo y e ta un style diferente’.

Motivacion pa sigui desaroya

Ta asina cu e por mira cu rond di dje tin amigonan cu ta cuminsa cu esaki y despues ta stop di practica. “Mi mes a yega di pasa den dje sigur. Mi tabatin un tempo cu mi mama so a keda pusha pa mi sigui practica. Pero mi ta kere si bo sigui persevera bo por realisa con bon bo ta birando y diripiente tur cos ta bira hopi mas interesante.”

E alumno ta gusta desafia su mes por medio di toca muziek clasico y e por corda ‘tempo mi tabata cumpra buki nobo mi tabata bin cerca Johnny pa puntr’e si mi por toca e canticanan ful patras den e buki’. Pa awo e hoben a yega di toca mas o menos 10 show, pues pa toca e siman aki no lo ta algo nobo pe. Aunke sr. Ponson ta haya cu e por toca bon, ‘presenta den un show no ta mi parti faborito. Mi gusta mas practica. Pero no kiermen cu mi no gusta mustra con mi ta toca tampoco’.

Mi kier motiva pasobra hopi muchanan ta stop ora motivacion cay’

Sinembargo el a expresa cu tin un problema cu motivacion basta grandi bou hobennan ora ta trata di sigui cu musica of otro materia. “Esaki mi ta haya ta lamentabel pa esunnan cu ta cuminsa pero no ta surpasa e ola di demotivacion. Johnny semper ta conta mi cu e ta contento cu ami semper ta practica y ta sigui. Mi ta kere e motivacion of e inspiracion na Aruba pa toca muziek no ta hopi halto.”

Riba dicon e ta kere cu tin falta di esaki, sr. Ponson ta haya cu esaki ta pa via cu ‘no tin artistanan grandi di muziek clasico’. “Bo tin hende mane Jeon cu ta na un nivel caba y nan ta bon, pero e ta otro cos, pasobra ta otro genero di muziek. Mi ta kere muchanan hopi biaha ta admira ora un hende cu ta cerca y local ta haciendo algo cu nan ta interesa den dje. Mi ta kere esaki falta na Aruba, aunke e no ta necesario, e lo ta bon pa tin e.”

Honestamente mi lo kier ta un inspiracion pa e generacion nobo. Tin un mucha cu ta bin tur siman cu tin mas o menos 9 aña di edad y cada biaha mi tin les e ta hopi emociona y motiva. Pa mi ta sorprendente con e mucha ta asina motiva, mi mes no tabata asina motiva na e edad ey! Si bo ta motiva di un manera of otro un mucha pa sigui toca mi ta kere esaki ta motiva bo mes bek tambe.”

E hoben su plannan den futuro ta pa sigui cu piano aunke e tin pensa di bay studia otro cos. “Mi ta bay tuma un break pa un aña pero den e tempo ey mi lo sigui practica sigur. E aña aki di examen piano a yuda mi hopi pa kita stress y pone mi mente otro caminda.”

Aunke e lo kier ta un inspiracion pa muchanan haya interes den muziek, e no ta sigur con e lo haci esaki apart di inspira durante lesnan. “E cos ta cu hopi muchanan no ta bay un show, pero mi speransa ta cu mayornan si lo bira inspira pa curasha nan yiunan pa bin den e direccion aki.”

Riba diadomingo venidero sr. Ponson, hunto cu otro alumnonan lo toca den estilonan varia den grupo, ensemble y tin par cu lo ta solista manera sr. Ponson. Esaki ta inclui instrumentnan Orff, piano, baho, guitara, cuarta, drums, percusion, fio, trompet y tambe canto. Carchinan ta obtenibel na e scol na Cas di Cultura su segundo piso y ta obtenibel na porta di e concierto.