E presentacion di Ministerionan di e Gabinete Wever Croes II ta mustra cu no a pone medio ambiente como prioridad. Esey ta opinion di ambientalista, biologo y huez mr. Jeff Sybesma.

“Mi a duna mi opinion caba riba e con e reparticion di Ministerionan ta na Aruba. Mi a argumenta pa pone areanan di preocupacion, manera desaroyo sostenibel, medio ambiente y naturalesa, y kizas hasta desaroyo special bao e mesun Minister. Si pensa logico, e terenonan di maneho aki ta relata na otro y si uni nan tur, ta crea un sinergia cu ta beneficia tur.”

Pero, Formador y e futuro Prome Minister di e Gabinete Evelyn Wever-Croes II a splica con e reparticion di tarea lo ta den e siguiente Gobierno. “E no ta haci mi contento. Pues, desaroyo duradero y naturalesa ta den e paketenan di tarea di diferente Minister, aunke di e mesun partido. Pero no por haya nada di medio ambiente,” Sybesma a bisa.

E decision aki ta trece hopi tristeza cerca e ambientalista, pasobra den su concepto, e mensahe ta cu no ta duna medio ambiente prioridad. “Y tur hende sa cu e problemanan ambiental a crece cu dimensionnan desastroso y mester ta halto riba e lista di prioridad di e Gobierno nobo. Particularmente pasobra ta bay tin mester di hopi placa pa atende cu nan. Y ta placa cu no tin.”

Un di e problemanan ta e planta di purificacion di awa, RWZI, na Bubali, e dump di Parkietenbos cu ta demasiado yen y cu ta crea molester, ademas di e problematica di e incinerator. “Tur ta bomnan di tempo cu ta keda pasa sin cu tin un Minister dedica pa nan y cu un dia lo explota den cara di e Gobierno aki y comunidad.”

Prioridad na nivel internacional

Mas ainda, mr. Sybesma a mustra cu nan e momentonan aki, rond mundo ta bati alarma pa e cambionan di clima cu ta causa pa comportacion destructivo di hende riba medio ambiente. E efectonan di un nivel di lama cu ta subi pa motibo cu mundo ta bira mas cayente, horcannan mas fuerte, e extension di flora y fauna, incluso di e coralnan y secura ta causa entre otro pa motibo di sushamento di medio ambiente. Diferente organisacion internacional y regional, tambe den Reino, ta pone e temanan aki riba lista di prioridad halto.

“Door di bagatelisa medio ambiente na Aruba y no mencion’e mes como un tarea specifico di un Minister, ta manda un mensahe cla cu medio ambiente no ta importante pa e Gobierno aki. Na momento cu a presenta e acuerdo di Gobernacion firma, a pone como prioridad number seis, cu mester bin un balans entre crecemento economico y medio ambiente. Pero, door di no duna un Minister e tarea specifico pa tuma cargo di medio ambiente na e lista presenta na Gobernado, de facto e Gobierno nobo ta bisa cu crecemento economico ta sumamente importante. Y si de paso por haci algo pa medio ambiente, anto e ta bunita.”

Den opinion di Sybesma, medio ambiente a bira djis un bunita frase na fin di un texto y ta pone Aruba na berguensa cerca cu mesun comunidad y esun internacional. “E ta tristo, pero tambe realidad duro,” Sybesma a conclui.

LEAVE A REPLY

Please enter your comment!
Please enter your name here