Ya ta siete siman cu tabatin eleccion na Aruba y cu partidonan MEP y Raiz ta den combersacion pa forma e siguiente Gobierno. E siman aki ainda tin encuentronan cu diferente actor (stakeholder) den comunidad pa asina traha un programa di Gobierno mas completo posibel.

Pero tambe e Formado mester enfoca riba e constelacion di su Gobierno nobo. Segun Constitucion di Aruba, articulo II.5 ta bisa cu ta pa medio di ley ta apunta e Ministerionan cu ta cay bao di un Minister. Articulo II.6 ta limita e cantidad di Minister na nuebe (9). E ley cu medida general di 19 di December 2013 a hinca diferente Ministerio hunto. Pero e ley aki a keda cambia na 2016 y 2018.

Na e momento aki e Ministerionan ta di Asuntonan General, Integridad, Cuido di Gobierno, Innovacion y Energia; Finanzas, Economia y Cultura; Husticia, Siguridad y Integracion; Turismo, Salud y Deporte; Enseñansa, Ciencia y Desaroyo Duradero; Asuntonan Social y Labor; Desaroyo Espacial, Infrastructura y medio; y Transporte, Comunicacion y Sector Primario.

Durante e formacion ta negocia ken ta haya cua Ministerio. Tin Ministerio cu ta hopi deseabel y otronan cu ta menos. E Ministerionan di Finanzas y Husticia hopi biaha ta duna dolor di cabez, mientras cu portofolionan manera Desaroyo Espacial, Infrastructura, Transporte, Turismo ta mas desea ya nan ta permiti un Minister logra exito mas lihe y mas bisto.

Formacion a base di logica

Un observado cu tin hopi atencion pa e formacion pero particularmente e constelacion di e siguiente Gobierno ta mr. Jeff Sybesma. Sybesma, biologo y Huez Administrativo na Corsou ta sigui e desaroyo hopi di cerca, a base di su interes di proteccion di naturalesa en particular y e proteccion di ciudadanonan. Jeff Sybesma cu ta sigui particularmente e desaroyo den maneho di naturalesa riba e islanan ABC di Reino Hulandes a enfoca su observacion riba pakico medio y naturalesa ta crucial pa e ser humano.

Sybesma a enfatisa cu e desaroyo pa forma Gobierno ta un fenomeno politico, y e mes no tin un opinion riba e proceso. Locual si e ta haya importante ta pa decifra si tin un logica tras di e diferente aspecto di un Ministerio. Y mirando su interes personal, cu ta medio ambiente, el a dicidi pa enfoca riba e temanan di desaroyo duradero, naturalesa y medio ambiente

Desaroyo duradero y SDG’s

Minister di Enseñansa y Ciencia a haya Desaroyo Duradero den su portofolio. Desaroyo Duradero ta un proceso cu ta conecta na necesidad di awendia sin trece na peliger e probabilidad di generacion futuro pa percura pa nan mesun necesidad. Nacionnan Uni na 2015 a formula e 17 Obhetivonan di Desaroyo Sostenibel, e Sustainable Development Goals, SDG’s. Hunto nan ta forma un yamada universal pa percura cu pa 2030 ta caba cu pobresa, ta proteha planeta Tera adecuadamente pa evita cu ta agot’e, y cu tur hende por biba den paz y cu bienestar.

“E ta un plan ambicioso. SDG’s ta forma un cuadro integral unda ta reconoce cu tur actividad ta conecta cu otro y cu un desaroyo sostenibel di un pais ta nifica calcula balance riba tur tereno social. Un tema asina importante y cu ta cruza Ministerionan mester cay, den mi opinion, bao e Minister pa Asuntonan General. Es mas, Minister pa Asuntonan General ta responsabel pa asuntonan di SDG’s. Por ehempel, miembronan di e Comision Nacional SDG Aruba ta cay bao diferente Ministerio, pero e Consehero Special di Minister pa Asuntonan General ta Presidente di e Comision. Y tur corespondencia pa medio di SDG’s ta pasa pa medio di Ministerio pa Asuntonan General.

Crea un Ministerio pa medio y Naturalesa

Mirando cu Constitucion ta permiti nuebe Minister y awor tin ocho, kizas ta momento pa crea un Ministerio nobo cu ta Naturalesa y medio. Mr. Sybesma ta argumenta cu Gabinete Wever Croes a mara medio na desaroyo special y no na salud publico.

Sybesma a haci un comparacion cu otro paisnan den Reino Hulandes. Na Hulanda, e Gabinete Rutte III, demisionario, conoce un Minister di Salud Publico, Bienestar y Deporte, y un Minister pa Agricultura, Naturalesa y Calidad di Cuminda. Pero tambe a nombra un Minister sin portofolio encarga cu Medio Ambiente y Vivienda. E Ministerio aki ta cay organisatoriamente bao Ministerio di Infrastructura y Administracion di Awa. Pero, a mira medio suficiente importante pa a dun’e su propio Minister. Pero esey tabata un desaroyo tambe, pasobra den Gabinete I y II tabatin un Ministerio di Infrastructura y medio. Balkenende IV a reparti naturalesa y medio ambiente den tres diferente Ministerio.

St. Maarten tin un Minister di Vivienda, Ordenanza Espacial, medio y Infrastructura y un Minister di Salud Publico, Desaroyo Social y Asunto Laboral. “E ta similar cu Gabinete Wever Croes I,” Sybesma a ilustra. “Na Corsou, tanto bao Gabinete Ruggenaath y awor bao Gabinete Pisas, tin un Ministerio di Salud, medio y Naturalesa. Tur e areanan aki di preocupacion bao di un Ministerio.”

Razonamento di Ministerionan

Jeff Sybesma a splica cu hopi biaha ta mester lesa den e Splicacion di Ley di Instalacion di Minister pa busca e logica con ta hinca e Ministernan den otro. “ Y tin biaha por busca razonamento. Salud Publico por tin relacion cu deporte, pero con su relacion ta cu Turismo? Cua ta e relacion cu otro? Ami lo pone Turismo hunto cu Ministerio pa Asuntonan Economico, ya cu e ta e pilar economico mas grandi di Aruba,” Sybesma a splica.

Y si mira Desaroyo Espacial y Infrastructura, e pregunta ta lanta pakico ta conecta medio y Naturalesa cu nan. Desaroyo Espacial y Infrastructura mester sostene otro areanan cu ta responsabilidad di Gobierno pa organisa e terenonan disponible, pa determina kico por usa y con.

Salud Publico, medio y Naturalesa tin punto comun

Naturalesa y medio ta rekeri un otro punto di salida. “Den mi opinion e combinacion mas logico ta Salud Publico cu medio y Naturalesa. Pasobra tur tres tin un punto en comun, esta cu hende ta e punto central. Maneho di medio ta defini como e cuido di ambiente di biba di hende, mientras cu Salud Publico ta dirigi situacion di salud di comunidad y actividadnan cu mester promove salud. Naturalesa tin un interes similar, particularmente areanan di balor cultural – historico, paisahenan original, areanan den peliger, biodiversidad y fuentenan natural pa sostene naturalesa. Esakinan tambe ta na interes di hende.”

No laga naturalesa y medio bira yiu di crianza

E ambientalista a bisa cu e ta spera cu na momento cu bin cu un programa di gobierno di un eventual gabinete Wever-Croes II, cu ta bay wak bon na e coherencia di diferente servicio, direccion y portofolio denter di cada Ministerio, pa asina e trabaonan entre e Ministerionan ta sostene y hasta fortifica otro, pa asina “percura pa evita cu algun area di responsabilidad pa bira yiu di crianza y ta hala nan un banda. Ideal ta pa cambio di e tareanan ta logra un Gobierno mucho mas logico cu tin como meta, un miho sociedad,” mr. Sybesma a bisa.

(Articulo ta continua riba pagina 7.) 

.