Anderson Cooper a bira tata, un evento importante cu e presentador di CNN a bisa cu pa hopi tempo e no kere lo ta posibel.

Cooper a anuncia e nacemento di su yiu homber, Wyatta, diahuebs anochi riba su show y den un post largo riba Instagram. Su yiu homber a nace dialuna via un sustituto, segun e presentador, y tin nomber di Anderson su tata, kende a fayece tempo e tabatin 10 aña di edad.

“Dialuna, mi a bira tata. Mi nunca a bisa esey den voz halto, y ainda ta asombra mi”, Cooper a bisa den su show ‘AC360’. El a bisa cu el a sinti cu tabata importante, memey di storianan di esunnan cu ta sufriendo y muriendo durante pandemia di coronavirus, pa ‘tene na momentonan di alegria’. E segmento a inclui varios potret di e baby.

“Como un mucha homosexual, mi nunca a kere lo ta posibel pa tin un yiu, y mi ta gradici pa tur esunnan cu a habri caminda, y pa e dokter y enfermeranan y tur persona involucra den nacemento di mi yiu”, Cooper a skirbi riba Instagram. “Mas cu tur, mi ta gradici na e sustituto remarcabel cu a carga Wyatt, y a cuid’e cu amor y cariño y a duna luz na dje/”

Cooper, di 52 aña di edad, a bisa cu e ta lamenta cu su mayornan y su ruman no tabata na bida pa conoce si yiu. Mama di Cooper, Gloria Vanderbilt a fayece na juli cu 95 aña di edad.

E post riba Instagram a inclui un potret di Cooper alimentando su yiu cu un boter. E segundo nomber di e baby, Morgan, tambe ta un nomber di famia. E tabata un nomber cu su mayornan a considera pa Cooper, segun un lista cu el a haya recientemente.

LEAVE A REPLY

Please enter your comment!
Please enter your name here