Na 2016 ya tabata bira publico e separacion di un di e parehanan mas consolida di Hollywood, esun forma pa actornan Angelina Jolie y Brad Pitt. E ruptura, despues di un decada hunto y seis yiu, a bin cu acusacion fuerte de por medio. Awo Jolie a sorprende cu declaracionnan candido tocante con malo e tabata den su ultimo añanan di matrimonio cu e eterno galan di Hollywood.

Den un recien entrevista cu Le Figaro, Jolie a ofrece algun detaye tocante e fin di su storia di amor. “Tabata un momento complica, mi no tabata reconoce den kico mi a converti, mi tabata mas chikito, como insignificante”, e atriz di 45 aña di edad a confesa. “Mi tabata sinti un tristesa profundo y berdadero, mi tabata herida.”

No obstante, Jolie a rescata algo bon di tur esey y a describi e momento como un punto ‘interesante pa bolbe conecta cu e humildad y incluso e insignificancia cu mi a sinti. Na final esey por ta lo mas humano’, el a expresa.

E actriz a bisa cu lo mas dificil despues di e separacion tabata haya su mes y recupera di algun problema di salud. “Mi tin cu descubri alegria bek”, el a bisa. P’e, e papel di mama ta riba tur cos y e ta dedica completamente na criansa di su seis yiu. “Mainta, mi ta lanta mama. Awe, mañan atrobe y pa semper, pasobra unabes bo converti den progenitor bo ta pertenece na otro sernan, no ta pertenece completamente na bo mes mas.”

Tocante su bida na Los Angeles, el a laga cla cu e ta biba eynan pa su ex: “Realmente mi no ta pega na e ciudad aki. Mi lo prefera biaha cu mas frecuencia, pero no ta compatibel cu trabou di Brad. Ami ta coopera.”

Tocante su momento actual, el a reflexiona cu semper e ta busca libertad. “Mi tin un cas den fondo di selva, y nunca mi a nenga di bay na teritorionan den conflicto. Mi ta traha na ONU. Mi ta haci esfuerso pa biba experiencia cu mi ta considera necesario pa mi construccion como ser humano.”