Animalnan exotico ilegal no ta na Aruba mas

Aña pasa den luna di october animalnan exotico a drenta e isla ilegalmente via un boto, cual a lanta hopi stof. Pa despues e asunto a keda keto keto. Bon Dia Aruba a follow up riba esaki. Ministerio Publico ta informa awor  cu e animalnan no ta riba e isla mas.

Departamento di Salud Publico a publica un relato aña pasa october algun dia despues cu e animalnan a wordo descubri, pero no a sigui informa nada mas despues di esaki. Ultimo cu nan a laga sa ta cu no a haya ningun papel di declaracion di salud di e animalnan of otro documentacion di nan. Aunke con bon e animalnan ta mustra di pafo, ora test nan por haya indicacion si e animalnan ta carga cierto malesa cu nunca a yega di wak na Aruba. Esaki por forma un peliger pa nos animalnan domestico y di cria, como tambe pa hende. Pa e motibo aki a dicidi pa laga e animalnan keda por lo menos 3 luna den cuarentena, unda cu departamento di Salud Publico lo aparentemente mester a carga mayoria di gastonan.

Ultimo cu nan a laga sa den october, ta cu e animalnan tabata den bon condicion y bon cuida. Nan tabata den palabracion cu un grupo di interesado cu kier a tuma e animalnan na encargo, gastonan di tratamento y cuarentena di e animal. Esaki cu e condicion cu despues di e periodo di cuarentena, e animalnan aki wordo adopta den exterior. Den e grupo di interesado tabata conta cu Veterinario tambe.  

Bon Dia Aruba tin algun siman ta purba di haya algun informacion riba con a para cu e animalnan aki, e control riba e malesanan, si mas animal a muri of no (2 parha a fayece ora nan a yega)  pero nos no a haya ningun reaccion ainda. Nos a bishita Veterinaire Dienst kende ta bisa nos cu no por divulga nada sin permiso di Departamento di Salud Publico. E departamento aki a bisa nos un luna pasa cu lo brinda nos e informacion aki pronto pasobra ta colectando tur data.

Aña pasa
Wardacosta di Corsou a detecta un boto cu nabegacion sospechoso den e awanan teritorial di Aruba aña pasa unda a topa cu un cantidad di animal exotico. A bordo nan a haya un gran cantidad di animal exotico: 4 yiu di papagay, un laguarundi, un ocelot, 11 tucan, dos Tamarin Monkey, tres Cocker Spaniel, un Great Dane, un Bull Terrier y 6 turtuga. A haya tambe sigaria y un cierto cantidad di gasolin. Tur cos a wordo confisca y e capitan aparentemente mester a haya un boet como cu e boto no tabata tin documentonan cu ley ta exigi, manera cu nos a informa e tempo di e sucedido.

Mayoria di e bestianan aki ta cay bao tratado di Cites (convencion internacional di flora y fauna den peligro di extincion) pues nan ta protegi. No tabata cla y ainda no ta mucho cla pakico a bini cu e bestianan na Aruba.

For di Ministerio Publico nos no a haya sa tampoco ki tempo lo bay corte cu esaki. Y ainda ta keda un misterio kende ta e sospechosonan cu lo kier persigui.

 

You May Also Like

Gobierno ta reanuda e proyecto Culture and Heritage City San Nicolas

Despues cu Otmar Oduber a sali como minister di Turismo y Cultura for di ...

Segun papel Kadaster tereno a keda otorga na saliña Malmok

Manera nos a publica ayera, Departamento di Infrastructura y Planificacion ta keda insisti cu ...

A detene trahado di KIA cu a maltrata maestro di scol

Un tata rabia a maltrata un maestro di Commandeur Pieter Boer School na San ...

img_1443311380_415.jpg

Zonido duro diasabra procedente di Venezuela

ORANJESTAD –  Segun nos colaborador nan na NoticiaCla, ta hopi yamada a drenta diasabra ...

sindicato uni

12 sindicato a uni den Union Sindical di Aruba

Un total di 12 sindicato a sinta na mesa pa cuminsa trece e union ...