Trabaonan preparatorio a inicia riba e fin di siman cu a pasa riba Watty Vos Boulevard (Ringweg 3). E gastonan ta core den 180 miyon florin y e trabou ta planea pa finalisa den 30 luna.

E proyecto aki tin basta tempo den planificacion (40/50 aña) segun director di DOW, Marlon Croes ayera. Tabata tin varios obstaculo pa por yega na cuminsa cu e proyecto. Un di e mas grandinan tabata ta adkisicion di propiedadnan cual segun sr. Croes tur ta finalmente regla caba.

Otro obstaculonan tabata con lo bay traha e proyecto aki anto con lo financia esaki tambe. E compania encarga cu e proyecto ta Mota Engil Colombia. E prome fase di e proyecto aki ta coriendo for di rotonde di FCCA Wayaca bayendo direccion di edificio Ex Codemsa. E trabao total pa termina e proyecto completo ta programa pa augustus 2019.

Den e prome fase ta premira un trabao di dos luna y mey cu no lo stroba ningun trafico pasobra lo ta trahando banda di caminda, segun DOW. Lo ta creando dos via extra, mientras cu e caminda actual di rotonde di aeropuerto te na e crusada di ex edificio Codemsa lo keda habri normal pa trafico. E fasenan cu ta sigui despues ta e:  ‘green field’ , un tereno habri di San Barbola pa LG Smith Boulevard, sigui pa Sasaki direccion hospital. Lo ta bay trahando tambe riba acera y structura di e caminda.

E parti final cual segun e compania ta pa nan esun mas dificil ta e interconexion na Caya Ernesto Petronia. Director di e proyecto Joao Campos Forte: “Nos lo ta trahando riba un caminda cu ta hopi activo, e ta un desafio mirando e volumen di trafico.”

Pa e proyecto completo ta contratando contratistanan local cu alo menos 90 pa 100 trahado local cu un inversion total di 180 miyon florin pa henter e proyecto, asina nos ta wordo informa.

Propiedadnan cumpra
Tur e propiedadnan cu tin riba e trayectoria aki a wordo regla segun sr. Croes. “Nos tin cinco caso cu nos tin formalisa ainda. Acuerdonan y palabracionnan t’ey, tur ta firma. Aworaki nos ta den proceso pa caba di pasa e actanan na notaris pa formalmente e bira di gobierno.” E cinco propiedadnan ta cay den fasenan mas leu den e proyecto.

Lo recicla vegetacion
Director Croes ta laga sa tambe cu DOW a haci un estudio ambiental pa mira cua medida mester tuma pa por trece un balans entre naturalesa y rescate di loke wordo elimina. Den cooperacion cu Directie Landbouw Veeteelt en Visserij (DLVV) y Directie Natuur & Mileu (DNM), nan a haci analisis na con miho pa cuida nos medio ambiente door di tambe planta mata bek otro caminda. E matanan cu nan ta kitando,  lo bay Barcadera unda cu lo traha compost di nan. E kitamento a wordo critica den red social e ultimo dianan aki.

DOW ta conta cu artesonan local por haci uzo di e resto di e vegetacion, recicla esaki den forma di arte. Gran parti di e restonan di vegetacion/tronconnan di mata lo wordo uza door di contratistanan pa uza den e proyecto.

Lo mantene comunidad informa
Regularmente DOW lo duna informacion na comunidad di e progreso di e trabaonan relaciona cu e proyecto aki segun sr. Croes. Ringweg 3 y Watty Vos Boulevard lo diversifica e distribucion di trafico for di nos aeropuerto pasando den diferente barionan rond di Oranjestad, te na crusada di Guardian – Sun Plaza. Ta bay tin reto y dificultadnan durante di construccion y for di awo DOW y contratista Mota Engil ta pidi comunidad comprension, pasenshi y cooperacion. Sr. Croes: “Pasobra na final e recompensa lo trece alivio grandi y oportunidadnan nobo pa progreso pa henter e comunidad.”