Habitantenan di barionan alrededor di Parkietenbos ta hopi preocupa door di e contaminacion cu kimamento ta trece pa comunidad desde varios aña caba, specialmente na e momentonan aki cu e malesa COVID-19.

Na luna di januari ultimo, Stichting Parkietenbos Aruba (SPA) a haci un recogemento di firma pa detene e contaminacion den barionan cu ta rond di e dump, asina a duna di conoce e relacionista publico di e fundacion, Aldrich Kelly. El a bisa cu nan kier pone un stop na e dos fuente ‘principal’ di contaminacion den e area di Ser’i Teishi y dump Parkietenbos, segun loke Bon Dia mes a relata den un articulo dia 28 di januari.

E accion di firma tabatin e obhetivo pa yega na Parlamento y tambe gobierno, pa asina e gobernantenan tuma e decision di stop e polucion cu ta tumando luga den e area for di basta tempo caba.

Di mesun manera, na luna di februari minister di Infrastructura, Medio Ambiente y Desaroyo Teritorial, Marisol Lopez-Tromp a reuni cu Stichting Parkietenbos pa trata e tema di maneho di desperdicio y preocupacion cu nan tin, pa asina por yega na un solucion na corto y largo plaso. Nan a palabra cu a keda den un contact structural cu SPA tocante e desaroyonan.

Tocante esaki, Bon Dia Aruba den dianan aki a haya e declaracion di un habitante di e area, Anouk Balentina kende ta un persona cu ta wordo afecta directamente y cu no a haya bishita ni contesta di parti di ningun autoridad of departamento di gobierno tocante e problema di contaminacion cu nan ta sinti dia pa dia.

Balentina a entama un caso den corte na luna di februari riba su mes, mirando cu Stichting Parkietenbos a recoge casi 2.000 firma y te ainda nada a wordo haci. Di e caso den cual gobierno a priminti hues cu den tres luna lo atende e molester di e dumpnan di Parkietenbos y Ser’i Teishi y cu lo soluciona e molester pa e habitantenan completamente, hues a no a sentencia, sino cu el a pidi Balentina pa warda e tempo menciona pa gobierno mehora e situacion riba un termino cortico.

Balentina a duna di conoce cu door di tur e problema – su yiunan a bira malo pa via di emision di huma – el a dicidi di tuma accion di bay corte. Pero e hecho ta cu Stichting Parkietenbos ta vocifera cierto cosnan, pero nan no tin e autoridad pa cumpli cu nan, pa motibo cu nan no ta representa ningun habitante di e barionnan.

Balentina a comenta cu nan a trece dilanti e problematica den diferente ocasion cerca e minister concerni, Lopez-Tromp. Nan ta señala cu e stichting a recauda firmanan te di hendenan cu no ta biba den e bario. Tampoco meneer Kelly no ta representa nan. Nan kier wordo scucha, aunke el a manda varios carta pa gobierno, e no a haya ningun contesta.

“Ta dificil pa confia den un hende cu solamente e ta wordo scucha y a nos cu ta habitantenan humilde no ta wordo scucha”, Balentina a manifesta.

Na e momentonan aki, ta sigui kima na e dumpnan y desde aña 2016 nan a mester remedia esey y no a bin cu ningun solucion. “Tur otro cos ta bira prioridad”, Balentina a señala. Asina tambe Bon Dia Aruba, durante un conferencia di prensa, a haci un pregunta na Lopez-Tromp di kico ta pasando cu desecho medico y cadavernan cu ta sigui kima den aire liber. El a contesta cu efectivamente esaki ta sigui wordo kima den tempo aki di COVID-19. Mientras cu un articulo di website World Economic Forum di dia 15 april di 2020 a specifica cu e personanan cu ta biba cu un calidad di biento malo lo por ta mas suceptibel pa e enfermedad aki y cu e particulanan transmiti via aire por yuda den e propagacion di e virus.

Desde aña 2016 a cumpra un incinerador pa Parkietenbos cu te dia di awe no ta funcionando, loke ta causa cu tin cu kima desecho den aire liber y causa molestia pa comunidad.

Dia 20 di mei Balentina mester bay corte atrobe y door cu gobierno a manda busca un abogado di Corsou, segun e mes a expresa: “E urgencia aki cu e peliger di COVID-19 ta un cos cu mester wordo atendi. No ta un cos cu nos mester warda pa busca expertonan di afo pa pone traha e incinerador – cu tin hopi aña para – mientras cu ta trece dokternan stranhero pa hospital”, Balentina a bisa.

Pa finalisa, e ta resalta e hecho cu aworaki un grupo chikito so ta wordo scucha y e habitantenan cerca di Parkietenbos no ta wordo scucha. Loke e ta pidi ta pa nan stop di hiba y kima e desecho medico di hospital y cadaver, cu ta manda holo stinki pa nan. “Aworaki cu e malesa Covid-19 esaki ta un motibo pa actua”.

LEAVE A REPLY

Please enter your comment!
Please enter your name here