E presupuesto aproba 2020 a bay pega na unda por a bisa di antemano cu e ta bay pega: cerca CAft cu pa ley mester duna un evaluacion di e documento aki. Y e puntonan riba cual el a pega tabata di anticipa. Gobierno a haci cambio drastico, completamente comprensible, den e recursonan necesario pa sobrevivi e aña aki. Pero… no a haci cambio den e gastonan programa. Naturalmente no ta asina cu no a haci nada mas despues. A sinta na mesa cu e sindicatonan, por ehemplo, pa yega na cierto austerisacion den gasto di salario y compromiso di dunador di trabao, pero hopi otro asunto no a ser atendi ainda.

Esey a bin dilanti tambe den e tratamento di e presupuesto di DOW pa e aña aki, unda tampoco a haci cambio, y aparentemente e urgencia pa por tin e presupuesto aproba pa por usa esaki, a forza un decision faborable den parlamento. Cu esaki a ignora asunto manera overtime programa, y gasto di experto externo cu ta core den miyones, ademas di e lista di proyecto cu no ta publico, pero cu e parlamentarionan a haya ‘ter inzage’ durante tratamento. Ey a surgi e discusion cayente cu dos miembro sostenedor di e coalicion, cu no a gusta pa nada cu a habri porta pa honra e proyecto di mehoracion di Aruba-huis, cu pa mayoria, logicamente, na e momento aki no tin ningun prioridad. Straño cu e ministro encarga asina mes no a distancia su mes categoricamente di un eventual implementacion di e proyecto aki.

En todo caso, tabata obvio cu no por continua sin cu ta pasa cu un peña fini den e presupuesto aki, pa mira bon unda por reduci gasto, pa asina minimalisa e placa cu mester bay fia pa cera aña. Ta di comprende cu den e conmocion di e crisis di coronavirus no a duna tanto atencion na esaki den publicidad, sigur no den e ruedanan di prensa di tur dia, pero lo ta di spera si cu e funcionarionan di Finanzas a cuminsa prepara e peña referi pa logra e reduccion di gasto aki. Di tur manera, e organismo di supervision mester haci su trabao y ta logico cu nan a confronta gobierno cu e peticion pa un presupuesto adapta, cu ta mas di acuerdo cu e realidad cu nos ta bibando actualmente.

E preocupacion di e colegio supervisor ta toca tambe e banda di entrada di gobierno, unda di mes e entradanan di impuesto lo ta hopi menos di loke nan ta den un aña regular. Pero banda di esaki ta cuestiona tambe e realismo di e entradanan di e empresa y entidadnan estatal cu ta entrega dividendo na gobierno. Ta aki unda gobierno a pone gran parti di su speranza pa ‘squeeze’ mas for di e entidadnan aki, mientras di mes caba, promer cu e crisis di coronavirus, tabata dudoso si nan tur lo a bay entrega tanto beneficio na gobierno, sin aumenta e peso riba e poblacion via aumento di nan tarifanan. Pero, despues a bin Covid-19 y cos a bira mas scur ainda.

Ademas, tabatin e entradanan riba cual CAft tabatin un duda caba, manera e realismo di e entradanan di licencia pa companianan cu ta bay opera den cultivo di cannabis, esaki promer cu e crisis caba. Riba esaki e mandatario encarga a reacciona cu si e licencianan ey no fructifera, anto gobierno lo tin otro entrada incidental pa cubri esaki… Un observacion bastante straño, pasobra si bo sa sigur cu bo ta bay haya e entradanan ey, anto bo mester a pone nan den bo presupuesto. Pero enfin, nos ta bayendo den di cinco luna di e aña aki, y mirando e situacion economico local y mundial, ta dificil imagina cu e sector propaga asina fuerte aki, ta bay mira bida e aña aki. Y nos ta ripara awor, di mala manera, cu pa logra algo duradero, ta necesario planifica y traha duro. Ademas, si nos ta sigui e desaroyonan den nos region y mas leu, ta facil pa constata cu den e negoshi di pilar economico nobo no ta existi ‘silver bullet’ di ningun tipo.

Cu e perspectivanan aki manera nan ta, nos mester aprecia tur yudanza cu nos por haya. Esaki no ta e momento pa busca problema, y ta di spera cu nos mandatarionan lo mustra e madurez necesario pa haci loke ta necesario pa nos por pasa e aña mas dificil di historia di Aruba aki. E situacion actual no ta obliga nos solamente contempla loke mester adapta e aña aki, sino cu e mester sirbi pa planifica presupuesto pa otro aña tambe. Ta mei caba, y den un aña regular na luna di juni ya mester tin un claridad di e gastonan coriente y repititivo di gobierno, pa por ‘rond af’ na tempo pa entrega presupuesto na Staten 1 di september, pa mas tarda. Mirando e asunto di e banda ey, ta mas cu logico cu na e altura aki mester ta conoci kico ta corta e aña aki, pa sa kico ta presupuesta otro aña. Nos no por kere cu no a cuminsa cu e trabao grandi aki ainda. Asina ta, cumpli.

LEAVE A REPLY

Please enter your comment!
Please enter your name here