‘Artesania local ta cabando’

Bon Dia a combersa cu algun artesano local cu awor ta bende nan arte na e kiosconan nobo di  Welcome Plaza.  Hopi di nan ta comparti sentimentonan similar; cu nan ta stima nan arte pero ta sumamente dificil pa biba di esaki na Aruba.  Nan ta bisa cu aparentemente artesania local ta cabando na Aruba y pronto no lo tin casi nada mas pa motibonan di entre otro e competencia di locual ta bini di exterior.

Artesano local Trudy Lampe ta bisa cu pa basta aña caba e artesanonan local ta purba conscientisa comunidad riba artesania di Aruba. Su persona mes a bira mas consciente ora cu el a bini bek di exterior anto mira producto ta wordo bendi cu no ta di nos.  Artesanonan local a cera un grupo algun tempo atras pa ta mas consciente pasobra segun sra. Lampe: ‘nos producto local a cuminsa caba’. E artesano ta bisa cu hopi artesano a cuminsa sinti disgusta y no ta trahando mucho mas, te hasta a perde speransa completo. “Pa motibo cu no por competi cu locual ta bini di afo. Un articulo cu por ta ami tin cu bende pa cinco dollar cu ta super barata pasobra e ta pinta na man cu dedicacion.
Pero bo no por competi cu un cos di afo cu nan ta bend’e retail pa dos of un dollar.”

Mercado hopi inhusto
E artesanonan ta haya cu e mercado ta hopi inhusto. Varios artesano di antes a stop di traha awor.  Actualmente tin un trend cu a cuminsa, pero segun sra. Lampe, ta masha tiki hende local mes ta haci e trabao aki di artesania di Aruba, cual ta carga realmente e sentimento di e isla. “Bo por conta den bo man cuanto tin.” Sra. Lampe ta un artesano cu ta purba di biba di su obra como artesano anto e no kier retira ainda pasobra esaki ta parti di su protesta tambe. Pa mustra cu por motiva esunnan cu kier cuminsa of ta haciendo artesania, pero e no ta facil. Otro punto ta cu hopi biaha e artesanonan ta haya e pio camindanan pa bende nan productonan.  Antes bo tabata haya artesanonan cu tabata constantemente traha pa bay e hotelnan pero e ta un trabao pisa pa carga mesa y producto.  Y awor bo ta mira varios caminda banda di area di hotel cu ta bini cu artesania di exterior y pone Aruba riba dje.


Edificionan bashi pa atelier
Sra. Lampe ta bisa nos cu un bon alternativa ta pa uza un edificio bashi manera na San Nicolas unda tin hopi, pa uza manera un atelier. Na luga di cada biaha laga ladronnan of adictonan drenta e edificionan y laga esakinan destrui, pa kico no colabora cu algun artesano local pa converti esakinan den galeria/atelier y asina mantene e luga, cual lo bira un atraccion tambe pa turismo segun sra. Lampe. “Hopi hende ta papia di Welcome Plaza ta pa artesano pero puntra cuanto artesano ta biba di nan arte? E ta un hustle tur dia pasobra tin biaha mi tin cu sinta pinta den madruga si mi tabata tin un dia bon. Pues e ta un topico un poco fastioso. ” Lo ta bon pa tin diferente artesano local cu no ta copia di otro pa e turista por tin escogencia tambe, cual no ta e caso actualmente segun sra. Lampe.  “Ami a cuminsa haciendo pottery, ora cu mi a wak cu e tin un mercado mi a cuminsa pinta cual e turista ta gusta.  Pues si no por cumpra e pottery cu ta tiki mas caro, por cumpra mi obranan. Mi kier curasha e Arubano local pa haci mas artesania pero bo mester dedica y haci sacrificio. Sin culpa solamente gobierno, nos mester purba traha cu e artesanonan y duna nan un iniciativa. Ami no por cobra barata pa mi productonan pasobra mi tin cu paga impuesto, huur y tanto otro cos.” Otro artesano ta splica nos cu pagando un huur na e localidad nobo, e casi no por mas. E mester haci extra esfuerso pa page y no por haci un otro trabao afo pasobra no por haci su artesania e ora ey, pues mester laga e parti di creatividad un banda y frustra su mes.

No tin control na kiosconan
Sra. Lampe a enfatisa cu e no kier ta asina critico y hinca politica den e asunto aki. Pero e kiosconan nobo a wordo traha pa nan tin un luga bunita pa artesanonan, anto e preocupacion ta keda si artesanonan por mantene un luga asina na prome luga cu e prijs cu nan ta pagando.  E shop di sra. Lampe por ehempel  no ta un tienda di souvenir, e ta mas un mini galeria. Pues e ta purba di mantene un poco nivel cu e productonan cu e ta kies pa e tin eyden, manera di otro artesanonan cu no por of a logra tin un kiosco/shop di nan mes, cu nan por bende nan producto cerca dje. E kiosconan nobo tin un contract cu reglamento pero tin algun cos caba bayendo for di man. Manera muziek asina duro cu bo no ta tende combersacionnan cu turista, anto e area nobo ta birando un tipo di flea market atrobe.  “Mi ta compronde pasobra por ta tin turista ta gusta e parti aki,  e ta atrae e hendenan. Pero tin ora e ta bay for di man unda mi ta haya toch nos tin cu tene nos mes un tiki mas na e reglanan. Pero manera semper, no tin control.”

You May Also Like

Plastic Beach Party hunto cu Divi Resorts a cuminsa recycle plastic

Cu e coleccion y reciclahe di plastic pa un di e cadena di hotelnan ...

‘Sperando di preveni otro area importante di naturalesa bay destrui’

Den cuadro cu e caso sumario recien entama por medio di Aruba Birdlife Conservation ...

auto curpa kima 2

Famia a reclama: donjo di auto curpa kima ta perdi

Update: E persona ta Alex Rojas-Paz. Lesa mas aki. Famia di e doño di ...

Indicacion fuerte cu a suspende Minister Paul Croes

Un rato pasa a drenta informacion di un fuente digno di confiansa cu tur ...

Departamento di Salud Publico.jpg

Director Departamento Salud bou investigacion

“En berdad ministerio di TVS a ricibi no solamente un carta sino henter un ...

E dos cara di matthew (3).jpg

E dos cara di Matthew

Durante su recorido den nos region Caribense, Matthew a mustra dos cara: Un di ...