Debate riba uzo medicinal of no ta cambia nada: THC ta prohibi pa drenta

E echo cu un producto medicinal of otro sorto di productonan traha a base di  tetrahidrocannabinol (THC), su uzo y benta ta legal den otro pais of estado, esaki no kiermen cu na Aruba e ta legal of permisibel pa bin cu esaki. “Aki na Aruba e ta prohibi pa drenta. Nos tin nos leynan di duana cu ta enforsa ley”, asina director di duana, Roderick Croes a declara.

THC ta e  principal constituyente psico-activo di cannabis of marihuana. Si THC ta bin den cualkier otro producto, e ta wordo considera como marihuana locual ta algo prohibi, segun director di duana. Aunke e parti di THC  ta wordo uza como tratamento medicinal sea den diferente forma y presentacion manera  crema y/of  oil te hasta mangel. Pero pa motibo cu den nos ley ta hinca cu e ta prohibi, duana ta confisca nan y e usuario e ora mester cana nan caminda hudicial.

Hopi biaha duana ta haya azeta di marihuana cu ta bin di Colombia y otro productonan cu nan a confisca caba. Pero tambe e ta haci un yamada na e hendenan cu ta bay Merca hopi pa tene cuenta unda nan ta bay, ayanan e productonan aki cu THC por ta legal. Tin diferente website na Merca cu ta bende e productonan aki locual ta un indicacion cu e por ta legal den e estado Mericano ey. Tin biaha e benta ta mara na un edad minimo.

Debate entre medicinal y ilegal
Un biaha mas e debate riba cannabis tocante su uzo medicinal  no a start, ora cu recientemente duana a confisca di un turista na aeropuerto algun tipo di mangel traha a base di THC. E turista a argumenta cu e ta pa su propio uzo. Pero esaki no ta un caso isola. Regularmente duana cumpliendo cu su trabou a yega di confisca productonan traha a base THC, caminda e persona ta bisa cu ta medicinal y uzo personal. “A nos no ta bay over cu e ta medicinal of no, anos ta bay over cu e ta ilegal y e no mag di drenta.”

El a bisa cu duana ta traha cu risico y esaki ta depende for di unda e vuelo ta bini, ken ta bin riba e vuelo, y kico ta e risico cu tin. Pues  a base di esey duana ta controla pa medio di e autoridad cu nan tin pa realisa nan trabou y e necesidad cu tin pa controla.