“Olga Gabrielle” ta e nomber artistico di Olga Gabrielle van Bochove, un artista plastico kende pa varios aña ta bin trahando riba un proyecto nobo. E ta un persona hopi cauteloso pa revela mucho riba su proyecto artistico nobo ‘Uncollectible’, subsidia door di Prins Bernhard Cultuurfonds.

E serie di obra ‘Uncollectible’ ta wordo presenta den un caha nechi. E ta un concepto cu e artista a yega di traha algun tempo riba dje. E artista aki ta hunga un rol central den su mesun obranan. Olga Gabrielle ta describi su obranan como un experiencia personal.

“E no ta un sentimento cu mi kier expresa. E ta un experiencia…” Logicamente e ta haya cu e sentimento tin mas cu haci riba loke un persona ta sinti, ora cu e tin contacto cu su obranan. Pues e no sa ki sentimento su experiencia personal expresa den su obranan por lanta cerca cierto personanan, ya cu e ta nan interpretacion subhetivo.

E no ta considera su mes como un modelo den su obranan. Considerando cu e ta papiando di experiencia personal, Olga Gabrielle ta uza su curpa pa comunica esaki pa medio di imagennan carga cu hopi plasticidad y beyesa.

E ta un combinacion di espacio y curpa. E espacio nan a wordo scogi pa e artista mes. Pero tambe e forma artistico cu e ta posiciona su curpa. E ta algo cu e ta haci cu performance. Algun di e imagennan ta compaña cu textonan inspira y skirbi p’e. E no ta cualifica nan como texto gewoon, sino como imagen tambe.

 

E artista aki a studia arte scenico na Universidad di Antioquia na Medellin, Colombia. E facultad aki ta haci enfasis riba e curpa pa medio di diferente tecnica y disciplina cu tin di haci cu e parti corporal pa escena y performance. “Nan ta imagennan di investigacion, creacion, espacio unda mi ta invita otro persona pa bin haci e toma (di e potretnan).”

E potretnan cu ta un obra di arte ariba su mes, ta ilustra espacionan local cu a wordo scogi debidamente durante un periodo di casi cuater aña. Nan ta espacio caminda e artista ta trata di tin un dialogo pa asina describi su experiencia personal.

Trabou artistico

El a cuminsa cu e proyecto aki haciendo su experiencia artistico parti nort di Aruba. El a bisa cu a sinti manera un ‘forsa ancestral’ den e sitionan aki. Nan ta potretnan cu a wordo procesa como un joya fini den tayer fotografico profesional cu recursonan digital y manual. Pero tambe diferente tipo di material y tecnica pa realisa e imagennan miho.

Un tecnica cu a wordo haci ta serigrafia, cu ta demanda un proceso di dos dia pa bo por yega na un imagen. El a yega di haci uzo di tecnica hopi special pa medio di mashin di tayer tipografico cu ta data di siglo 18.

E relacion aki entre e autor y su obra ta asina intimo cu Olga Gabrielle ta evaluando e forma con e ta bay introduci su trabou artistico. “E ta un cos asina intimo cu e ta bay perde su magia si mi bay pon’e on line.” E introduccion di ‘Uncollectible’ lo tuma luga den un evento intimo cu un grupo di invitado cu lo comparti cu e artista su obranan.

LEAVE A REPLY

Please enter your comment!
Please enter your name here