Comunidad a sali pa haci compras nervioso pa via di coronavirus

Ayera mainta door di e confirmacion di e casonan positivo di coronavirus na Corsou, comunidad di Aruba a cuminsa sinti e efectonan di ‘panico’ pa loke ta trata esaki.

Bon Dia Aruba a bishita algun supermercadonan y botica pa wak con e situacion tabata bayendo ya cu den parkinglot di varios di nan tabatin rij pa drenta y e hende no tabatin espacio pa para nan auto.

Den esaki, por a mira cu e comunidad ‘a bira loco’ y a sali for di cas pa haci compras nervioso specialmente di awa, papel di WC, cuminda den bleki, aros y pasta, den oranan di atardi a keda conoci cu e benta di algun di nan a wordo restringi den un supermercado grandi.

Asina tambe nos por a constata cu boticanan a cuminsa limita e benta di Paracetamol, personanan cu mester di dje por cumpra dos caha so cu botica tabata bende pa persona.

Den e botica e articulonan mas solicita aparte di e medicina menciona, tabata hands sanitizer, wipes pa babynan y alcohol, stock di mascarada a wordo agota caba.