Ta un realidad cu humanidad no lo bolbe normalidad cu e pandemia aki cu ta suta henter mundo, te ora cu mundo cientifico por haya un vacuna contra Covid-19. Ya caba Aruba a mustra su interesa pa tin acceso na dje, segun e minister di Salubridad Publico, Dangui Oduber.

 

Tin un carera entre paisnan y laboratorionan pa wak cual di nan lo por logra cu exito un vacuna cu ta cumpli cu exito tur prueba clinico. Tin pronostico hopi positivo cu eventualmente humanidad lo conoce un vacuna contra Covid1-19, prome cu fin di aña 2020.

 

Ayera Rusia a anuncia cu nan tin un vacuna aproba y registra contra coronavirus. E vacuna aki ta wordo desaroya pa instituto Gamaleya, y el a wordo registra despues di dos luna di prueba cu ser humano. Te aworaki tin tres vacuna den fase III di prueba. E fase aki ta encera cune cu e vacuna ta wordo poni na miles di persona. Nan ta wordo monitor cuanto di nan ta wordo resulta cu e malesa, compara cu esunnan cu a haya un vacuna fake of placebo. Esaki ta e fase mas largo y complica, unda speransa riba hopi vacuna ta bay perdi. Actualmente tin seis vacuna den fase III, entre nan, esun di BioNTech/Pfizer y Astra Zeneca/ Universidad di Oxford.

 

Pero, unabes cu e vacuna lo bira un realidad, y e lo wordo aproba entre otro pa Organisacion Mundial di Salud (WHO), ta cuminsa un reto logistico pa fabrica miyones di vacuna pa asina e poblacion mundial por hay’e. No tur pais lo ricibi e vacuna den e mesun tempo, y tampoco den e cantidad cu nan poblacion tin mester di dje. P’esey varios paisnan a cuminsa cana e caminda diplomatico pa nan wordo poni riba e lista di prioridad. E lista di prioridad lo ta e trahadonan sanitario y personanan di risico y despues e resto di nos poblacion mundial. E por dura no solamente lunanan sino añanan pa tur hende hay’e.

 

Bon Dia Aruba a acerca e mandatario cu e pregunta si Aruba tambe a cuminsa sigui e ehempel di otro paisnan cu a cuminsa haci lobby cu e laboratorionan potencial cu ta trahando riba e vacuna anti-Covid. Minister Dangui Oduber a laga sa cu ya caba su ministerio ta den coordinacion cu gobierno Hulandes. Ta conoci cu durante e temporada aki cu Covid a bin Aruba a wordo fortalece un cooperacion intenso entre Departamento di Salud Publico (DVG) y Rijksinstituut voor Volksgezondheid en Milieu (RIVM) di Hulanda.

El a laga sa cu ora e prome vacuna ta wordo aproba, gobierno Hulandes lo yuda gobierno di Aruba pa asina nos poblacion por tin accesibilidad na e vacuna aki.

LEAVE A REPLY

Please enter your comment!
Please enter your name here