Aruba ta confrontando un crisis di salud sin precedencia y riba dje, un cirisis economico. Pero e cantidad di infeccion cu Covid19 ta asina grandi cu si no bin un control mesora, no ta keda otro opcion cu bolbe sera e pais, y laga hende keda cas pa evita mas contagio.

 

Epidemiologo Maribelle Tromp a observa un cantidad di strategia cu a faya. Entre otro, idea cu mester depende di testnan pa claridad. Den e caso aki, a haci miles di PCR test pa identifica casonan di Covid19. Pero, e cantidad di resultado positivo/ negativo a laga hopi duda atras.

“Un PCR test ta hopi sensitivo, cu awor aki tin hende cu no tabatin sintoma a test positivo y despues ta test negativo. Pues tin un problema. PCR no ta un test pa screen cu ne y no ta e miho test pa un evaluacion di masa. “Ami lo a mantene na personanan cu tin sintoma y testnan. Pasobra tin su foutnan di false positive/ false negative. Datonan e ora no ta bay ta cuadra.”

 

Pa Gobierno tuma decision clave manera medida di intervencion y prevencion, e datonan mester ta hopi cla y sigur.  “E cifranan pues no ta ‘zuiver,’ nan no ta corecto.” Pa tal motibo mes e testnan so no ta base pa medidanan. Mester a haci un investigacion epidemiologico profundo, na momento cu a habri frontera dia 10 di Juli, ya e casonan a cuminza lanta e momento ey. Esey ta nifica cu e virus a cuminza circula. Locual mester a haci ta tuma medida di precaucion mesora, manera pa avisa comunidad pa no bay den luga cera, unda tin hopi hende. “Nos a lubida esey. Mas ainda ta cu manera ma bisa caba, nos tabata sa cu asina nos habri e frontera cu un pais cu tin hopi virus, nos ta bay haya caso, y e medidanan mester ta hopi mas streng. Pero nos a laga bay.”

E fastioso di e malesa ta cu mayoria ta haya sintomanan hopi leve. Por ta un dolor di cabez, un tosamento cortico.

 

“Nos ta hopi naive e banda ey. Riba dje, hopi trahado sa cu si mester bay dokter di cas, nan lo mester bay den cuarentena y ta nifica perdida di dia di trabou, y e no ta cumbini nan economicamente. Hende ta keda hende, y mester compronde nan situacion.  Ami si lo a bisa, warda pa habri Aruba un rato mas. Awor aki ta atendiendo cu dos crisis grandi cu ta esun economico pero tambe di salud.”

 

Cuarentena

Tromp a hala un rosea profundo ora cu a puntr’e riba e protocol pa esnan cu tabatin contacto cu personanan positivo, pero no tin sintoma, cu nan por sigui bay traha pero tumando medida di proteccion. “For di locual mi sa di epidemiologia, esey no ta e paso cu mester tuma. Mi ta kere cu a tuma e decision aki basa riba motibonan economico. Riba su mes e no ta malo. Hendenan ta sigui traha, pero mester ta consciente cu asina cu nan tin sintoma cu nan mester bay cas. Pero e ora mester splica si, ki mask pa uza, con ta uz’e, ki momento ta uz’e, analisa ki trabou nan ta haci. Pero pa ami e no ta normal. Si kier termina un cluster, pa e virus stop di cana mester bay agresivo y manda tur hende den cuarentena.” Cierto momento si e cantidad di hende cu mester bay den cuarentena ta asina grandi, Maribelle Tromp ta considera cu e miho ta lock down. “No tin e capacidad di personal pa controla esnan den cuarentena.”

 

Falta di confianza
Maribelle Tromp ta adverti tanto Gobierno y DVG pa percura pa no perde confianza di e comunidad. Ora cu cada biaha ta cambia informacion, ta crea duda y esaki ta produci informacion robes y duda cerca personanan cu tin plataforma grandi riba media social. “Den un siman di tempo a cambia e maneho pa esnan den e cluster no menos cu tres biaha. Hende no ta bay confia mas, pues no tin credibilidad. Y asina comunidad ta bay haci locual  ta haya ta bon. “E asina yama ‘influencers’ cu ta bay cuestiona si mester bisti mask, y ya caba por mira esey y ta influencia e pensamento general E ora ta perde autoridad y hende no ta tuma bo na serio.” Na momento asina tambe, si no splica bon, hendenan cu no ta compronde e concepto. ta bay inventa nan mesun teoria.

 

E importancia di epidemiologia

Segun Tromp, Gobierno mester tin un epidemiologo na su banda pa duna guia den un situacion di pandemia. Eey ta e tarea di e experticio.  Tromp tabatin e experiencia pa 16 aña, unda mester a atende cu diferente epidemia, manera dengue, zika y hasta H1N1. Y decisionnan cu mester tuma no tur ora ta popular. Tromp a bisa cu el a haya hopi zundra di Ministernan y Directornan, otro autoridadnan pasobra e medidanan no ta facil y tin impacto economico.

 

Den caso di H1N1, el a hasta evita e barco Ocean Dreams di Pullman Tours pa drenta Aruba. E tempo ey, tanto Prome Minister, Minister di Turismo a protesta fuertemente y e compania  a hasta menasa cu lo hiba Tromp Corte pa su decision. Despues a bin Zika,  y e ‘outbreak’ di tuberculosis na hospital y un ‘outbreak’ na Divi Phoenix cu no ta conoci den comunidad, “pero cu Minister di Turismo a bis’e di lo mand’e cas. E no ta desconoci como epidemiologo cu bo mester ta fuerte para, y sa di kico bo ta papia di dje y ki medida ta tuma pa proteha henter un comunidad.” Decisionnan asina hopi biaha no ta popular economicamente y politicamente. Den su concepto, e no ta logico pa tuma decision riba salud publico sin un epidemiologo.

 

Aruba ta den un situacion particular. Epidemiologia ta yuda un pais, atende cu crisis ora cu nan lanta cabez y ta netamente yuda pa evita cu mester sera tur actividad. Pasobra sin dato, e ta mas facil pa djis cera pa controla e virus.   Tromp ta di opinion cu Aruba ta sigui e pasonan di Merca, unda te hasta ta pusha pa muchanan bay scol. Y manda mucha chikito scol cu mask no ta realistico. Mester pensa kico kier. E no ta facil, pero si no tin tur hende infecta den cuarentena of den isolacion, ta dificil pa habri scol sin cu ta kere cu e virus lo sigui plama.

 

Segun literatura, epidemiologia ta e estudio y analisis di distribucion, patronchi y factornan di condicionnan di salud y malesa den populacion. E ta e fundeshi di salud publico y ta determina decisionnan di maneho y practicanan basa riba datonan concreto. Epidemiologonan ta yuda diseña investigacion, coleccion y analisis di estadisticanan, ta ahusta interpretacion y ta disemina resultadonan. Epidemiologonan ta yuda desaroya metodologia cu ta uza den investigacion clinico, estudio di salud publico y ademas, investigacion basico den ciencia biologico.

LEAVE A REPLY

Please enter your comment!
Please enter your name here