Aruba lo ta anfitrion di e conferencia internacional tocante cambio di clima, biodiversidad y habitabilidad di e islanan den october di proximo aña.
E conferencia aki lo marca e di 4 edicion di Turning the Tide, cual lo tuma luga na Universidad di Aruba for di dia 11 te cu 15 di october.
Turning the Tide lo uni investigadornan, creadornan di politica, y representantenan di e teritorionan isla for di rond di mundo. E punto central di dialogo lo ta e desafionan cu estadonan y regionnan isla ta enfrentando, manera cambio di clima, e presion riba ecosistemanan y e balans entre desaroyo economico y habitabilidad.
E conferencia ta organisa en colaboracion cu varios universidad y institucionnan internacional. Consistiendo di panelnan, workshop, presentacionnan cientifico y contribucionnan creativo, e programa ta prometedor y ta mustra di ta uno cu ta cubri varios area, cual ta duna e evento un caracter academico pero social tambe.
Oficialmente e conferencia lo tuma luga den aña 2027, sinembargo for di e aña aki e proceso di preparacion a cuminsa caba. Dia 1 di juni, e prome yamado pa proposicionnan pa panel y workshop lo keda emiti, cu e deadline pa haci esaki stipula pa dia 15 di september. Despues di esaki, e contribucionnan selecciona lo keda anuncia den mita di october.
Un yamado mas amplio pa rapportnan cientifico lo sigui den comienso di november, cu un deadline stipula pa januari di 2027.
E organisacion ta anticipa cu e conferencia aki lo provee un plataforma pa intercambio di conocemento y experiencianan entre regionnan isla na nivel mundial.
Cu e tema di un bon bida riba e islanan, e enfoke no ta solamente riba e problemanan ambiental cu e islanan rond di mundo ta enfrenta, pero tambe riba con e islanan aki por sigura y proteha nan habitabilidad y bienestar a largo plaso.
