Pa 5 dia largo, hungando sigur 2 pa 3 wega pa dia, e team di Aruba a participa na e “Beach Tennis World Team Championship 2019” na Moscow, Rusia.

E aña aki, Aruba a wordo representa pa Aksel Samardzic, Sander Castro, Louis Posner, Eugemine Ignacio y Maartje Heerkens. Pa sigur 3 di e hungadonan, nan prome experiencia den un torneo asina grandi. Aksel y Sander a participa caba den 2018 y tambe tin mas experiencia cu torneo nan internacional. Louis Posner, un di e prome nan cu a cuminsa practica e deporte aki na Aruba, kende no ta residencia na Aruba, pero a keda hunga bou di bandera di su isla, tambe a keda practica e deporte, no unicamente na Hulanda, sino tambe den torneo nan den full Europa y sigur tur aña ta nota su presencia den November durante e ITF event organisa pa Beach Tennis Aruba.

Pa recapitula un rato e historia di e Mundial di Beach Tennis, den 2012 esaki a cuminsa cu un total di 15 pais. Den 2013, un total di 20 pais. Den 2014 por a nota un cremento atrobe den participacion, caminda 24 pais a participa den e mundial, Den 2015 mas pais a dicidi di participa, cu a hiba e total na 28 pais. E sorpresa e aña aki tabata sigur e pais anfitrion, cual ta Rusia. Italia a logra mantene nan titulo di campeon pero Rusia a logra kita e segundo luga for di Brazil. Aña 2016, e record di mas halto di participacion cu un total di 32 pais, tabata tin ainda mas sorpresa. Rusia no a keda contento cu e di dos luga y a pasa pa bay cu e titulo mundial den Beach Tennis lagando Italia na di dos luga. Den 2017, cu un total di 24 pais cu ta haci lo maximo pa defende nan pais lo mayor posibel, Italia ta reclama nan posicion como e campeon nan di Mundo y Brazil ta logra bin bek y ocupa e number 2 di mundo lagando Rusia na di tercer luga.

Pa loke ta 2018, e mes un 3 pais nan a keda cu e puestonan di honor, pero e biaha aki Brazil ta tuma e titulo di campeon, sigui pa Italia y na di 3 luga Rusia. Pa 2019, tin un total di 16 pais confirma, cual ta: Italia, Rusia, Francia, Alemania, San Marino, Japan, Aruba, Chile, South Africa, Morocco, Poland, Latvia, Brazil, Portugal, Spaña y Venezuela.

E resultado nan di 2019 no ta loke e ekipo di Aruba a prepara pe. Terminando na di 12 puesto den 2018, sigur ta haci cu bo kier termina mas halto, pero lamentablemente Aruba ta termina na di 14 puesto. E ekipo di Brazil a retene su titulo, na di dos luga Rusia y na di 3 luga Italia

Mas den siman nos lo busca un entrevista cu e hungadonan cu a bay Rusia, pa nos por scucha di nan mes, dicon den un deporte asina facil pa entrena na Aruba, 365 dia pa aña solo, cu nos beach nan y tambe sitio amplio y apto pa entrena, ainda nos no ta logra keda den e grandi nan rond mundo

 

LEAVE A REPLY

Please enter your comment!
Please enter your name here