Carnaval 2023 oficialmente a cuminsa ayera dia 11 di november unda SMAC a duna di conoce e jingle nobo di e temporada aki, cual ademas ta dedica na e locutor conoci Ruben Garcia, ken a fayece di manera inespera siman pasa.

Di su parti Darren van Ommeren, presidente di SMAC durante un conferencia di prensa a informa cu nan a tuma over e aña aki e reto pa dirigi Aruba su carnaval pa e siguiente dos aña binidero.

“Nos como board mas activo y hopi energetico nos ta bay zorg pa nos lo tin un tremendo temporada di carnaval cu ta inicia for di awe caba”, el a bisa.

Igualmente ayera anochi, caya Betico Croes a yena cu ambiente unda tambe nan a haci e actividad ‘Carnival Street Party’ pa asina ey ranca sali cu e presentacion di cinco banda, brassband y diferente DJ y gruponan di carnaval.

Representante di Stichting Musica cu tabata presente a duna algun palabranan di gradicimento na e personanan y organisacionnan cu a yuda nan den e creacion di e jingle y na Ruben Garcia cu tabata forma parti di e evento grandi aki.

Finalmente, despues di dos aña unda celebracion di carnaval no por a bay door pa via di impacto di pandemia di Covid-19, e aña aki ta espera cu carnaval ta bay ta algo grandi unda cu por yuda sigui mehora e recuperacion economico di e isla.

Tambe a informa cu awe lo tin e prome final di Aruba Caiso y Soca Monarch na Centro di Bario di Dakota cu siguiente orden di aparicion Zeta Band, Tsunami, Mellow y Caribbean Band, otro siman diasabra 19 di november nan ta bay ta na Centro di Bario Playa Pabao cu Nfuzion, Sound and More, Suona , YX3M y Buleria cu lo cera e anochi y despues nan ta bay na Centro di Bario di Brazil dia 26 di november y e anochi lo keda inaugura pa Musical Time, Hot Ones Band, Azucar y Groove Masters.

LEAVE A REPLY

Please enter your comment!
Please enter your name here