exportacion Cbia pa Aruba a cay 1.jpg

Cu hopi preocupacion e pais bisiña di Colombia ta mira e caida di nan exportacion den nos region Caribe. 2016 a habri mal pa Colombia su exportacion, specialmente pa Aruba.  Nos isla ta e principal socio comercial di Colombia su exportacion den nos region.

 

Aruba principal socio den Caribe

Ta asina cu Aruba ta e destinacion principal di Colombia su exportacion den Caribe. Na 2011, 36% di e exportacion Colombiano den nos region a wordo manda pa nos isla.

E di dos destinacion cu un 20%, tabata Trinidad y Tobago. Entre e participacion di exportacion di producto no tradicional Colombiano pa nos region ta aparece di mayor pa menor productonan manera agro-industria, kimico, plastic y rubber, material di construccion, etc…

E profiel logistico di Colombia su exportacion pa e region Caribe ta mustra -segun Pro Export Colombia cu ta e instancia cu ta promove turismo, inversion y exportacionnan- cu Aruba ta e principal destinacion entre e Antillas Menores pa e productonan exporta fei Colombia.

E Antias Menor ta inclui: Antigua y Barbuda, Barbados, Dominica, Guadalupe, Granada, Martinica, San Cristóbal y Nieves, San Vicente y e Granada, St. Lucia, y Trinidad y Tobago. Ta asina cu Aruba ta exporta mas productonan Colombia cu otro islanan mas grandi y cu mayor poblacion pa ehempel: Colombia ta exporta pa Aruba 2.685.029 Ton, mientras cu pa Republica Dominicana, nan ta exporta 907.516 Ton.
 

Caida exportacion pa Aruba

Sinembargo, diabierna ultimo, Departamento Administrativo Nacional di Estadistica (Dane) cu ta un departamento na Colombia similar na Oficina di Estadistica CBS) di Aruba a revela cu Colombia su benta pa exterior a cay cu un 36,6% durante e prome luna di 2016. Nan a pasa fei US$2.902,8 miyon na januari 2015 pa US$1.840,4 miyon compara cu e mesun luna di 2016.

Durante e prome semester di 2015, Colombia a exporta 1,9 miyon ton pa Aruba. Esaki ta nifica alrededor di US$ 628,4 miyon na balor FOB. Balor FOB ta nifica na Ingles “Free On Board”. E ta un clausula di comercio internacional cu ta wordo uza den transaccion di compra y benta, caminda e transporte di mercancia ta wordo realisa via lama.  E mayor volumen di carga fei Colombia pa Aruba a wordo realisa  via maritimo, representando un 99,99% di e total di nan.

Segun Dane di Colombia pa ton metrico exporta e benta pa exterior a pasa fei 10,5 miyon ton na januari 2015 pa 8,7 miyon  ton na Januari 2016. Nan a informa cu e aña aki a cuminsa negativo pa locual ta e benta externo di nan productonan pa causa di e caida di e prijs di e petroleo. E organismo aki a informa cu e exportacion di combustibel y productonan industrial relaciona cu recurso energetico a registra un caida di 46,9%.

 

Na januari 2015, Colombia a exporta 24,5 miyon di bari di petroleo crudo, y  na januari 2016, nan exportacion a cay te 21,9 miyon di bari. Locual a nifica un disminucion di un  10,7%.  E disminucion di Colombia su benta na China, Aruba y Estados Unidos a resta nan un 17,2% di e variacion total di nan exportacion. Tambe Colombia su exportacion di nan productonan fabrica pa nan a cay, entre nan plastic, papel, carton, azeta, etc.

LEAVE A REPLY

Please enter your comment!
Please enter your name here