Cardiologo pashent AZv colombia.jpg

Cardiologo,  Dr. Antonio Figueredo tabata un di e oradonan invita durante e di cuater  simposio  anual “Bo Corason ta den Bo Man”, organisa pa Aruba Heart Foundation.  E ta e ciruhano cu a yega di opera  un gran cantidad di pashent local, cu nos seguro medico general, esta AZV a manda pa Fundacion Cardiovascular di Colombia na Bucaramanga.

Durante su presentacion el a mustra un indice di e resultadonan di nan intervencion cu nan pashentnan di Aruba durante e ultimo dos aña: cuanto pashent el a opera y cuanto –segun scala di riesgo- tabata e mortalidad spera di e pashentnan aki.

El a bisa cu naturalmente den un tipo di operacion asina e riesgonan ta uno halto. E ta un promedio di un 8% di riesgo di mortalidad. E ta considera e indice aki como “un riesgo modera pa halto”. Pero den nan practica real e riesgo a bira menos, alrededor di un 2%, locual ta wordo cualifica como “baho riesgo”. 

“Loke berdaderamente ta sosode ta cu nos tin un indice hopi baho di un 2% pa 3%”, el a declara na Bon Dia Aruba.

Profiel pashent di Aruba  

Fundacion Cardiovascular de Colombia ta brinda su servicio na e pashentnan di AZV den e area cardiovascular. Nan ta ricibi pashentnan for di Aruba pa diferente tipo di tratamento. Den su caso particular, Dr. Figueredo ta ciruhano Cardiovascular, y e pashentnan cu e ta ricibi directamente for di nos isla ta esunnan cu mester di un cirugia di curason. 

E profiel di e pashentnan cu nan ta ricibi mayoria di nan ta pashent di  riesgo halto. Esaki pa causa cu e factornan di riesgo manera hiper tension, diabetes, obesidad, etc… no ta bou control di un forma optimal. “Tur esaki ta haci den hopi caso e malesa hopi mas complica pa trata cu nan”, el a manifesta.

A base di su experencia na Colombia, Dr. Figueredo ta haya cu e indice di pashentnan cu problema cardiovascular ta halto na Aruba. Aunke e no ta maneha un estadistica directo riba e prevalencia di e malesanan na Aruba, pero e ta considera cu e malesa cardiovascular tin “un presentacion muy frecuente”.

Prevencion 

E simposio aki no solamente ta esun di comparti informacion, conocemento y experencia sino pa tur hende conscientisa su mes di biba un bida mas saludabel. Na nivel di conscientisacion, Dr. Figueredo a bisa cu e principal recomendacion cu e ta trece dilanti cerca nos poblacion ta esun di prevencion y modifica e factornan di riesgo. Ora e ta referi baha e factornan di riesgo e ta papia di estilo of habito di bida, entre nan: Mas mobilidad, comemento sano y balansa, control di hiper tension, no huma, control medico regular, etc… 

E control medico regular ta masha importante pa asina e pashent por check tempran e factornan cu ta contribui na e malesa cardiovascular. “Esaki ta lo principal cu nos mester tene cuenta cun’e pa evita di cay den e epidemia mundial cu ta e malesa cardiovascular. E ta e prome causa di mortalidad den henter mundo…”, segun Dr. Figueredo.

Otro punto cu Dr. Figueredo ta considera relevante pa nos comunidad tene cuenta cun’e y muy specialmente su pashentnan, ta esun di prevencion ya sea primario of secundario. El a laga cu bo no ta haci prevencion gewoon pa preveni un atake di curason of un malesa so. Sino cu despues cu e pashent ta haya su tratamento ta importante e prevencion secundario. 

“E prevencion secundario ta importante ya cu e tratamento cu nos ta haci normalmente no ta reacciona como un vacuna, pues nan no ta preveni”, el a bisa. 

Dr. Figueredo a agrega cu e tratamento cu nan ta haci ta cura e pashent na e momento ey. Pero si e pashent no ta sigui cu un bon estilo di bida e lo cay bek den e malesa aki. P’esey e ta considera casi mandatorio pa bin cu campaña di prevencion como esun cu Aruba Heart Foundation ta realisa.   

LEAVE A REPLY

Please enter your comment!
Please enter your name here