Cas di Cultura recientementea presenta e exhibicion ‘TROPICO CUBE’, un solo show crea por medio di artista local Laura de Vogel cu ta trece dilanti un tema hopi interesante pa contempla riba dje. Esaki a bira e di cinco y ultimo exhibicion di Cas di Cultura su programa AUA Exhibits 21-22, cual ta un serie di exhibicion presentando arte visual local bao di curaduria di historiado di arte Ana Maria Hernandez.

Cada exhibicion cu a wordo presenta na Cas di Cultura a consisti di nan mesun tema. Den caso di Laura, a cuminsa na mira kico lo por respresenta henter su trabao na un miho forma. TROPICO CUBE ta un investigacion artistico tocante e funcionalidad y identidad di e ideologia di e ‘White Cube’.

“Desde 2016 mi a cuminsa cu un serie di idea pa traha obra over di kico espacionan di exhibicion ta nifica. Y vooral den focus di kico ami a siña na scol, na academia na Hulanda, y mi ta kere hopi hende cu a studia arte aki asina a haya un educacion hopi enfoca na un perspectiva Europeo mescos cu mi. Pues mi a cuminsa cuestiona kico mi a siña y con esey a infiltra den mi ideanan over di arte y pa mi mesun obranan,” segun Laura ta splica. TROPICO CUBE ta ofrece un reflexion riba e buskeda di un formato pa presenta arte cu ta afina miho cu nos cultura y herencia na Aruba.

Cu e serie di ideanan cu Laura a contempla riba dje, el a cuminsa crea maneranan literal di presenta su arte – cu si bin cu e ‘White Cube’ idea pa Aruba, con esaki lo mustra? E lo ta di santo blanco, e lo mester tin cadushi, lo mester tin e tera cora cu nos ta haya den mondi, e por ta asina hopi cos cu ta autentico pa Aruba y cu ta carga e identidad di e isla. “Den e exhibicion bo ta wak tambe cu tin diferente; tin diferente obranan separa pero nan ta traha hunto tambe. E espacio grandi traha di tela cual ta e enfasis grandi di e espacio unda tin un otro obra ta wordo presenta den dje cual ta e trankera di cadushi, y riba esaki ta wordo presenta un video cu ta mustra diferente trankeranan documenta na Aruba,” Laura ta sigui splica. E ideanan aki tambe ta un narativo cu den un of otro manera hopi hende por identifica nan mes cu ne, reflehando esnan cu por ehempel a nace na Hulanda pero a crece na Aruba, cu despues a bay afo pa studia y topa cu diferente pensamento y experiencia. Pues e proceso di bay y bini, y con esaki ta pone bo explora bo mes y bo arte na un manera mas profundo.

‘Nos artistanan no ta haya representacion suficiente’
Laura ta splica Bon Dia cu for di su perspectiva como un artista visual contemporaneo, e ta sinti cu den e ramo aki artistanan no ta haya suficiente representacion. “Pero si nos ta wordo bon balora, un banda si, den e sentido di manera cu tin acceso na arte visual contemporaneo of cu tin oportunidad pa hende participa of pa hende bin wak, of si tin acceso na educacion. Mi ta kere tin hopi hende cu ta balora esey y ta dispuesto pa ta parti di esey,” e artista ta splica Bon Dia. E ta sigui bisa cu “den e sentido cu nan ta desea esaki y nan ta refleha hopi gratitud ora cu tin e acceso na dje. Pero mi ta sinti cu artistanan falta hopi representacion, mi ta kere esey ta parti paso tin un falta di conscientisacion riba arte visual of arte y cultura riba nan mes ta parti esencial pa un sociedad ta prospero.”

Arte mester ta un pilar vital cu ta yuda un sociedad ta mas prospero y pa hendenan sinti nan mes mas completo. “Mi ta kere cu e parti ey no ta wordo balora of no tin suficiente balor aworaki den e infrastructura di Aruba.” Cu TROPICO CUBE, e artista a refleha riba varios cos, manera unda materialidad tin un identidad visual cu nos tur conoce y cu ta iconico pa nos isla, cual gran parti ta domina Aruba su identidad di ‘One Happy Island.’ Pero na mes momento pa uza esaki como un manera di mustra kico Aruba su identidad ta, y tambe uza esaki como un oportunidad pa wak e cu wowo un poco mas critico.
E reflexion cu Aruba ta hopi mas cu djis un destinacion tropico, un paraiso of ‘One Happy Island.’

“Hopi ta wordo inverti pa tene na halto e pensamento aki [One Happy Island] pa asina acomoda hende di afo. Pero na mes momento e bunitesa di ‘One Happy Island’ ta cuminsa traha como un maskarada, unda tras di dje tin e realidad diario di problema social, economico, ecologico y mas. Pero tambe kico Aruba su cultura di berdad ta cu no ta wordo mira den un all-inclusive banda di lugarnan comercial.

E exhibicion TROPICO CUBE a habri na inicio di luna di Juli 2022 y lo ta habri pa publico riba su ultimo dia 27 di Juli na Cas di Cultura. E artista ta spera di por presenta e show aki na diferente caminda mas na Hulanda unda tin comunidad Caribense, mientras lo sigui enfoca riba desaroyo di e obranan aki y su contribucion na desaroyo di Aruba su sector di arte y cultura.

LEAVE A REPLY

Please enter your comment!
Please enter your name here