Prome minister Mike Eman a anuncia cu Aruba ta cla pa brinda asistencia humanitario na Venezuela despues cu dos teremoto fuerte a sacudi e pais diaranson atardi, lagando varios morto, herido y daño grandi na diferente zona di e pais.

Durante un conferencia di prensa ayera mainta, prome minister Eman a expresa cu Aruba ta para den solidaridad cu e pueblo Venezolano y a confirma cu gobierno ya a tuma contacto cu diferente instancia den Reino Hulandes pa coordina posible ayudo humanitario di emergencia.

Segun e prome minister Eman, e area mas gravemente afecta ta La Guaira y rond di Aeropuerto Internacional di Maiquetia, cual a keda seriamente afecta y a ser cera. Durante e conferencia id prensa e mandatario a informa cu, te na e momento ey, tabatin aproximadamente 70 morto y mas cu 600 herido. Sinembargo, el a adverti cu e cantidad di victima probablemente lo sigui aumenta.

Segun medionan di comunicacion internacional e cantidad di morto ya a surpasa 180.

Durante e conferencia di prensa, prome minister Eman a subraya cu e prome 48 ora despues di un teremoto di un magnitud asina grandi ta generalmente e periodo mas importante pa logra haya y rescata sobrevivientenan cu por a keda pega bou di edificionan cu a collapse. Segun e informacion preliminar cu gobierno a ricibi, e daño structural den diferente parti di Venezuela ta extensivo, cu hopi edificio grandi cu a cay of a sufri daño serio. Esaki ta haci cu e prioridad principal actualmente ta concentra riba operacionnan di buskeda y rescate.

El a sigui splica cu pa enfrenta un situacion di e magnitud aki ta necesario pa conta cu ekiponan profesional di “search and rescue”, cu ta capacita specificamente pa traha den edificio cu a collapse y den circunstancianan di riesgo halto. E la recorda cu Reino Hulandes a participa anteriormente den diferente mision humanitario despues di desasternan natural, incluyendo e teremoto cu a afecta Haiti na 2010. Segun e mandatario, Hulanda tin personal specialisa y e ekiponan necesario pa ofrece apoyo den operacionnan internacional di rescate.

El a indica cu gobierno di Aruba a inicia coordinacion cu diferente autoridad di Reino Hulandes poco despues di ricibi e prome informe tocante e desaster. Contacto continuo tin como meta determina ki tipo di asistencia lo por ta mas efectivo conforme e situacion ta desaroya na Venezuela y conforme peticionnan oficial cu por ser presenta.

Prome minister Eman a enfatisa cu Aruba a comunica cu e ta cla pa colabora den cualkier mision humanitario cu Reino Hulandes dicidi organisa. Un di e opcionnan ta e posibilidad pa usa Aruba manera un punto logistico pa mobilisa personal di rescate, material medico, suministro humanitario y otro tipo di apoyo necesario.

Prome minister Eman a indica cu el a mantene contacto tambe cu consul di Venezuela na Aruba Amabel Lugo y e embahadora di Reino Hulandes na Caracas, Carmen Gonzálvez. E mandatario a indica cu e embahadora di Reino Hulandes tabata den edificio di embahada ora e teremoto principal a sacudi e capital Venezolano y despues a informa gobierno di Aruba tocante e situacion.

Segun informacion cu prome minister Eman a comparti durante e conferencia di prensa, e impacto di e teremoto a ser sinti fuerte den edificio di embahada, obligando e personal pa evacua via e trapinan di emergencia, mirando cu uso di e lift no tabata posibel. Despues a ser confirma cu tur empleado di embahada a logra sali sano y salvo.

Aunke no tabatin herido entre e personal diplomatico, dos empleado di embahada a perde nan cas como consecuencia directo di e destruccion causa pa e teremotonan. Gobierno di Aruba ta sigui ricibi actualisacion regular via canal diplomatico mientras autoridadnan na Venezuela ta sigui evalua e magnitud di e desaster.

Prome minister Eman a informa tambe cu gobierno no tabatin ningun confirmacion oficial cu algun ciudadano di Aruba a ser afecta pa e teremotonan. Sinembargo, e situacion ta evoluciona constantemente y e informacion cu yega for di Venezuela ta sigui cambia conforme operacionnan di rescate ta avansa.

Pa motibo ey, gobierno ta mantene contacto permanente cu diferente instancia diplomatico y ta sigui verifica tur reporte cu nan ta ricibi. Gobierno a pone tambe numbernan di contacto disponibel pa ciudadanonan cu tin famia, amistad of conocirnan den Venezuela y cu kier busca informacion.

Ciudadanonan cu tin nacionalidad Hulandes por comunica cu Crisis Management Organization (CMO), mientras Departamento di Asuntonan Exterior ta atende otro consulta. Ademas, ciudadanonan tin e opcion tambe pa tuma contacto directamente cu Embahada di Reino Hulandes na Caracas pa ricibi asistencia of informacion adicional.

Durante su declaracion prome minister Eman tambe a dedica atencion na e comunidad Venezolano cu ta biba na Aruba, reconociendo cu hopi residente di e isla tin famia directo den e zonanan cu a ser afecta pa e desaster natural. Gobierno a indica cu e incertidumbre cu hopi famia ta pasando actualmente ta comprendibel, mirando cu comunicacion den diferente area di Venezuela ta limita.

Prome minister, den nomber di gobierno, a expresa su palabranan di solidaridad cu tur e personanan cu a ser toca pa e teremotonan. “Mi solamente por imagina con hopi angustia famianan Venezolano na Aruba mester ta pasando den e momentonan aki. Nos kier expresa nos solidaridad cu nan y cu henter pueblo di Venezuela,” el a declara.

Gobierno a reitera cu e prioridad inmediato ta sigui ofrece apoyo unda cu ta necesario y percura cu informacion confirma ta sigui yega na famianan cu ta buscando noticia di nan sernan keri.

E desaster natural por tin tambe consecuencia riba e plannan cu gobierno tabata desaroyando pa reestablece conexion aereo regular entre Aruba y Venezuela. Segun prome minister a informa, prome cu e teremotonan, gobierno tabata evaluando e posibilidad pa habri e ruta comercial dia 1 di augustus.

Prome minister a indica cu lo mantene contacto cu Venezuela pa determina si e situacion na Aeropuerto Internacional di Maiquetía ta permiti sigui cu e kalender plania, cu inicialmente contempla pa cuminsa cu un vuelo diario.

Pero mientras e evaluacion ey ta tuma lugar, gobierno a dicidi habri inmediatamente un coredor humanitario pa facilita transporte di asistencia urgente for di Aruba bay Venezuela. Pa logra cu e coredor por opera sin interupcion, lo mester coordina diferente aspecto tecnico entre e autoridadnan di aviacion di ambos pais y firma un Memorandum di Comprondemento (MoU) cu lo regula e cooperacion.

Na mesun momento, un grupo di trabao lo sigui cu e preparacionnan pa eventual reapertura di frontera, mientras Aruba a confirma cu su espacio aereo ta disponibel pa cualkier mision di emergencia of asistencia humanitario cu Reino Hulandes of otro instancia autorisa por organisa.

Segun gobierno, e prioridad principal ta pa sigui sostene un coordinacion efectivo pa por responde rapidamente na cualkier necesidad cu surgi. Cu operacionnan di rescate ainda den nan fase mas critico y e cantidad di victima cu probablemente lo cambia den e ora y dianan cu ta bin, gobierno a indica cu lo sigui informa publico conforme informacion confirma ta bira disponibel.

E enfoke actual ta concentra riba cooperacion regional, preparacion logistico y disponibilidad pa brinda apoyo humanitario na Venezuela durante un di e desasternan natural mas grave cu e pais a enfrenta den e ultimo añanan.

Di su banda director di Crisis Management Organisation (CMO), Rino Hermans, a indica cu e situacion cu a surgi despues di e teremotonan na Venezuela a laga Aruba cu un les importante tocante maneho di informacion durante emergencia. Segun Hermans, e prome teremoto a ser registra cu epicentro riba tera y algun seconde despues un di dos teremoto mas fuerte a ser registra.

Hopi persona na Aruba a ricibi un alerta di Tsunami riba nan telefon. Hermans a splica cu esaki tabata un sistema automatico cu a analisa e riesgo di tsunami genera pa Inteligencia Artificial, locual a crea confusion y panico den comunidad durante alrededor di 40 minuut. El a sigui splica cu e informacion di e sistema automatico aki no a tene na cuenta cu e teremoto tabata riba tera y no den lama, pues no tabata un maremoto, loke cientificamente ta haci un tsunami hopi improbabel.

Hermans a enfatisa cu alerta automatico no por reemplasa informacion confirma pa autoridadnan oficial. Segun e, despues di un evaluacion di Pacific Tsunami Warning Center, Aruba mes ta analisa e informacion y ta determina cual accion mester ser tuma. E director di CMO a indica cu e evento a mustra e importancia di sigui comunicadonan oficial y no depende riba alerta genera automaticamente. CMO lo revisa su protocolnan di comunicacion y lo sigui traha riba educacion y conscientisacion pa prepara comunidad miho pa emergencia den futuro.