‘Aruba ta riba mapa di paisnan cu ta reconoce responsabilidad y balor di hende muhe’

E siman aki e presencia di hende muhe den e conferencia Briya den Bo Sapato y Cana pa Progreso, tabata grandi. Tambe tabata un presencia basta limita di hende homber.

P’esey e prome minister femenino den historia di Reino Hulandes Maria Liberia Peters no a perde oportunidad pa felicita tambe e hende homber emancipa cu a bay atende e evento organisa den cuadro di dia di hende muhe.

Congreso
Mas cu 1400 a duna testimonio di un publico femenino mayoritario cu a bay atende e conferencia aki organisa pa gobierno di Aruba. E prome mandatario femenino cu a ocupa e funcion aki den historia politico di Aruba. Evelyn Wever-Croes (MEP) a expresa su alegria y satisfaccion di por a mira e interes di mas cu 700 hende muhe, pero hende homber tambe cu a bini hunto pa asina celebra un dia importante. ‘E ta yena bo cu alegria y forsa’, el a bisa na Bon Dia Aruba.

E ta haya cu tur dia ta dia di hende muhe y hende homber, pero e ta contento cu tin un dia special manera esun di ayera cu a wordo conmemora mundialmente.  Segun e mandatario e dia aki ta permiti bo y hustifica pa bo para keto, y reflexiona riba e rol di hende muhe. Pero particularmente kico nan por a logra y kico nan kier logra como hende muhe.  Igualmente kico nan tin cu haci pa logra nan metanan. Ta p’esey e dia di ayera tabata uno special pe.

E echo cu dos politico femenino di Reino Hulandes, Maria Liberia Peters y prome minister di nos pais , Evelyn Wever-Croes tabata comparti e mesun escenario, tabata un acontecimento cu hala interes di e publico. Nos prome mandatario a considera esaki como un  honor hopi grandi, ya cu como hende muhe den politica ‘bo ta wordo inspira pa otro hende muhe den politica’.

Sra. Wever-Croes ta haya cu ex prome minister di Antia, Maria Liberia Peters ta un persona cu a influencia  su bida como politico. Un echo ta e forma con sra. Peters a drenta politica pa accidente. E tabata traha den enseñansa  y aunke e ta un abogado semper el a percura pa e bienestar di e muchanan. E ta un persona hopi firme y determina, y mirando cu e no por logra trece cambio, el a dicidi di drenta den arena politico temporalmente. “Pero unabes cu bo ta drenta bo no ta sali…  pasobra cada bes e ta keda desafia bo mas y mas…”, segun sra. Wever-Croes.

Ex politico Maria Liberia Peters
Di su banda sra. Peters a expresa na e matutino aki cu el a dicidi di acepta e invitacion aki pa bin Aruba, pasobra e ta haya cu e mester duna sosten na e echo cu pa prome biaha nos pais tin un prome minister femenino.

“Nos ta kere cu nos tin cu lucha pa igualdad den mundo.” E ta  haya un gran honor na e acogida cu e dia di ayera tabatin, caminda a wordo papia riba diferente aspecto di importancia pa kico hende muhe mester ta participativo den politica y den tur aspecto di bida social, financiero y economico.

Segun sra. Peters, Aruba a pone su mes aworaki riba estadistica internacional. Pasobra el a indica cu tin instancianan internacional cu ta midi of evalua desaroyo di hende muhe den tur pais.  “Aworaki Aruba tambe ta riba mapa di e paisnan cu a reconoce cu hende muhe por eherce responsabilidad riba e plano di mas halto di bida social y politico.”

Panel politico
E conferencia aki tambe a conta cu ex minister Ella Tromp-Yarzagaray como orador, sr.  Tromp-Yarzagaray kende tabata un di e prome sernan femenino cu a forma parti di un gabinete,  despues cu nos pais a logra su status aparte. E conferencia aki tabatin entre otronan, parlamentario (POR) y ex minister Marisol Lopez-Tromp  y tambe parlamentario Jennifer Arends-Reyes (AVP), kende nan a comparti un panel politico tocante hende muhe den politica.

Prome minister Wever-Croes a participa tambe den e panel aki cu a muestra cu a pesar cu nan por tin  nan diferencianan politico, nan tin hopi cos den comun ora cu ta trata di temanan cu ta regarda proyeccion di hende muhe. Sra. Wever-Croes  a declara na e matutino aki cu nan lucha ta comun. “Nos por uni y surpasa cualkier diferencia ora cu bo tin  cu uni pa un causa importante.”

E  ta haya cu e echo cu awendia nos tin un hende muhe na cabes di nos pais como prome minister ta un refleho di un cambio di mentalidad den nos sociedad. Pero e ta un refleho cu tur loke hende muhe ta propone nan por logra tambe. E  ta demanda hopi sacrificio si. Pero si e ta haya cu nos sociedad ta habri posibilidad pa e ser femenino por proyecta su mes. Specialmente e cambio aki ta mental caminda cu  hende muhe tambe por tur loke nan ta propone nan mes na dje.

Parlamentario Lopez-Tromp tambe tabata un di e panelistanan cu a enfoca riba diferente aspecto di nan trabou como politico. E parlamentario aki ta haya cu e tempo cu el a drenta politica 20 aña pasa, no tabatin hopi politico hende muhe y mucho menos hobennan. Pero despues a bin un atencion mas grandi riba hala hubenil den politica, mucho mas hende muhe a drenta  politica.

Aworaki nos tin un constelacion den parlamento cu presencia di basta hende muhe aden. “Y na mesun momento por bisa cu sigur tin un diferencia den e manera cu sea un hende homber of un hende muhe ta acerca un topico, problematica of tuma di decision.”

 

 

You May Also Like

25mei, NW, AZV DESPA.jpg

Prome estudio haci pa AZV y DESPA: Pashentnan a duna diferente señal di ta insatisfecho cu cierto oficina di dokter di cas

Algemene Ziektekosten Verzekering (AZV) a ricibi varios señal di insatisfecho of disgusto di pashentnan ...

Hobennan impresionando prinses Beatrix den debate

E plan tabata pa organisa un debate cu hobennan for di Reino, sin embargo ...

Reaccion di minister riba CAft: lo por spera un presupuesto 2018 mas positivo ainda

Den un reaccion di minister di Financia Xiomara Ruiz-Maduro (CAft) riba e carta di ...

Artur Dowers.JPG

Minister: Atraconan arma ta aumentando

Minister di Husticia Arthur Dowers conhuntamente cu alto comisario Dolfi Richardson a bisa riba ...

Control number auto.JPG

Departamento di Impuesto lo reuni cu polis riba control di vehiculonan

– Te aworaki apenas 48% di e automobilista a cumpli cu e pago di ...