Home Editorial Venezuela ta trata nos malo?

Venezuela ta trata nos malo?

711

Noticia di prome plano atrobe: Venezuela a dal e porta cera duro atrobe. Nada di aviacion no ta drenta ni sali. Nan a habri e porta  djis un tiki asina, pa suavisa e asunto, pero ta mustra nos atrobe ta ken ta boss. Atrobe nos ta bay haya e mesun lamentonan, den estilo di ‘pakico nan ta trata nos asina?’ ‘Ta kico nos a haci nan…’ Por ta cu ta bira tempo pa nos haci un intento di mira e asunto aki den su perspectiva real. Y esey ta encera hopi mas cu kisas nos ta pensa a primera vista.

Un prome pregunta: nos ta corda con e relacionnan cu Venezuela  tabata, ban bisa prome cu 2013/2014? Nos tabata biba nos bida, nan di nan, y leu leu tabatin algun comentario tocante e regimen socialista ey, cu tabata mustra di tin e potencial di bira un problema grandi pa tur su bisiñanan, y un berguensa grandi pa tur Latino Americano cu ta aprecia democracia. Den henter e lidiamento cu e refineria desde 2009 bin ariba, no tabata papia mes di Venezuela. Al contrario, manera e ex ministro converti den parlamentario awendia ta bisa, nan gobierno tabatin hopi mas gana di biaha y bishita delaster un pais cu posiblemente por tabatin interes di tuma na su encargo pa habri un refineria obsoleto, cu ni sikiera por a produci producto final. Kico tur e biahenan ey a duna? Nada. Desde e idea ridiculo na inicio di e gabinete di bay pidi Mexico y Pemex un prijs special pa Valero por gana placa, te na e romance cu Petrochina, cu Petrobras, tur empresa di reputacion riba e mundo aki a bisa cu nan no ta mira futuro pa e refineria aki.

Despues, na un momento unda e regimen di Hugo Chavez y Nicolas Maduro a bira un cos caba  cu ningun hende drechi kier deal cu nan, ata, ta nan lo bin salba Aruba. Puntra cuanto gobierno drechi, salvo esun di Iran, Corea di Norte, Cuba,  Bolivia y algun campeon di reputacion dudoso mas, a yega di bay sinta den Miraflores pa firma acuerdo cu e hendenan aki. Anto kico nos a haya di mira? Un show cu 2000 pagina di contract, cu ken a traha? Venezuela, of Aruba? Laga nos stop di gaña nos mes. Ta nos gobierno, apoya pa un oposicion cu pa gran parti tabata apoya e asunto aki tambe, a pone e deal riba mesa, y gobierno Venezolano a firma, den estilo Hulandes di ‘baat het niet, schaadt het niet.’ No cu nos sa cu nan por a siña un tiki Hulandes for di e embahador Hulandes cu tabata comprende su papel masha bon mes, mescos cu na 2014 tempo cu a laga interes economico Hulandes prevalece riba husticia na Aruba: e caso Carvajal.

Nos ta supone cu, contrario na e parlamentarionan di oposicion na Aruba, Hulanda si a lesa e 2000 paginanan, y a bay di acuerdo. So far, so good? Mientras cu na Aruba gobierno y oposicion di e tempo ey, tabata bringa cu otro, ta ken a haci mas pa e milagro di hero bieu aki sucede, realidad economico a impone pa sr. Maduro y Pdvsa. Y Merca a dicidi di step up y naturalmente Hulanda y Union Europeo mester a sigui, pa no bira un ‘Johnny come lately den loke ta bay sucede. Hulanda y Shell por haya acceso na e reservanan di petroleo y gas na Venezuela, pero ya no bao di e regimen aki. Nan ta enfocando caba riba haci negoshi cu e mandatarionan nobo, cu lo ta den gobierno na Venezuela. Laga nos spera, for di banda humanitario tambe, cu esey ta asina. Y den esey, Aruba no ta bay hunga ningun sorto di papel, sigur no cu e refineria estilo Fisher Price aki, haya na un of otro yard sale un diasabra atardi. Venezuela lo bay enfoca atrobe riba desaroyo di su propio potencial, y esey ta construi e seis upgrader nan cu nan tin 20 aña den planning caba, cu no a cristalisa pasobra e regimen socialista no tabata duna e companianan grandi multinacional un parti suficiente di e ganashi pa e ta atractivo pa nan. Pero ta nan tin e tecnologia, no e Chavista nan. E mesun actitud ey a haci cu tin problema grandi cu e partnernan di e cuatro upgrader nan cu ta operando, cu a conduci na mal mantenemento y caida di produccion. Desde algun tempo e partnernan Europeo cu actividad na Venezuela 9ENI, Repsol, Total) ta tene cuenta cu perdida di loke nan tin di cobra ainda di Pdvsa y gobierno Venezolano, un señal cu actualmente no tin no tin modo di opera drechi na Venezuela.

Pa e regimen mas delincuente den historia di nos continente, nos ta simplemente un pion den e wega entre nan y e paisnan Europeo y Merca, cu a tuma e decision caba cu nan relacion cu Venezuela lo normalisa dia tin un otro gobierno democratico na e pais. Tanten cu sr. Maduro t’ey, nada lo cambia, pues nada di lamento mas y ban organisa nos bida, sin un refineria. Y de paso cambia e aspecto di San Nicolas, di un stacion di gasolin inmenso, pa algo miho.