Na e momento aki tin na Raad van Advies un proyecto di ley, cu ta contempla e aumento di e ‘environmental tax’ cu un cierto porcentahe, pa gobierno haya extra entrada pa yuda paga e costonan cu procesamento di desperdicio ta trece cune.
Como cu ainda Raad van Advies no a duna su conseho, y e proyecto di ley no a bay Parlamento ainda, e contenido no ta enteramente conoci. Ta scucha cu lo ta trata di un impuesto di US$ 1,50 pa camber pa anochi di e sector di hotel, timeshare y otro acomodacion, ademas di e existente environmental tax, cu ta US$ 3,00 pa anochi caba.
E proyecto di ley lo a ser elabora entre otro a base di un conseho di Aruba Tourism Authority, cu den un conseho fecha 13 di september 2018, dirigi na ministro encarga cu Desaroyo Teritorial, Infrastructura y Medio Ambiente, como contesta riba peticion pa conseho di e ministro, ta duna e motibonan pa cual ATA ta considera cu e ‘waste tax’ aki lo no ta bon idea, pero ta sugeri pa aumenta e existente ‘environmental tax’.
Basicamente ATA ta basa su mes riba e expectativanan di crecemento di turismo, cu lo ta duna espacio financiero pa impone tal peso extra riba e sector y e bishitante. E entidad ta referi na e situacion economico di e sector, unda ta señala cu ‘mester mantene un balans den contexto di e corelacion prijs/calidad cu un vacacion na e isla ta representa’. Pa esaki ta referi na e resultadonan cu Banco Central di Aruba a registra desde e institucion di ATA den e periodo di 2011 te cu 2017, unda cu e ‘tourism receipts’ a crece cu un promedio di 4% pa aña, y na 2017 hasta cu 6%. Ademas e asina yama RevPar (“revenue per available room”), manera registra pa AHATA a crece cu un promedio di 5% pa aña den mesun periodo, y hasta cu 10% na 2017. Ambos indicador lo tabatin un aumento tambe na 2018, segun e conseho.
For di esaki ta sali e conclusion di ATA cu ‘nos bishitante ta dispuesto di paga cada bes mas pa su biahe pa Aruba y cu e ta gasta tambe mas na beneficio di nos economia. Esaki ta e resultado directo di e buskeda di ATA di bishitante cu un entrada promedio mas halto’.
Ademas ATA ta conclui, a base di diferente investigacion y medicion, cu “durante e ultimo 7 aña tin un tendencia den desaroyo unda e bishitante, di forma creciente, ta di opinion cu tin un desbalance den e corelacion di prijs/calidad na e isla; un indicacion cla ta cu ta haci pregunta tocante e altura di e sumanan cu ta paga versus e balor cu ta ricibi. Hecho ta cu Aruba ta ser marca como caro en comparacion cu otro destino den region, pero specificamente pa falta di e asina yama ‘balor pa bo placa’.”
Pa clarifica, ATA ta bisa tambe cu nan ta pro un modelo unda costo di vacacion na Aruba ta aumenta gradualmente, y ‘hasta di un refuerso di tal posicion’ unda cu bishitante ta dispuesto di paga mas pa un producto cualitativamente mas halto.
Tambe: “E vision aki ta esencial den e proceso di pensa strategico pa futuro, sigur si nos mester tuma na cuenta e limitacionnan pa loke ta e expansion den volumen. Volumen ta nifica den esaki crecemento di un forma mas modera, tumando na cuenta balor/entrada proporcionalmente mas halto pa bishitante.”
Despues ta trece dilanti e aumento constante den e ultimo añanan di e gastonan pa sector turistico. Den esey ta menciona e room tax di 2010, e introduccion di e ‘travel promotion levy’ di US$ 10 pa cada persona entrante na 2012, despues e aumento pa turista na acomodacion all inclusive, e ‘environmental levy’ di US$ 3 pa cada nochi na Aruba, ademas e ‘health tax’ (BAZV) banda di e BBO normal, e aumento di e ‘cruise passenger fee’ di US$ 3,50 pa US$ 8,00 pa cabes na 2016, y un aumento di e impuesto di aeropuerto na 2017. Ademas ta menciona e medidanan mas reciente, cu ta e aumento di BBO/BAZV/BAVP aña pasa, y e medidanan na caminda e aña siguiente (2019; red.). Riba tur esey e discusion encuanto e ‘waste tax’, cu lo mester bin na vigor na 2019, en todo caso segun e documento di ATA aki. Ademas ta menciona tambe e asina yama ‘marine/national park levy’ y posiblemente otro medidanan na caminda, segun e documento.
Tambe ATA a expresa su preocupacion pa e calidad di e experiencia cu e bishitante tin, y ta señala cu den esey mehoracion di loke ta ofrece como producto Aruba ta di importancia esencial. “Si e ‘cost of doing business’ ta sigui subi y constantemente ta compensa esaki a costo di e consumidor y e bishitante, y si e ‘waste tax’ ta e siguiente medida cu ta aumenta gasto cu ta afecta tur hende, ATA ta puntra su mes con e medidanan aki lo afecta e columna vertebral di nos economia, e empresa mediano y chikito, pero sigur tambe e acomodacionnan.”
ATA ta preocupa tambe cu no tin claridad tocante e desaroyonan di infrastructura cu tin planea pa loke ta acomodacion den e proximo añanan. ATA ta presenta un tabel (presenta banda di e articulo aki; red.) unda por observa e crecemento grandi den cantidad di camber (di alrededor di 10.000 pa mas di 14.000).
Finalmente ATA ta reconoce cu tin un necesidad pa yega na un solucion duradero pa e problema di desperdicio na Aruba. Tambe un contribucion/fee pa e Marine Park no ta algo cu mester ta un obstaculo, pero ta pensa cu pa ambos e introduccion y cobransa mester ta simpel. Por lo tanto, ATA ta yega na e recomendacion pa considera aumenta e actual ‘environmental levy’, cu un aclaracion bon pa ki meta ta bay uza e impuestonan aki.
