ATIA contra aumento salario minimo

Tampoco ATIA como gremio comercial y di industria no ta di acuerdo riba e manera cu gobierno a dicidi di bin cu un aumento di salario minimo.

Ayera  presidente di ATIA, Ronald van Trigt a bisa cu nan gremio ta asombra pa e anuncio y forma cu minister di Labor a declara cu lo aumenta salario minimo. No tabatin un consulta, y tampoco a evalua e aumento aki, segun nan. Na luna di augustus ultimo ora cu gobierno anterior tambe a bin cu un aumento modesto riba salario minimo, e gremio aki tambe a yega di vocifera nan rechaso pa e forma casi similar cu nan a tuma e decision.

Pero e biaha aki minister di Labor a anuncia cu lo bin cu un aumento substancial di e salario minimo na Aruba.  Sinembargo e mandatario no a anuncia un suma  y un fecha exacto cu esaki lo drenta na vigor. ATIA a tuma nota di e anuncio aki y tambe riba e manera con e decision a wordo tuma.  Segun sr. Van Trigt normalmente nos tin instancianan oficial manera SER cu ta wordo consulta y scucha prome cu ta wordo determina e cambio di cualkier salario na Aruba.

Efecto
E ta haya cu un aumento di salario tambe lo por trece un efecto contrario na loke gobierno pa medio di minister di Labor ta purba di logra. Ya cu un aumento asina por tin su efecto economico riba nos pais. ATIA ta haya cu tin algun puntonan cu mester tene na cuenta cu ne conhuntamente riba e aumento aki. E gremio aki ta di opinion cu nan  no por drecha un situacion social ni economico simplemente pa medio di un aumento di salario. “Na nos parecer ta un aumento cu nos no a haya e base su tras di e suma, y ni exactamente pakico e suma ey.”

E echo cu ya gobierno pa medio di e minister di Labor a anuncia un aumento riba salario minimo, esaki por crea oportunidad pa discuti e problema cu nan tin riba nos isla. E gremio aki tin diferente preocupacion y nan ta dispuesto pa sinta cu gobierno y otro partner pa trata nan den un encuentro nacional, ya cu e palabra dialogo nacional a wordo hinca den un esfera negativo.

ATIA ta preocupa pa un serie di problema riba nos isla. Sinembargo e manera cu e asunto di aumento di salario a wordo treci dilanti ta purba cu ta mustra cu nos por soluciona problemanan di un nivel hopi complica na un manera hopi facil. Pero no tin manera pa soluciona problemanan tan complica cu medidanan simpel.

Minister di Labor a bisa cu nos tin problema social serio na Aruba, y ATIA tambe ta consciente di e problemanan aki. Sr. Van Trigt ta recorda cu ATIA pa un tempo basta largo caba ta den combersacion cu diferente instancianan pa wak con por soluciona e tipo di problemanan aki. ‘Simplemente 100 florin no ta solucion’e.”

Otro problema cu sr. Van Trigt a cualifica como particular y social ta e indice di desempleo bou nos hobennan. ATIA sa cu den e poblacion aki, hobennan entre 18 pa 25 aña tin un desempleo di casi 20%. Mester yega na un formula pa motiva comercio pa emplea e trahadonan jong y crea conhuntamente incentivonan manera ta sosode na Hulanda.  E ta un punto cu ATIA ta considera relevante pa papia riba dje, y cu ta yuda amplia e base di persona di nos poblacion cu por drenta mercado laboral.

Tambe hunto cu e proceso di duna mas hende oportunidad pa drenta mercado laboral, ATIA ta haya un señal robes di  minister su mensahe caminda nan ta bay haci trabou temporario mas stricto y dificil ainda.

Otro problema cu presidente di ATIA a señala ta e hobennan cu a confronta problema cu husticia. Ta dificil pa e personanan aki por re integra den nos mercado laboral. Un punto cu nan a yega di trece dilanti cerca gobierno anterior y tambe actual  ta con comercio ta bay adapta su mes pa acepta e hendenan aki den un proceso laboral. Nan mester di incentivo pa comercio por acepta e trahadonan aki y tambe absorba otro tipo di problemanan di indole social.

Ilegalidad
E problema di ilegalidad riba nos isla ta  un preocupacion grandi cu ATIA ta expresa. Su presidente a indica cu durante e ultimo añanan cada biaha cu gobierno ta anuncia algo pa remedia un situacion, e por ta cualkier tipo di belasting of hisamento di salario minimo, no ta wordo papia cu esaki ta incentiva e grupo di trahadonan indocumenta na Aruba.

Esaki ta otro problema social ya cu e grupo di hende indocumenta aki ta alrededor di 6 mil hende. Nos no ta wak nan  por ehempel drumi riba nos beach, sino cu e hendenan aki ta participa den nos mercado laboral. Pero esunnan cu ta emplea nan  no ta contribui suficientemente cu e primanan y otro programanan social pa sostene un pais y un economia sano.

Pa motibo di esaki ATIA ta demanda un plan pa atende e tipo di trahadonan indocumenta. E ta premira cu si no ta bin cu un plan, nos ta bay haya nos mes cu mas hendenan lo bay haci uzo di trahadonan indocumenta. Tin ehempel di construccion andando unda nos autoridadnan a haya mas cu 40 persona indocumenta. “Con nos ta bay soluciona pa medio di un salario minimo e tipo di problemanan aki.”

Presidente di ATIA a declara cu pa comercio por haci cualkier tipo di ahustacion na e momento aki, e topiconan cu el a menciona ariba mester wordo atendi dunando prioridad na e problema di personanan indocumenta.

 

 

You May Also Like

SADA preocupa pa descontento den cuerpo di Aduana

Presidente di sindicato di cuerpo di Aduana (SADA), sr. Eduard Maduro  a bisa cu ...

102355121-452444658.530x298.jpg

China no ta fia Venezuela mas

Despues di basha biyones den Venezuela den ultimo decada, China ta cortando prestamo nobo ...

5Yellow.jpg

Sospechoso “Yellow” a keda deteni

Informacion cu nos a ricibi ta cu un tip clave a drenta na autoridad ...

Pa motibo di registracion di pareha, Aruba 10 aña sin codigo civil nobo

ORANJESTAD – Ainda despues di dies aña, e Codigo Civil Aruba (BWA) no ta ...

Director ATIA evento refineria Br 1.JPG

ATIA ta mira Citgo Aruba y Refineria di Aruba como un oportunidad nobo pa mas progreso pa nos isla

Diabierna anochi, ATIA a tene su evento anual na Aruba Marriott  Resort & Stellaris ...

image.jpeg

Apelsina y anasa exporta pa Aruba ta liber di Musca di Mediteraneo

 Asociacion di Citricultornan di Sonaguera (Acison), na Colon, Honduras, a expresa nan satisfaccion di por a habri e porta di ...