Diferente persona incluyendo habitantenan di e area, a entrega keho y trece informacion dilanti na autoridad riba locual ta pasando na e cas di horror di cacho na Tanki Flip. Bisiña dilanti di e cas no tabatey na momento cu nos a bay tira un bista na e adres. E yiu muhe si tabatey y el a bisa cu nunca nan a echt ripara algo fout di e cas y e holor straño di cacho morto nunca a hala su atencion. E manera cu e cas ta situa ta haci cu casi no tin bisiña mes.
Banda di esaki e compania di pest control ta na e sitio aworaki ta spuit y nan tin un oficial di siguridad na e sitio y no ta lagando ningun hende drenta e cura. Aparentemente tin un cas tiki mas patras di e cas di horror di cacho aki cu tambe a pidi pa polis pasa controla, como lo tin bestianan incluyendo galiña morto.
Manera ta conoci a haya mas di 100 cacho y algun pushi bibo y morto na e cas. Tabatin dos persona na e cas un di nan cu a wordo deteni kende ta e yiu homber cu no ta bon di cabes. E mama lo ta un persona di edad cu ta sufri di Alzheimer (e info aki no a wordo confirma). Ainda nos no tin informacion pakico autoridad a tarda pa actua den e caso aki y a laga e situacion bay asina fey man. Pasobra tin kehonan entrega pa varios aña na diferente instancia manera ARA y veterinario di bario Noord. Polis a bisa mas cu un aña pasa cu nan ta na altura y lo bin cu solucion sinembargo esaki no a sosode, te cu ayera cu un polis lo a haya holor malo y a bay controla y a topa cu e situacion hororoso.
