Segun informacion di Reuters.com, autoridadnan Venezolano a detene presidente di Citgo Corp Merca diamars na Caracas. Jose Pereira a keda deteni pero fuentenan no a duna motibo ainda pa su detencion.
Fiscal mayor di Venezuela Tarek Saab a bisa cu e ta liderando un mision contra corupcion den e industria di petrolio na Venezuela. Tin por lo menos 50 oficialnan cu a keda deteni den e ultimo lunanan.
Autoridadnan Venezolano a caba di deteni seis ehecutivo mas diamars incluyendo sr. Pereira. Reportahenan ta bisa cu tur esakinan ta e siguiente pasonan tuma pa combati crimen organisa. Sr. Pereira a wordo promovi na April como presidente interino di Citgo, e refineria y Marketing Mericano, unit di e compania natal di e pais PDVSA. Citgo tin tres refineria y un network di terminals & pipelines na Merca. Pereira tabata anteriormente vice presidente di finansas di Citgo. El a reemplasa Nelson Martinez, kende a wordo nombra minister di petrolio Venezolano na Januari. Den e caso di detencionnan di Citgo, a keda descubri un deal di 4 biyon dollar cu agencianan di exterior cu lo por a wak Citgo den un debe ‘inhusto’, te hasta wordo ofreci como garantia pa e prestamo, segun e agencia di noticia Reuters.
Corupcion
“E directiva aki a pone Citgo den peliger. Esey ta corupcion, corupcion di mas putri cu ta existi,” sr. Saab a bisa den un declaracion. E gobierno di presidente Nicolas Maduro y PDVSA, formalmente conoci como Petroleos de Venezuela SA, continuamente a bisa di bay tuma medidanan pa combati corupcion. Sinembargo lidernan di oposicion ta bisa cu PDVSA a wordo perhudica por medio di mal maneho, corupcion y malversion durante 18 aña di un gobierno socialista. Oposicion ta bisa cu e detencionnan aki ta conecta cu e problemanan cu tin entre rivalnan den organisacionnan gubernamental.
Foto & Fuente: Reuters
