Minister Richard Arends
Minister Richard Arends

Algun luna atras parlamento di Aruba a aproba un ley unda ta duna autorisacion na gobierno y den e caso specifico aki na minister Arends pa haci un pago na un grupo di ex empleadonan di Setar, prome cu el a bira un NV. Recientemente e prome grupo di afvloeiiers di Setar a wordo paga minister Richard Arends a splica.

“Siman pasa e prome grupo di 30 ex empleado a wordo paga via nan abogado. Mi ta satisfecho cu esaki. Pa loke ta e di dos grupo nan nombernan mester wordo concretisa den un Landsbesluit. E proceso ey ta canando hopi lihe. E proceso ta encera tambe verificacion di nan persoonsnummer . Pronto e grupo aki tambe ta keda cla y e odisea di 14 aña pa e di dos grupo aki ta yega su fin.”

E pago na e prome grupo ta encera e suma di 1.5 miyon florin. Pa e di dos grupo tin un suma di 2.5 miyon reserva. “E sumanan aki ta wordo paga pa pais Aruba cu autorisacion di parlamento. Pa motibo cu Setar no tabata parti di esaki, e suma aki no a wordo poni un banda door di e compania. Pa evita cu e grupo di 60 cu no a bay corte keda sin haya su placa y lo mester bay corte pa haya esaki, gobierno a dicidi di yega na e acuerdo di principio cu SEPPA.

“Hues a dicta sentencia den fabor di 30 hende cu a bay corte, pero a keda un grupo di 60 hende cu a cay afo. A yega na un acuerdo di principio entre SEPPA, Prome Minister Eman y mi colega de Meza e tempo ey. Nan a cuminsa cu un proceso di legislacion pa autorisa minister pa efectua e pago pa henter e grupo di 90 empleado. E proceso a keda cla algun luna pasa.” Minister Arends ta sigui conta cu di biaha despues Directie Financien y Wetgeving a busca e lista di afvloeiiers cu mester wordo paga segun calculacion di hues inclusive e interes legal cu ta hinca tambe den e di dos grupo.

Na 2003 Setar a wordo privatisa y a ofrece paketenan na empleadonan cu tabata cerca nan edad di pensioen.” Minister a splica cu no mucho tempo despues a surgi un disputa riba kico ta e base pa calcula e avloeiingsregeling. E proceso aki a dura masha largo mes. E caso a bay corte y hues a dicta na fabor di un grupo di e ex empleadonan aki. Hues no a duna sentencia den caso di un otro grupo cu tambe ta parti total di e afvloeiiers cu ta mas o menos 90 hende.

Minister Arends a keda masha satisfecho con tur cos a bay te awor y ta spera cu pronto cu di e dos grupo por haya e placa cu a keda acorda cu hunto cu esun di e prome grupo ta suma 4 miyon florin.